Ams. 6 - Yus Papí: Shuarja̱i̱ Yus Yamaram Chicham Najanamu

Anairam ántichu ainia nu túrunawartin

¹ Seuncha tura Samariasha ashí nuṉká naṉkamantua ímianu enentáimtumatsrumeash. Maa pepru uuntri̱ Seúnnum ti shiir pujuinia nusha tura Samaria naintnium aṉkant matsatji tu enentáimtumainia nui̱ Israer shuar ni yaintmaktatji tusar wena nú uuntka aneararti.

² Warí emka Kárniniam wéarti nuyá̱ naṉkamantu Amatnum nuyá̱ Jiristíu aentsu pépruri̱ Kaata nui̱ wee íimsarti. Wats ¿ni nuṉke̱ya̱sh ju̱ nuṉka ainia nuja̱i̱ naṉkaamas péṉkerak ainia?

³ Átumka wáitsatin tsawant wau jeastatui tárume túrasha átum túrarumna nuja̱i̱ wáitsatin tsawantka tíjiu̱ch ajatrámprume.

⁴ Núnisrumek muriksha peṉkeri̱ tura waakasha unuekma yuarme. Tura kánakrumka peak tí peṉker márjirja̱i̱ najanamunam kánarme. Nuyá̱ áyamkurmesha kutaṉ tujurnum áyamearme.

⁵ Tura saasarpat umpuiniaitrume, Tawit umpuiniuya tímiatrusrum umpuartai tusarum.

⁶ Wíniusha tsapa ti úuntnum úmarme tura kuṉkuincha tí peṉker ainia nuja̱i̱ ukatmamprume. Tura Jusé shuari̱ weasha tí itiurchatnum pujakuisha ishitkisha kúntutska nekapeatsrume.

⁷ Tuma asamtai yamaikia atumniaka achirmárar yajá emká juramkiartatui. ¡Nuya̱ṉka átum nampekar waratáisha atsuttawai!

⁸ Uunt Jiuwá nekas túrattajai tusa Niṉki pachimias chichakuiti. Jiuwá Yus Nayaimpinmaya̱ Suntara Uuntri̱ chichaak “Jakup shuar ti naṉkamantu ajasáruiti túrasha núnaka peṉké muí̱jiajai. Ni akupniuri̱ je̱e̱ncha muí̱jiainiajai tura asam ni pépruri̱ncha tura nui̱ ashí irunainia nunasha ni nemasri̱n íktusan iniaisartatjai.”

⁹ Tura je̱á̱ iwiaaku tiáskesha, aents juákarsha núnisaṉ tias jákartatui.

¹⁰ Wats, aents ni shuari̱ jakamtai a̱a̱ ji̱i̱ki̱ ekemak ukunchi̱n ju̱yu̱ awajtústaj tusa pujurmin aatú wajan “¿Chikitcha ámiji̱a̱i̱ pujawak?” tutai “Atsá” takui̱ “Takamáttsata Jiuwá náari̱nkia pachikchatniuiti” títiatui.

¹¹ Kame ju̱ nekaata, Uunt je̱a̱nka yumpuartinian tura uchich je̱a̱nka emeskatniun Jiuwaka akupkaiti.

¹² Wats ¿kaya sáisaintniunmasha kawái tsékeṉminkiait? ¿Tura nui̱sha waakaja̱i̱sha pukuimniakait? Kame túrachmin ai̱sha ¿urukamtai átumka péṉker túrutai̱nkia tséasmatkiakrum tura naka túrutai̱sha yapá nútikiarum aents wáitkiarum?

¹³ Átumka peṉké ántar nuja̱i̱ waratsrumek. Tura chichaakrum “¿Iikia ii kakarmari̱ji̱a̱i̱ṉchak kakaram ajasáruitiaj?” tátsurmek.

¹⁴ “Tuma asamtai yamaikia Israerá,” Jiuwá, Nayaimpinmaya̱ Suntari̱ Uuntri̱ Yus chichaak “Amata wá̱i̱ti̱a̱i̱ri̱ya̱ juárkin Arapá entsa tímianai atumín wáitkiarmasarat tusan chíkich uunt nuṉka mátsatkamun Wi itiartiatjarme” tíniuiti.