Ams. 7 - Yus Papí: Shuarja̱i̱ Yus Yamaram Chicham Najanamu

Itiur emesnartata nu ímiaja̱i̱k menaint wainma

¹ Uunt Jiuwá ímiaja̱i̱k ju̱na iniaktursayi. Tura ju̱ nekaata, kame árak juukma ataksha yama tsapainiamunam Niṉkia titikriátsan pampamtikmiayi. Tura ju̱sha nekaata, nu araksha émka júukmaka úunt akupin susamu ámanum ataksha yama tsaparmai.

² Nuṉkaya̱n ashí arakan yuá amukármatai wi chichaakun “Uunt Jiuwáa waitneasam tsaṉkurarta. Warí, Jakupa shuari̱n ¿timiá ishichkincha yaki ikiakárat?” tímiajai.

³ Nuyá̱ Jiuwaka ené enentáimia ajas chichartak “Nuka túrunashtatui” tíniuiti Jiuwá.

⁴ Uunt Jiuwá ju̱na iniaktursamai. Maa Uunt Jiuwaka asutkiartuattsa jinia untsumai. Tura jikia náṉkatkachu wa̱a̱n amuk nuṉkancha anu amukmai.

⁵ Túrunamtai chichaakun “Uunt Jiuwáa, waitneasam wajasakta. Warí, Jakupa shuari̱n ¿timiá ishichkinkisha yaki ikiakárat?” tímiajai.

⁶ Nuyá̱ Jiuwaka ené enentáimia ajas chichaak “Ju̱nasha nútiksanak peṉké túrashtatjai” timiai Uunt Jiuwá.

⁷ Nuya̱ṉka ju̱nasha iniaktursamai. Jiru netuar wénuk naka najanamunam ayam Uunt wajamai. Kame kayaja̱i̱ je̱a̱min je̱a̱n je̱a̱mainiak netuar naka awajtai̱n uwejé̱n takakuyi.

⁸ Tura Jiuwá chichartak “Amusá ¿warí wáiniam?” túrutkui wi chichaakun “Kayaja̱i̱ je̱a̱min nenaar naka je̱a̱mtain wainjiai” tímiajai. Tutai Uunt chichartak “Pai, je̱a̱ je̱a̱min netúa naka awajtai̱ji̱a̱i̱ Wi shuar Israeran nekapmán íistatjai. Ju̱ya̱ṉka chikichik tunaankesha asuttsukka peṉké iniaṉkatkishtatjai. Ams. 1:6

⁹ Isaka nuṉké̱ mura ainia nusha emesnarartatui. Tura Isaka shuari̱ ántar yus enentáimtakur aestutairi̱ncha emestukaran Israernum Yus Shiir Awajtai̱ Je̱a̱ ainia nunasha jú̱nik awajsattajai. Tura úunt akupin Jirupuáma shuari̱ṉkia puya̱ja̱i̱ amukártatjai” turutmiai Jiuwá.

Amus Amasíasan timia

¹⁰ Amasías Pitirnumia̱ yúsnan takarin Israer shuara akupniúri̱ Jirupuáman chichaman akuptak “Amussha Israernum ame akupniuitmena nuna wait chichamja̱i̱ anaṉkramui. Kame ni étserna nuja̱i̱ ju̱ nuṉkasha katsuntrachmin nekaprayi.

¹¹ Warí Amus jú̱nis chichaawai ‘Jirupuámka puya̱ja̱i̱ mantamnattawai tura ashí Israer shuarsha achiniar yajá junakiartatui’ tawai” tímiayi.

¹² Nuyá̱ Amasías Amusan chicharuk “Yúsnan etserniu Jutanam pisaram Yusna étserkum nui̱ yurumúta,

¹³ nu arant Pitirnumka peṉké etserki̱ weep. Warí ju̱i̱ṉkia akupniu pujutái̱ri̱nti tura nekas akupin pujutainti” tímiayi.

¹⁴ Tura Amus Amasíasan aya̱k “Wikia Yúsnan etserniuitjiai tura Yúsnan etserniu uchirí̱ntjiai tátsujai. Antsu wikia waaka wáinniuitjiai tura kampunniunmaya̱ ikiu nere̱n arakmawitjiai

¹⁵ túrasha waaka wáinin ai̱ṉ Jiuwá chichartak ‘Ju̱ya̱ṉka weme Israer shuar Wi shuar ásarmatai Winia chichamur ujakárta’ turutniuiti.

¹⁶ Túrasha Jiuwáa chichame̱ antukta ‘Ámeka Israer shuar Isaka we̱a̱tri̱ ainia nuna asutniátniuri̱ṉkia etserkaip’ túrutme.

¹⁷ Túrasha Jiuwá jú̱nis tawai ‘Ame nuwemka péprunam tsanirmatai̱ nuwa̱ ajastatui tura uchirmeka núnisaṉ nawantrumsha puya̱ja̱i̱ mantamnawartatui. Tura nuṉkemniaka nakurúsar awakmakarua nu nakarár jurutrámkiartatui. Núnismek ámeka Yusan nékachu matsatainia nuna nuṉke̱n jakattame. Tura Israer shuarka chíkich nuṉkanam yajá junakiartatui’ tawai Yus” Amus tímiayi.