2 Sam. 3 - Yus Papí: Shuarja̱i̱ Yus Yamaram Chicham Najanamu

¹ Kame Tawitia shuari̱sha Saura shuari̱ji̱a̱i̱ untsurí uwí mesetnum mánaisar pujusármiayi. Túrasha Tawitkia nu arant kakaram ajakí̱ wéakui Saur shuarka menakiár ishichik ajakí̱ wéarmiayi.

Tawitia uchirí̱ṉkia Eprunnum akiiniawaru

² Tawitia uchirí̱ṉkia Eprunnumsha akiiniawarmiayi, ni iwia̱i̱ri̱ṉkia Jisriirnumia̱ Ajinuáma uchirí̱ Amnun.

³ Nuna patai̱ṉkia Karmirnumia̱ Nawara nuwé̱ uchirí̱ Kiriap. Nuyá̱ patai̱ṉkia Jesurnumia̱ úunt akupin Tarmai nawantri̱ Maaka uchirí̱ Apsarún.

⁴ Nuyá̱ kuátruka Akiitia uchirí̱ Atunías. Tura séṉkuka Awitiára uchirí̱ Sejatías.

⁵ Nuyá̱ saiska Tawitia nuwé̱ Ikra uchirí̱ Itream. Tawit Eprunnum pujus ju̱na yajutmakmiayi.

Ápner Tawitiai̱ pachinma

⁶ Tura Tawitia shuari̱ Saura shuari̱ji̱a̱i̱ mesetan pujuriarmia nui̱ṉkia Saura shuari̱ya̱ṉka nekas naṉkamanturi̱ṉkia Ápnerauyayi.

⁷ Tuma asa Ápnerka Saura nua̱ri̱ya núnisauya nuja̱i̱ Ayasa nawantri̱ Ríspaja̱i̱ tsanirmamiayi. Túmakui̱ Ispushét Ápneran chicharuk “¿Urukamtia winia aparu nua̱ri̱ya núnisa núja̱i̱sha tsanirmam?” tímiayi.

⁸ Ispushét tutai Ápnerka ti kajek chicharuk “Kame wikia Jutanmaya̱ ya̱wá̱a núninkiaitiaj. Warí wisha ame apa Sáurnasha ni shuári̱ncha amikrí̱ncha tuke yái̱chukaitiaj. Núnisnak Tawitiai̱sha surukchaitjiame. Tura aya nuwa̱ túramunmaṉkek ¿wíniaka súmamtikram?

^9-10 Kame Tawitian Uunt Yus chicharuk Tánnumia̱ juárkim Pirshiwia pépruana tímianai Jutanmasha Israernumsha úunt akupin ajasam Saur akupkur pujutái̱ri̱ akintruktatme timia nuja̱i̱ métek umimtikchakuiṉkia aya Yusak kakaram asuttiuáti tajai” tímiayi.

¹¹ Kame ashama asa Ispushétka Ápnernaka peṉké ái̱kchamiayi.

¹² Nuya̱ṉka Ápner chichaman akatmamar Tawit ujaka ikiutárum tusa akuptúkmiayi. Tura chicharkuram Ápner chichaak “¿Nuṉkasha yánakit? Yamaikia iiji̱a̱i̱ chícham najanatai tura ju̱sha nekaata, Israer shuaran amiin ashí awakeartaj tusan wi ámiji̱a̱i̱ṉkia pujuttajai” tawai titiarum tímiayi.

¹³ Tutai Tawit aya̱k “Nuka péṉkeraiti. Yamaikia wi ámiji̱a̱i̱ chichaman najanattajai túrasha emka ju̱na seajme, winia íiraitiaj tusam winiakmeka émkaka Saura nawantri̱ Mikiar inimchakmeka winiip” tímiayi.

