Ams. 3 - Yus Papí: Shuarja̱i̱ Yus Yamaram Chicham Najanamu

Yúsnan etserin Amus étserma

¹ Ashí Israer shuartirmin Ejiptunmaya̱ juramsamiarmena nútirmin Jiuwá átum asutniátniun túramprumna jú̱ chicham antuktarum.

² “Ashí nuṉkanmaya̱ja̱i̱ naṉkaamas imiankaska atumniak eteṉmasan anaikiaitjiarme. Túrasha atumí tunaari̱ni̱ṉ asutiáttajrume” tawai.

³ Wats jimiará aents mái̱mtek nu enentáiniak enentáimiainiachkuṉka tsaniṉ ¿wekaasamniak ainia?

⁴ Kame úunt ya̱wa̱ kampunniunam ¿yukartutskek júrur ajawit? Núnisaṉ úunt ya̱wa̱ uchirí̱ wá̱a̱nam júrur ajainiak namaṉke̱n akasmatainiachkuṉ ¿tiniu ainia?

⁵ Tura nanamtincha e̱a̱mniua nu tukachmaka nuṉká ¿iniarminkiait? Núnisaṉ netuamu kuenak ántraṉkek ¿kuenainiait?

⁶ Ántsaṉ péprunam kachun umpuararmatai aents ¿sapijmiakchartatuak? Wats péprunam itiurchat naṉkama nuka Jiuwá ¿túrachmakait?

⁷ Warí ii Uuntri̱ Jiuwaka ni takarniúri̱ Yúsnan etserin ainia nuna paant ujatskeka nekaachminia nuna túrichuiti.

⁸ Úunt ya̱wa̱ júrur ajakui ¿yaki ashamkachaint? Núnisaṉ ii Uuntri̱ Jiuwá winia chichamur etserkata tákuiṉkia ¿yaki etserkachaint?

Samaria emeskatin etserkamu

⁹ Astutnum tura Ejiptunmasha akupin pujutai̱ je̱a̱ ainia nui̱sha chícham étserkuram jú̱nisrum titiarum “Naint Samarianam írunna nui̱ waká iruntrarum túrarum aents náṉkamas iruntrar ti itiurchat ajainiak chikichnasha ti wáitkiainiana nu iistarum.

¹⁰ Péṉkernaka túrichu áiniawai. Awakmakar ata̱rma ainia núnaka ni je̱e̱n irumainiawai” tíniuiti Jiuwá.

¹¹ Tuma asamtai Jiuwá ii Uuntri̱ tíniuiti “Atumí nemasri̱ṉkia tuyá̱ tuya̱ṉsha káutramkattarme. Túrawar pepru wenuke̱ iwiarkar utúachmin awajsamu ainia núnaka emesturmakar tura úunt akupniu je̱e̱nka juu juu aya jú̱nik awajsártatui.

¹² Israer shuar Samarianam peak péṉker iwiarkamunam pujuiniaka murikiu jimiará makuin núja̱i̱nchuka kuishi̱ tsakari̱n úunt ya̱wa̱ apakun murikiu wáinin ata̱i̱nia núnisar pisarartatui” tú tíniuiti Jiuwá.

¹³ “Antuktarum tura Jakupa shuari̱ makuntraratⁱ etsertuktarum” tíniuiti Nayaimpinmaya̱ Suntara Uuntri̱ Jiuwá.

¹⁴ “Kame Israer shuar Yusan nakitín ántichun asutiáwartataj nu tsawantinkia Pitirnum najankamu yus aestutai̱ ainia nunasha emeskartatjai. Túram aestutai̱ kachurí̱ncha kupiraram nuṉkáa utsanawartatui.

¹⁵ Yumí je̱a̱sha esat je̱a̱ja̱i̱ métek emesnakartatui. Tura márjirja̱i̱ tí shiirmach je̱a̱mkamu irunainiana nunasha emesnakartatui. Untsurí je̱a̱ emeskamu ártatui” tíniuiti Jiuwá.