Anen. 7 - Yus Papí: Shuarja̱i̱ Yus Yamaram Chicham Najanamu

Aishri̱ nua̱ri̱n aujma

¹ “¡Jípit sapat awekamna nuja̱i̱ nawe̱chirmesha imiá shíirmachitme úunt akupniu nawantri̱yá! Ame kájke̱chirmeka kaya shíirmach péṉker iwiarsar ti naṉkaamas unuimiátra najantsamua tímianuitme.

² Ame úntuchirmeka tsapa umutai̱ tentenum piakua ániuitme. Ame tantanchirmeka trikiu utuampramu ririu kuku̱j pújuja̱i̱ téntakma ániuitme.

³ Ame mái̱ muntsuchirmeka japa uchich jímiampramua tímianaitme.

⁴ Ame kuntujchirmeka je̱a̱ tsakatskatin yajasma wajiṉkí̱ya núnin puju shíirmachia tímianaitme. Ame jí̱chirmeka Ishpunnum taurma entsa pájata Patrawín wá̱i̱ti̱a̱i̱nmaani̱ ana núniniaitme. Ame nuji̱chirmeka Ríwianunam Tamaskunmaani̱ je̱a̱ tsakatskatin ana núniniaitme.

⁵ Ame múukchirmeka Karmiriu mura chái̱ki̱ya̱ ániuiti. Tura ame intiashchirmeka nuwa̱ akupniu entsatái̱ri̱ yamakái̱ji̱a̱i̱ sasariarma ániuiti. Nuja̱i̱ akupniusha nawamkaitme.

⁶ ¡Imiá shíirmachitmea tura timiá péṉkerchitme! ¡Maa aneamuru wakerú ajamaintme!

⁷ Ame nayachirmeka kuṉkukia tímianaitme. Ame netsepchirmeka kuṉkuki̱ nantaṉkri̱ya núniniaiti.

⁸ Wi chichaakun ‘Kuṉkukniun wakatjai. Tura akantran waṉkarkuri̱n jurumkitjiai.’ ¡Tura ame netsepchirmeka uwa nantaṉkri̱ya núniniaiti! ¡Ame wenuchirmeka kuṉkunti̱sha mansana kuṉkúa núniniaiti!

⁹ Kayapkatchirmesha péṉker wíniua núnin atí.” “Winia aneamurnaka náintmaani̱sha iniainiumaani̱sha yáitmataik ti shiir ku̱ja̱ti.

Nua̱rí̱ áishri̱n aujma

¹⁰ Wikia winia aneamurnaitjiai. Wíji̱a̱i̱ṉkia wararnáiyawai.

¹¹ Winia aneamuru winitiá ajanam wemí. Uchich írutkamunam jeatak weri kanumi.

¹² Káshik nantakir úwa ajanam wetái. Uwa tsapainiawash tura nerenawash iyumi. Kranatu kuku̱jrukariash. Winia aneṉkrattai̱rnaka nui̱ amastájai.

¹³ Mantrakurasha kuṉkuṉkarai. Ii wáitiri̱n ashí numi neré̱ yumin irunainiawai. Yamaiya̱ncha tura káakuncha winia aneamuru áminiunak ikiursaitjiame.