Anen. 1 - Yus Papí: Shuarja̱i̱ Yus Yamaram Chicham Najanamu

¹ Jú̱kete imiá shiir chikichja̱i̱ naṉkaamas péṉker kantamtai̱ Saramúṉna.

Anajmarma chichaamu

² “¡Maa ni wene̱ja̱i̱ winiasha mukutanka mákeapi aintia! Nusha wíniuja̱i̱ naṉkaamas ame aneṉkrattairmeka timiá péṉkeraiti.

³ Kuṉkuintrum tí peṉker kuṉkuamna nuja̱i̱ métek ame náarmeka kuṉkuin ukarma tímianuiti. Tuma asaakmin Jerusaréṉka nawantri̱ nuwa̱ natsachisha anenmainiawai.

⁴ Wearkata túrutawakmin wari wemí. Úunt akupniuka ni pujutái̱ri̱n jurukí̱ awa̱intiuáyi.” “Warainiakur ámiji̱a̱i̱sha wararnaisattaji. Wíniuja̱i̱ iniaṉkas ame aneṉkrattairmesha enentáimtittiaji. Tuma asaakminchash timiá anenmainia.”

Nuwa̱ natsach kantamáiniamu Anajmarma chichaamu

⁵ “Jerusaréṉnumia̱ natsatiram wikia tuntutakuitjiai túrasha wakerú ajamaintjiai. Wikia Ketara jutai̱ je̱e̱n mukusattakua nuní̱ íirkaitjiai. Tura Saramúṉka je̱e̱n tarach mukusatka neturma núniniaitjiai.

⁶ Tuntutaku asamtai émamkesam iiru wajaipia. Warí etsa̱sha sukutamai. Winia nukuru uchirí̱sha kajertukar uwa ajarí̱ iruniarmia nunasha waitrukta tusa apujtúsarmai. Tura winia uwa ajarnaka wíniauya núnaka iirmaschamjai.

⁷ Winia wakaniur aneamuru, ¿tui̱mpia muriksha iyam tura tui̱mpia tutupin ai̱sha muriksha matsasmesha ayamtikrattam? nu turuttia. ¿Tuma ai̱sha urukamtia ame tsaníakmaram murikiu wáinin matsatainia ai̱sha wisha páchitkia írara nuniisha wekaitiataj?”

Jerusaréṉnumia̱ natsach kantamáwarma

⁸ “Ashí nua̱chiji̱a̱i̱ apattsa iismasha ámeka nuna naṉkaamas tí shíirmachitme. Nekamachkumsha murik ashintkiamu íikim wetá. Túram murikiu iin pujuinia nuna aakri̱ ayamach chírichri yuáwarat tusam ame chípiurmesha matsatmasta.

Áishmaṉ nuwa̱n áujeamu

⁹ Parauṉka káruri̱n japin kawái shíirmach irunainia nuní̱ iyajme winia amikrua.

¹⁰ Kuishnium akitiai̱ji̱a̱i̱ apatkamsha ame yapichirmesha urutmatsuk shíirmachit. Nuṉkutai̱chirmiji̱a̱i̱ apatkamsha kuntujchirmesha shíirmachikiti.

¹¹ Nuṉkutai̱ kuriji̱a̱i̱ nájateakur jirú kuitji̱a̱i̱ eteṉkrar najatattaji.”

Nuwa̱ chichaamu

¹² “Úunt akupniuka ni atumtai̱ri̱n átutai̱ winia nartu kuṉkuintrusha kuṉkunkamai.

¹³ Winia aneamurka wíji̱a̱i̱ṉkia mira kuṉkuin uyunchiniam eṉkesar winia muntsuruí̱ ajapén ikiusma núnisaiti.

¹⁴ Eṉketi péprunam uwa ajanam arjinia kuku̱ji kuṉkúa núniniaiti winia aneamurka.”

Áishmaṉ nuwa̱n aujma

¹⁵ “Iisiá ju̱á amesha shíirmachitmena winia aneamuru, iisiá tí peṉkerchitmena tura ame jí̱chirmesha yámpitschia nuní̱ íirsaitme.”

Nuwa̱ áishmaṉkan aujma

¹⁶ “Ju̱á iisiá, winia aneamuru amesha urutmá shíirmachitskaitiam tura ti shiir awajú awajmaintme. Ii tepamuri̱ṉkia ii peakrí̱ chírichri tujura núnisaiti.

¹⁷ Sétur numi ainia ju̱ka ii je̱e̱ winiantramua núnis áiniawai. Tura sépris numi kanawenka iin ejatmainiaji.”