Ams. 9 - Yus Papí: Shuarja̱i̱ Yus Yamaram Chicham Najanamu

Yusai̱ya̱ uwemprami tusar ántar túrawartatna nu

^1-4 Uunt Yusan áestutai̱niam wajan wainkiamjai. Tura Nisha chichaak “Uunt Yusa Je̱e̱ pauri̱ yakini̱ awatim aents matsatainia nuna muuké̱ tsai̱ tsai̱ awajsarta. Túrawakmin nu aentsun Wi amú amú awajsarmatai yaaksha uwemprachartatui. Tui̱ṉsha ú̱mkarmataisha nui̱sha wáinkiartatjai. Nayantsanmasha init ú̱mkarmataisha napin akuptúkan áesiartatjai. Achirar yajá yaruakarmataisha nui̱sha puya̱ja̱i̱ mámtikiawartatjai. Wini̱ya̱ṉka peṉké úmkachartatui tuma asamtai kajerkaru asan aya yajauchiniak akuptúkartatjai” turutmiai.

^5-6 Ashí Akupniu Uuntri̱ Uunt Yus nuṉkan antiṉmatainkia ashí miniainiawai túrakui ashí nuṉkanmaya̱ aents útainiawai. Nu arantcha nuṉkasha Ejiptunam Niru entsa nujaṉkrua ku̱yu̱ana núniktatui. Núnisaṉ pujustintri̱n nayaimpiniam je̱a̱meak tépakmari̱ṉkia nuṉká áeprawai tura nayantsaja̱i̱ ashí nuṉkan ukatea nuka Úunt Yusaiti.

Yusa asutkiari̱ya̱ṉka Israerka uwemprashtatui

⁷ “Maa Israer shuará, Wi íismaka atumsha Itiupíanmaya̱ aentsu uchiri̱yá ¿ániuchukaitrum?” tawai Uunt Yus. “Warí Wíkichuk Israer shuarnasha Ejiptunmaya̱ ¿ji̱i̱rarmaj tura Jiristíu aentsnasha Kapturnumia̱ jí̱i̱rcharmakiaj núnisnak Sírianmaya̱ aentsnasha Kírnumia̱ jí̱i̱rcharmakiaj?” tawai.

Israerka Yusa asutkiari̱ya̱ṉka pisarchattui

⁸ Kame Ii Uunt Yusri̱ chichaak “Ju̱ yajauch akupeamunka suir iinia asan mash amú amustatjai. Túrasha Jakupa shuari̱nkia máshikia amukchartatjai” tawai Uunt Yus.

⁹ “Tura Israer shuarnaka chíkich chíkich nuṉkanam pujuinia núnaka chikichkiksha meṉkaka̱i̱ṉ tusan trikiu chikichkisha nuṉká akaketsuk tsatsamátniua ímiatrus tsatsámnátⁱ tusan akupkartatjai.

¹⁰ Túrasha wi shuar yajauch túrin ainia nu chichainiak ‘Iini̱ṉkia itiurchatka atsuttawai’ tuinia nusha puya̱ja̱i̱ mantamnawartatui.

Jutá tura Israer ataksha iwiarnartin

¹¹ Nu tsawant jeatta nui̱ṉkia Tawitia Yusa Je̱e̱n já̱a̱rar emestukma nuna ashí péṉker iwiarkattajai. Túran yaunchu amia tímiatrusnak awajsattajai.

¹² Nuyá̱ Etum nuṉkanam juákarusha tura ashí nuṉkanmaya̱ aents Winia náarun shiir awajena nu Tawit shuarja̱i̱ pachintrartatui. Ju̱na túrana nú Uunt Yus jú̱nis tawai.

¹³ Kame nu tsawantinkia tríkiun arakí̱ wéaná nu juwana nuna amayá̱ṉtatui. Tura uwa yumiri̱n ijiurainiai̱ chíkichkia jiṉkiain juuk arakmattsa wéana nuna amayá̱ṉtatui. Naintia̱ yamaram winiu akaikiartatui. Tura naintiar naintiar ainia nusha tsai̱trartatui.

¹⁴ Israer shuar chíkich nuṉkanam achira yaruakmancha awakearartatjai. Túram ataksha yaunchu emeskamuya̱ nuna iwiarar matsamsartatui. Tura takakmasar yurumkancha tura uwa ajancha takakainiak yurumkari̱sha tura umartintri̱sha peṉké táatsachartatui.

¹⁵ Tura ní nuṉke̱ni̱ṉ Wi súsarmiaj nui̱ṉ matsasártatjana nuya̱ntka peṉké achirar yaruakma áchartatui” nuní̱ tíniuiti Uunt Yus. Amus tu áarmiayi.