2 Tis. 2 - Yus Papí: Shuarja̱i̱ Yus Yamaram Chicham Najanamu

¹ Tura yatsuru, ii Uuntri̱ Jesukrístu tátatna nuna tura Niji̱a̱i̱ iṉkiunaiktatjinia nunasha ujaktinian wakerajrume.

² Chíkich shuar anaṉkramawar “Uunt Jesukrístu tsawantri̱ jeayi” tu ujatmáktaj tusar wakeruiniawai. “Íimiarmaj nuja̱i̱ nékajai” turamainiakuisha “Chícham étserman antukmaj nuja̱i̱ nékajai” turamainiakuisha tura “Papru papí áarmari̱ nuna takui̱ nékajai” turamainiakuisha páchim enentáimprairap. Tura sapijmiakairap tusan seajrume.

³ Peṉké anaṉnawairap. Nekaatarum. Nu tsawant jeatsa̱i̱ṉ Yusai̱ya̱ kanaktin átatui. Tura nú arant, Tuke Tunaarintin, emesnartatna nu wantinkiattawai.

⁴ Nisha aya wíniak enentáimtursarat tusa wakerak najankamu yusnasha tura nekas Yúsnasha shuar tikishmátrara̱i̱ṉ tusa ti nakitrattawai. Niṉki tí naṉkamantu enentáimtumas Yusa nuke ajas Uunt Yusa Je̱e̱n wayá̱ pujustatui. “Ju̱i̱ti Yus” shuar turutiarat tusa mash túrittiawai.Tan. 7:25; 9:27; 11:31; 12:11; Mat. 24:15; Mar. 13:14-23

⁵ Yatsurtiram, wi atumji̱a̱i̱ pujakun nuna ashí ujakmajrume. ¿Nuka kajinmakniurmek?

⁶ Yámaikikia ni tsawantri̱ jeatsa̱i̱ṉ, Tuke Tunaarintin wantinkia̱i̱ṉ tusa surimia nu nékarme.

⁷ Tunaasha yamaisha awai, tura paantcha. Túrasha tunaan surimia nu juramkitniuk taasai nu tunaaka paant átin.

⁸ Nui̱ṉkia nu Tuke Tunaarintin wantinkiattawai. Tura Uunt Jesus ni wene̱ja̱i̱ umpuí aun máattawai. Tara ni winchari̱ji̱a̱i̱ nuna amuktatui.

⁹ Nu Tuke Tunaarintin, iwianchi uuntri̱ Satanás akupkam tátatui. Ni kakarmari̱ iniakmastaj tusa aentsti túrachminian túrak anaṉkawartatui.

¹⁰ Jinium wémin ainia nú shuaran ashí tunáa ana nuja̱i̱ anaṉkawartatui. Nu shuar Yus Chichaman nekas ana núnaka nakitraru ásar uwemprachmin áiniawai.

¹¹ Iis, nekas ana nuna nakitia ásarmatai ti anaṉmamawar wait chichaman umirkarat tusa Yuska tsaṉkatkattawai.

¹² Warí, nisha ni tunaari̱n wararainiak nekas ana nuna nakitraru ásarmatai Yuska “jinium wétatrume” nuna tiártatui.

Uwempramin ainia nu

¹³ Tura yatsuru, Uunt Jesus aneamu árumna nu iisha atumín enentáimtusar ii Yusri̱ yumiṉsaji. Átum nekas ana nuka umikiurme. Tuma asakrumin Yusa Wakaní̱ atumí enentái̱n péṉker awajtámsaitrume. Nu tuma asamtai yámankamtaikniumia̱ Yuska “átum uwempramniaitrume” túramprume.

¹⁴ Nu túrunat tusa Yus wakerutmarme. Krístuja̱i̱ uwempratin chicham ii ujakjinia nuja̱i̱ Yus untsurmakmarme. Ii Uuntri̱ Jesukrístu tí peṉker pujana nui̱ pachinkiamniuram tusan nú chichaman ujakmajrume.

¹⁵ Wátsek, yatsuru, Yusja̱i̱ katsua̱rtarum. Yus Chicham etserkamu antukurmena nu tura wisha áaran akuptúkjarmena nusha kajinmátkirap.

¹⁶ Ii Uuntri̱ Jesukrístusha tura ii Aparí̱ Yussha tí peṉker ásar iincha anenmatsjik. Tura waitnentrama ásar iincha shiir enentáimtikramji. Tura nú naṉkaamas ii tuke péṉker pujustinian ikiurtámsaitji.

¹⁷ Nu tuma asamtai péṉker chichastarum tura péṉker takastarum tusa Jesukrístuka shiir enentáimtikramar ikiakátmararti.