Anen. 3 - Yus Papí: Shuarja̱i̱ Yus Yamaram Chicham Najanamu

Nuwa̱ jiinkí̱ áishmaṉkan e̱a̱mu

¹ “Tuke kashi winia peakrui̱ winia wakaniur aneana nuna e̱a̱kmajai. E̱a̱knasha wáinkiachmajai.

² ‘Túran chichaakun yamaikia wajaki̱n péprunam téntakan iistajai tímiajai. Jintiá áintianash tura páasanmasha’ e̱a̱ktájai winia wakaniur aneana nuna e̱a̱knasha wáinkiachmajai.

³ Péprun téntak iin wáitkiarmai tura chicharainiakun ‘¿Winia wakaniur aneana nu wáinkiachurmek?’ tiármajai.

⁴ Ishichik niin náṉkasarnak winia wakaniur aneana nuna wainkiamjai. Tsékeṉkin peemprukan akupkáchmajai. Jukin winia nukuru je̱e̱n awayá̱mjai. Winia nukur takursámia nui̱ ejemajai.”

Áishmaṉ Jerusaréṉnumia̱ nawantan tama

⁵ “Jerusaréṉnumia̱ nuwa̱ch natsatirmin japa kampunniunam írunu tura japa yamatskam pachisan nekas umiktatjai tákurminkia ju̱na seajrume. Nekas aneṉkratma tsawantri̱ jeamam wáurmamtikiairap tura aneṉkrattairi̱ ishintiátrairap.”

Jerusaréṉka natsach kantamáwarma

⁶ “¿Yait kampunniunmaya̱ mukuintiua núnin mira kuṉkuinniasha tura chíkich kuṉkuinniasha tura ashí ju̱yu̱mpátin kuṉkuinniasha mukuintiuki̱ waakna ausha?

⁷ Nuá iisiana, Saramúṉ eṉkear aents yanakí̱ jútai̱nti. Sataintia kakaram ainia nu Israernumia̱ kakaram ainia nuna téntatkarai.

⁸ Ashí uunt puya̱n takaru mesetan iwiarnatkaru áiniawai. Káshikia sápij asamtai aṉkant aṉkant ni uunt puya̱ri̱n makunam peeáru áiniawai.

⁹ Úunt akupin Saramúṉka Ríwianunmaya̱ tí peṉker numiji̱a̱i̱ apujsar yanakí̱ jutai̱n najanamuyi.

¹⁰ Eṉkea jutai̱ pauchiri̱nkia jirú kuitji̱a̱i̱ najanamuyi. Atumtai̱ri̱nkia kúrik najanamuyi. Tura pujutái̱ri̱ṉkia yamákáiji̱a̱i̱ tarach ti kuitji̱a̱i̱ najanamuyi. Jerusaréṉnumia̱ natsach eṉkea jutai̱ initri̱nkia aneṉkrattaiji̱a̱i̱ ti shiir awajsarmiayi.

¹¹ Seúnnumia̱ nuwa̱ natsachi jíinkikiua túrarum úunt akupin Saramúṉ iiskua. Ni nuatnaiyamu tsawantin nukurí̱ etseṉkrumtikiamia nuna etseṉkrukai. Nusha ni enentáin waramtikiuk nu tsawantin túramiayi.”