2 Tim. 2 - Yus Papí: Shuarja̱i̱ Yus Yamaram Chicham Najanamu

Kakaram ajasta

¹ Amesha, uchiru, Jesukrístuja̱i̱ tsaniṉkiu asam Yus amasma nuja̱i̱ kakaram ajasta.

² Untsurí ántuiniamunam wi etserkamaj nu, shuar umikmin ainia nuna jintintiáwaram chikichnasha jintintiáwarat tusam akupkarta.

³ Ame tí peṉker Jesukrístu suntari̱ asam wáitsatin katsuntrata.

⁴ Suntarka ni uuntri̱ tana nunak umiktin asa chíkich takatan pachintiukchatniuiti.

⁵ Núnisaṉ nakurincha nakurústinia nuja̱i̱ métek nakurachkuṉka nekas péṉkeran awakmakun súsatniua nuna achikchamniaiti.

⁶ Ataksha núnisaṉ shuar ajan takaana nu, ashí shuara naṉkaamas nuya̱n yúashtinkiait.

⁷ Wats, ju̱ menaintiú métektaku chicham áiniawai. Péṉker enentáimtakmin ii Uuntri̱ Kristu paant awajtúrmastatui.

⁸ Jesukrístu jaka nantakmia nu enentáimprata. Tura Uunt akupin Tawit ni we̱a̱tri̱ asamtai Jesussha úunt akupin átiniaiti. Núiti wi uwempratin chichaman étsereaj nu.

⁹ Nuna étsereakun sepunam jiruja̱i̱ jiṉkiamu pujakun wáitiajai. Túrasha Yus Chicham jiṉkiachminiaiti.

¹⁰ Ashí shuar ni shuari̱ ártí tusa Yus achikiárua nuna yáiṉtajtsan ashí itiurchatan katsunteajai. Nuja̱i̱ Jesukrístuja̱i̱ tsaniṉkiaru ásar uwemprar tuke shiir pujusártatui Yusja̱i̱.

¹¹ Ju̱ imiá nekasaiti, Jesukrístuja̱i̱ jákaitkiurkia Níji̱a̱i̱sha tuke iwiaaku pujustatji.

¹² Wáitiakrisha Niji̱a̱i̱ akupkáttaji. Natsantakrinkia Nisha natsantramprattaji.

¹³ Umichuitkiurnisha Niṉkia tuke uminiaiti. Warí, Yuska ni enentáimmiaja̱i̱ṉ yapajniátsuk tuke umiktiniaiti.

Yusai̱ natsa̱a̱ra̱i̱j tusam ashí túrata

¹⁴ Shuar jintintiakum ju̱ enentáimtikrata. Ii Uuntri̱ Yus íimmianum chichamja̱i̱ yajauch tunaiyara̱i̱ṉ tusam chicharkarta. Nu tunaitin peṉké antraiti antsu ántuiniana nuna yajauch awajénawai.

¹⁵ Yus Chicham tuke ásump enentáimji̱a̱i̱ péṉker unuimiátram naka jintintiáwarta. Túrakum Yus péṉker íirsat tusam péṉker takarin atá. Túramka Yusai̱ natsa̱a̱rchattame.

¹⁶ Jú̱ nuṉkanmaya̱nak ántar áujmatin ainia nuja̱i̱ kanaktia. Shuar nuna áujmatainiak tunaanum nuna naṉkaamas wá̱i̱niawai.

¹⁷ Ni jintiniamusha suṉkurja̱i̱ métek pampaawai. Iminíusha tura Piritiusha nu shuar áiniawai.

¹⁸ Nisha nekas chichaman iniaisar tura ashí Yus shuar nantaktincha naṉkaamasai tuíniakui chíkich chíkich shuar Yusan naka enentáimtuiniatsui yamaikia.

¹⁹ Túrasha Yus ashí naṉkaamas enentáimtustinia nuna paant awajsaiti. Jú̱nisaiti “Uunt Yus ni shuari̱n nékainiawai” tura nuyá̱ “Ashí Kristu shuari̱ ainia nu tunaanumia̱ kanakiarti.”

²⁰ Kuítrinniu je̱e̱n kuriji̱a̱i̱ najanamusha kuitji̱a̱i̱ najanamusha írunui. Núja̱i̱ṉkia ti shiira nu takastin áiniawai. Tura numiji̱a̱i̱ najanamusha nuweja̱i̱ najanamusha írunui. Antsu núja̱i̱ṉkia nekasmiancha ainia nu takastin áiniawai.

²¹ Núniskete Yusa takatrí̱ji̱a̱i̱. Ashí tunaanumia̱ kanakir péṉker wekasar shiira nu takasmin átatji. Kame ashí péṉkera nu takasmin asakrin ii Uuntri̱ Jesukrístu wakerak péṉker takata nui̱ apujtamsamniaitji.

²² Natsá wakerutai̱nmaya̱ pisaram esetram péṉker wekasata. Amesha ashí shuar shiir enentáiji̱a̱i̱ Yusan áujena nuja̱i̱ Yus nekas enentáimtakum aneniakum ti shiir pujusta.

²³ Enentáimtsuk chichainiak aya ántar tunaitinian chichainia nu pachisairap. Nusha aya némasmanainiawai.

²⁴ Ii uuntri̱ Jesukrístu takarniuka chíkich shuarja̱i̱ nemasmanaikiashtiniaiti antsu ashí shuarja̱i̱ péṉker nawamnaikiatniuiti. Tura waitnentáimturar péṉker jintintiátniuiti.

²⁵ Tura umircha shuarnasha Yus ni enentái̱n yapajtiakui nekas chichaman shiir enentáimturarat tusa péṉker enentáiji̱a̱i̱ jintintiátniuiti.

²⁶ Nuja̱i̱ íwianch ni wakeramu túrawarat tusa achikmaitiataṉ uwemprartatui.