Mikiar Tawit awaṉtukmia

¹⁴ Nuya̱ṉka chichaman etserniun Tawit akatar Saura uchirí̱ Ispushétan chichaman akuptak chicharuk “Winia nua̱r Mikiar awaṉturkitia. Warí, wikia sian Jiristíu shunirí̱ nuape̱ja̱i̱ yapaji̱án nuatkachmakaj” tímiayi.

¹⁵ Tutai nuya̱ṉka aishri̱ Raisa uchirí̱ Partiar atankitiarum tusa aentsun Ispushét akupkarmiayi.

¹⁶ Tura ni áishri̱ṉkia nemarki̱ wéak utki̱ Pajurímnium jeamiayi. Túmakui̱ Ápner chicharuk “Waketkitia” tutai waketkimiayi.

Jutaja̱i̱ Israeran irurtajtsa Ápner náṉkamma

¹⁷ Ápnerka Israer shuara úuntri̱n chicharainiak “Átumka itiurak Tawit ii úunt akupniuri̱ awajsaintiaj tusarum yáunchuk e̱a̱marme.

¹⁸ Antsu yamaikia túratarum. Warí Uunt Yus Tawitian chicharuk ‘Winia takartin Tawitji̱a̱i̱ Wi aents Israer shuarnaka Jiristíanmaya̱ aentsu uwejé̱ya̱ṉka tura ashí ni nemasri̱ya̱ncha aṉkant awajsartatjai’ tichakait” tímiayi.

¹⁹ Núnisaṉ Ápnerka Piṉjiamín shuarnasha chichasarmiayi. Tura timia Ápnerak Eprunnum Tawitian werí ashí Israer shuar tura Piṉjiamín shuarsha itiur enentáimiainia nuna ujakmiayi.

²⁰ Ápnerka painti aentsu yaruak Eprunnum Tawit pujamunam wémiayi. Tura Tawitkia nin tura niji̱a̱i̱ tsaniṉ taarmia nuna tí peṉker yurumátin namperan najatamiayi.

²¹ Nuya̱ṉka Ápner Tawitian chicharuk “Ju̱ya̱ṉka waketkin ámiji̱a̱i̱ chichaman najanawarat tusan ashí Israer shuaran winia úuntur úunt akupniun irutrattajai túramtai úunt akupin ajasam ame wakeramna núnisaṉ akupkata” tímiayi. Tawitian tú aujas ikiuak Ápnerka aṉkant wémiayi.

Juap Ápneran maamu

²² Nui̱ṉkia Tawitia yaintri̱ armia nuka Juapja̱i̱ jatekratkar waketainiak mesetnum ata̱a̱rman tí nukap ikiankarmiayi. Túrasha Ápnerka Eprunnumka Tawitji̱a̱i̱ṉkia pujuchmiayi. Warí, níji̱a̱i̱ṉkia áujnais akupak nisha aṉkant waketkimiayi.

²³ Kame Juap tura ashí suntar niji̱a̱i̱ ashinkia káunkarmatai Juápan chicharainiak “Nera uchirí̱ Ápnerka úunt akupniun tariyi. Túrasha páchitsuk akupkáyi túram nisha aṉkant waketkiyi” tiármiayi.

²⁴ Nuya̱ṉka Juap úunt akupniun werí chicharuk “¿Ausha warí túram? Nekaata Ápnerka amiin táchaik túrasha ¿urukamtai akupkám? Warí, yamaikia waketkichaik.

²⁵ Ámeka Nera uchirí̱ Ápnerka nékame. Warí, anaṉkramatajtsa tura itiura waya̱m núnismek itiura jíiniam ántsaṉ ame ashí túramna nuna nekartamprataj tusa tarutramainia nuka nékatsmek” tímiayi.

²⁶ Tura Juapka Tawit pujamunmaya̱ jiinkí̱ Ápnera úkuri̱n chichama etserniun akuptur Tawitkia nékachmanak Sira taurma yumirmat nuyá̱ awaiṉkiarmiayi.

