2 Tis. 1 - Yus Papí: Shuarja̱i̱ Yus Yamaram Chicham Najanamu

¹ Wikia Pápruitjiai. Wisha Serpanuja̱i̱ tura Timiutéuja̱i̱ iruntran atumín Tisarúnikianmaya̱ Yus shuar árumna nuna ju̱ papin áatjarme. Atumsha ii Aparí̱ Yusna tura Uunt Jesukrístunu ajasuitrume.

² Tuma asakrumin ii Aparí̱ Yus tura ii Uuntri̱ Jesukrístusha waitnentrama ásarmatai aṉkant awajtámsarat tusan wakerajrume.

Tunáa shuaran Yus asutmia

³ Yatsuru, átum péṉker matsatu asakrumin iisha Yus tuke yúmiṉkiaji. Átumka Yus nekas enentáimtustin nú nukap nekaakrum wéarme. Tura nuamtak anenaistincha nú nukap nékarme. Nu tuma asamtai Yus yumiṉsatniuitji.

⁴ Átum Yus shuar asakrumin chíkich shuar atumín yajauch awajtámainiawai. Tura itiurchat wainiu asarum tí waitiarme. Nu tuma ai̱ṉ átumka katsuntearme tuke Yus enentáimta asarum. Nu tuma asakrumin iisha Yus shuar matsatainia nuka warasar ujainiaji.

⁵ “Yusa akupeamuri̱n pachinkiamniaitrume” Yus túramprume. Nui̱ pachinkiataj tau asarum ju̱ nuṉkanam wáitiarme. Tura wáitiakrumsha nuna naṉkaamas iwiarnaruitrume nui̱ pachinkiatin. Kame núja̱i̱ṉkia Yus atumín achirmak péṉker túraiti, nuka páantaiti.

⁶ Núnisaṉ atumín wáitkiarmainia nunasha Yus tímiatrusaṉ wáitkiasartincha nekas péṉkeraiti.

⁷ Tura wáitiarmena nusha Yus íiji̱a̱i̱sha ayamtikramprartin péṉkeraiti. Ii Uuntri̱ Jesukrístu ji keana ímianisaṉ kakaram suntari̱ji̱a̱i̱ nayaimpinmaya̱ tara wantinkiamtai nu tsawantai̱ Yus ayampratniun suramsartatji.

⁸ Tura nú tsawantai̱sha Yusan nékainiatsna núnaka ii Uuntri̱ Jesukrístu Uwempratin Chichame̱n uminiatsna nunasha ti asutiátajtsa tátatui.

⁹ Nisha taa, nú aentsun peṉké játsuk tuke iniaitsuk emeskartatui. Jesukrístu pujana nuyá̱ jí̱i̱rarma ásarmatai Ni ti wincha kakarmarí̱ya̱ atsana nui̱ akupkartatui.

¹⁰ Kame Uunt Jesukrístu tátin tsawantri̱ jeamtai ni shuari̱ nekas enentái̱ji̱a̱i̱ péṉker awajsaru ainia nu, ni náari̱n shiir pachisartatui. Tura Yusan umikiaru ásar ti shiir enentáimsar Jesukrístun íisartatui. Ii ujakmajrumna nu antukrum umirka asarum atumsha nui̱ pachinkiattarme.

¹¹ Nu tuma asamtai ii Yusri̱n atumín tuke áujtajrume. Yus atumín achirmákuitrume. Nui̱ṉkia Yuska atumí enentái̱n takas Ni wakera nuja̱i̱ métek awajtámsati, taji. Yus umirka asarum péṉker wekasataj tusarum wakerarme. Túrarum Yus enentáimtusrum péṉker túratin wakerarme. Tura wakerarmena nu umiktin Yuska ni kakarmari̱ji̱a̱i̱ yaiṉtí, tu áujtaji.

¹² Átum péṉker wekasa asakrumin chíkich shuarsha ii Uuntri̱ Jesukrístu náari̱n naṉkamantu enentáimtusartatui. Nusha auka ii Yusri̱ tura ii Uuntri̱ Jesukrístu waitnentáimturmasar péṉker wekasatniun yáintmakui túrarme. Túramtai chíkich shuar shiir enentáimturmasartatui.