Ams. 4 - Yus Papí: Shuarja̱i̱ Yus Yamaram Chicham Najanamu

Ántichu nuwa̱ túrunawartin

¹ Pasannumia̱ waaka nuwa̱ Samaria náintri̱n matsatearmena tura kuítrincha núnisaṉ atsumainia wáitkiarmena núnisrumek atumí aishri̱ chichareakrum itiatárum umararmi tárumna nútiram ju̱ chicham antuktarum.

² Ashí Uuntri̱ Uunt Yus Tunaarincha asa Niṉki pachimias nekas túrattajai tusa chichaak “Nekaatarum. Tsawant jeawartatui. Átumka tseṉkenja̱i̱ tura atumí uchirí̱ṉkia tsauja̱i̱ awaṉtukar yarumma ántsarum wétatrume.

³ Áṉkamunmaani̱ pátanais pátanais ajasrum jiintrakrumin Irmun náinniumaani̱ akupnáktatrume” tíniuiti Uunt Yus.

Asutiak Israer shuaran yáiṉcharma

⁴ Uunt Yus wishikmai chicharainiak “Pitirnum werum yajauch túrakrum Jirkarnumsha nu arant tunáa túrutarum. Nuyá̱ káshik áestuatin ikiankarum tuke menaintiú tsawanta nui̱ tiásnumia̱ chikichik akankarum suutarum.

⁵ Paṉ karin eṉketámu yúmiṉkiakur áestutai̱ya̱ nútiksarum áestuatarum. Túrarum ii enentáimsarik Yus súsatniua nu susatarum tusarum étserkuram kakantrarum charáa charáa ajatarum. Warí Israer shuartirmeka nu wakeriniaitrume” tawai Ashí Uuntri̱ Uunt Yus.

⁶ “Wikia yurumkachuja̱i̱ ashí péprunam apujsamjarme túrasha Winia peṉké enentáimtursachurme.

^7-8 Júuktincha menaintiú nantu táasmanum yumincha yútumtikiachmajai jú̱ni̱ṉkia yútumtikiun atumínkia yútumtikiachmajai. Tura yumi yutukchamunmaṉka nuṉka ju̱ju̱karmai. Núnisaṉ entsa umartai tusar aentssha chíkich péprunmaya̱ chíkich péprunam ashiniarmai túrasha kitiakéncha imikcharmai tura nuya̱sha Wíniaka peṉké enentáimtursacharmai” tawai Uunt Yus.

⁹ “Tura atumí ajarí̱ncha úwancha íkiuncha núnisaṉ uriwiuncha tsue̱r mayai̱ji̱a̱i̱ titikriátsan akuptúkan emestukmiajrume. Túrasha Wíniaka peṉké enentáimtursachmarme” tawai Uunt Yus.

¹⁰ “Núnisnak Ejiptunam túramiaj nútiksanak suṉkurnasha akuptúkmajrume. Tura atumí natsa̱a̱rí̱ṉkia puya̱ja̱i̱ kajeṉkármajai. Atumí kawairi̱ṉkia achirárma arma nui̱ tura atumí matsamkamuri̱n meje̱nasha mayatkamarme. Kame núja̱i̱sha peṉké enentáimtursachmarme” tawai Uunt Yus.

¹¹ “Sutuman tura Kumuran Yus emeskamia áitkiasnak atumniasha emeskamjarme núnisnak ji tsutsutkamu jusamua nútikiamjarme túrasha Winia peṉké enentáimtursachmarme” tawai Uunt Yus.

¹² Tuma asamtai yamaikia Israera ame Yúsrum túrutmattana nu Israera Yusrumji̱a̱i̱ wainniaikiatin iwiarnatrata.

¹³ Warí náintniasha nasencha najanniua nuka Ni enentáimmiari̱n áentsui̱ni̱ paant awajna ántsaṉ kiritniuncha atsa̱we̱a̱ nu tura naintia tsakari̱n tarimpraktak wekainiua nuna náari̱ṉkia Ashí Akupin Úunt Yusaiti.