Anen. 4 - Yus Papí: Shuarja̱i̱ Yus Yamaram Chicham Najanamu

Áishmaṉ nuwa̱n aujma

¹ “Iisia ju̱á amikru ámeka shíirmachitmena maa nekas shíirmachitme. Ame jí̱chirmeka tsatsapchiji̱a̱i̱ nukumásam yámpitschia nuní̱ íirkaitme. Ame intiashchirmeka chipiu áishmaṉ untsurí Karaata tátatamuri̱n tepena núnisaiti.

² Ame naí̱chirmeka untsurí murikiu uré̱ tsupirma nijiakmatainmaya̱ jiiniainia núniniaiti. Ashí murik jímiampramu chikichkisha petsachuka ániuitme.

³ Ame wenuchirmeka jiu kapa̱a̱kua ániuiti. Tura ame chichamchirmesha shíirmachiti. Ame jí̱chirmeka tsatsapchiji̱a̱i̱ nukumásam kranatu nakakma núnis yapichirmeka mái̱ tsamapkarin áiniawai.

⁴ Ame kuntujchirmeka Tawitnia kumpin je̱a̱ meset naṉki ikiutai̱ je̱a̱mma núniniaitme. Nui̱ mir tantar nétuiniawai. Nu tantarsha ashí kakarmanu áiniawai.

⁵ Ame mái̱ muntsuchirmeka japa uchich jímiampramua núniniaiti. Ririu kuku̱j irunmanum matsatainiawai.

⁶ Tsawa̱a̱mam tura káshisha meṉkamam mira kuṉkuin naintnium wétatjai tura ekemátai̱ kuṉkuin muranam wétatjai.

⁷ Winia amikrua ámeka mash shíirmachitme. Amiinkia nuakmarmesha atsawai.

⁸ Nua̱ru Ríwianunmaya̱ wiji̱a̱i̱ wemí, Ríwianunmaya̱ mái̱ métek wemí. Amana muranmaya̱ tura Senir tura Irmun mura tímianaisha íimsakia. Úunt ya̱wa̱ matsamtai̱ ainia nuyá̱ tura yampiṉkia naint ainia nuyá̱ íimsata.

⁹ Winia ekentru, winia nua̱chiru ame chikichkí írsamuja̱i̱ṉ kajinmatkichmin awajtúsume. Nuyá̱ ame nuṉkutai̱rmi chikichik sháukrumji̱a̱i̱ṉᵏ winia enentái̱rka aminí̱ṉ aminí̱ṉ enentáimtikrame.

¹⁰ ¡Ame aneṉkrattairmesha timiá shíirmachish ainia umaru winia nua̱ru! Ame aneṉkrattairmeka wíniuja̱i̱ tura ame kuṉkuintrumsha ashí mashⁱ kuṉkuin ainia núja̱i̱ṉkia naṉkaamas kuṉkuakuitme.

¹¹ Maa nua̱chiru wenumíya̱ṉka míshik jíiniawai. Ame iniaimi wakenmari̱nkia míshik múntsua tímianu áiniawai. Ame pushirmi kuṉkunti̱ṉkia Ríwianu kuṉkunti̱ya̱ tímianaiti.

¹² Winia ekentru, aja araar wénuir eṉkeamua núniniaitme nua̱ru. Púkuni epentkar asakamua núniniaitme. Yumirmat akiramuitme.

¹³ Tura ámeka munchí ataksha je̱e̱r miniarchin nerea áintsaitme. Tura arjinia kuku̱ji nuyá̱ nartu kuku̱ji kuṉkúa núniniaitme.

¹⁴ Tura nartu, asaprán tura kuṉkuin káramu, ishpiṉsha tura ashí numi kuṉkuin ainia nu, ekemátai̱ kuṉkuincha, mírasha nuyá̱ aruí tura ashí kuṉkuin tí peṉker áiniana núniniaiti,

¹⁵ Aja ukattai̱ púkuni táurmanum entsa puka puka ajana núniniaitme. Ríwianunmaya̱ entsa waana núniniaitme.”

Nuwa̱ áishmaṉkan aujma

¹⁶ “Araki̱a̱ naseá shintiarta tura nuṉkaani̱ya̱ naseá ju̱i̱ winitiárum. Túram winia ajaruí̱ umpuim kúṉkuṉ awajiarta. Winia aneamurka ni ajarí̱n tati tura nere yumin ainia nuna yuatí.”