²⁷ Túruna Ápnerka Eprunnum waketkimiayi tura pepru wá̱i̱ti̱a̱i̱ri̱ya̱ nui̱ níniak áujsataj tana nútikias Juap akaṉkí̱ puya̱ja̱i̱ tantannum ijiú mámiayi. Ni yachi̱ Asaer mantuamu asa Juapka yapajmiák nincha mámiayi.

²⁸ Nuna Tawit antuk chichaak “Nera uchirí̱ Ápner jakamunmasha wikia tura winia akupeamursha Uunt Yus iismasha peṉké makuchminiaitji.

²⁹ Nu numpanmaṉka Juápak tura ní shuari̱ṉ makurma atí. Tura ni je̱e̱nkia numpá pujak wáitchaka tura kuchaprúkchaka núja̱i̱nchuka wai̱n ushukrus wekaichaka túrutskesha puya̱ja̱i̱ máchmaka núnisaṉ tsukái wáitchaka chikichkisha atsutí” tímiayi.

Ápner jakamtai e̱a̱rma

³⁰ Kame Kapaunnum meset amia nui̱ ni yachi̱ Asaer mantuamu asa Juapka ni yachi̱ Awisháiji̱a̱i̱ Ápnernaka máwarmiayi.

³¹ Nuya̱ṉka Tawit Juápan tura ashí aents niji̱a̱i̱ matsamármia nuna chicharainiak “Atumí pushirí̱ ja̱a̱ktarum túrarum suir pushí entsarum Ápner jakamunam kúntuts enentáimpratarum” tímiayi. Tu chichaak úunt akupin Tawitkia jaká aya̱shí̱n juíniamunam úkumur wémiayi.

³² Túrawar Ápnernaka Eprunnum iwiarsarmiayi. Nuyá̱ úunt akupniuka Ápner iwiarsamunam ayaam wajas kakantar útmiayi núnisaraṉ ashí aents útiarmiayi.

³³ Kame úunt akupniuka Ápner jakamun enentáimtus kúntuts nekapeak kantamuk jú̱nis tímiayi “¿Enentáimcha jainia núnisaṉ Ápnerka jákatniú?

³⁴ Ame uwejmeka jiṉkiakchamu armai núnisaṉ ame nawemsha jiruja̱i̱ṉkia jiṉkiachmauyi. Yajauch aentsu uwejé̱n mantamnaiya̱na núnisam mantamname” tímiayi. Takui̱ ashí aents ataksha e̱a̱rarmiayi.

³⁵ Nuya̱ṉka kí̱atsa̱i̱ṉ yurumát tusar ashí aents Tawitian weriarmiayi. Túrasha Tawitkia Yus íimmianum nekas tajai tusa chichaak “Etsa̱ akatsa̱i̱ṉ yurumkankesha núja̱i̱ṉchuka warinkisha yúakuiṉkia Winia Yus asuttiuáti tura nuna umikchamtaikia nuna nukap patatrusti” tímiayi.

³⁶ Kame ashí aents nuna nekaawar péṉker enentáimsarmiayi. Warí, úunt akupin ashí túrimia núnaka ashí aents péṉker iyarmiayi.

³⁷ Tura nu tsawantinkia ashí aents tura ashí Israer shuar Nera uchirí̱ Ápner mátniunmaṉka Tawitkia pachinkiachmia núnaka nekaawarmiayi.

³⁸ Nuya̱ṉka úunt akupin ashí ni yaintri̱ armia nuna chicharainiak “¿Yamái Israernum akupniu uchirí̱ tura tí peṉker áishmaṉ páantin jákania nuka nekaachurmek?

³⁹ Antsu wikia úunt akupin atá tusar asuitiji̱a̱i̱ ukatkámuitiatnak yamaikia peṉké kakarmachuitjiai. Kame ju̱ aentska Sarwia uchirí̱ṉkia wíji̱a̱i̱ṉkia naṉkaamas ti kakaram áiniawai. Túrasha Uunt Yusak yajauch awajkartanka ni yajauchiri̱ji̱a̱i̱ métek patattsarti” tímiayi.