2 Sam. 24 - Yus Papí: Shuarja̱i̱ Yus Yamaram Chicham Najanamu

Tawit aentsun nekapmarma

¹ Uunt Yus Israer shuaran ataksha ti kajerkarmiayi. Túrawar Israer shuaran Tawitian útsuteak “Wetá túram Israer shuar tura Jutá shuarsha nekapmararta” tímiayi.

² Tutai úunt akupin Juap suntara uuntri̱ niji̱a̱i̱ pujumia nuna chicharuk “Waitneasam ashí Israer shuar matsamkar pujuinia nui̱ wekasam Tánnumia̱ juárkim Pirshiwia tímianai aents nekapmararta, urutmá aentsuk mátsatka wi nekaataj” tímiayi.

³ Tutai Juap úunt akupniun aya̱k “Uunt Yus ame Yúsrum sian naṉkaamas untsurí awajsati, winia úuntur úunt akupin iistí. Túrasha winia úuntur akupniúsha ¿urukamtai ju̱nasha wakera?” tímiayi.

⁴ Túrasha Juap nuyá̱ suntara uuntri̱ tiarmia núnaka anturtsuk úunt akupniu chichame̱n umirkarmiayi. Nuyá̱ Juap tura suntara úuntri̱sha Israer shuaran nekapmartaj tusa wénak úunt akupin pujamunmaya̱ṉka jíinkiarmiayi.

⁵ Jurtan entsan katitkiar pepru nuṉkaani̱ Kaata pakarí̱ ajapén Aruirnum matsamkarmiayi nuya̱ṉka Jasernum wéarmiayi.

⁶ Nuyá̱ Karaatnum tura Káatish nuṉkanam jeawarmiayi. Nuya̱ṉka Tanjaannum jeawar tura Setun peprunam ayamach matsamármia nunasha téntakarmiayi.

⁷ Nuyá̱ Tiru pepru wenuke̱ utúachminia nui̱sha núnisaṉ ashí Jep tura Kanaan aentsu nuṉke̱n pepru iruniarmia nui̱sha wéarmiayi. Nuyá̱ Jutá nuṉkanam Nekepnumaani̱ wéar Pirshiwia tímianai jeawarmiayi.

⁸ Ashí nu nuṉkanam wekas nekapmasua umikiar nuiwi nantu tura painti tsawant jeamunam Jerusaréṉnumka waketki̱ táarmiayi.

⁹ Kame Juap, aentsu nekapmasua umik waketki̱ úunt akupniun ujaak “Israer shuar mesetnum mánikmin armia nuka uchusiántu mir áiniawai tura Jutá shuari̱ṉkia kiniantu mir áiniawai” tiármiayi.

Tawit suntaran nekapmakmá Uunt Yusan akajkamu

¹⁰ Tawitcha aentsun nekapmamtikiar umikmatai ni enentái̱sha wáurkamiayi. Túrasha Uunt Yusan chicharuk “Ju̱na túran ti yajauch túrajai. Tuma asamtai waitneasam Uunt Yusá, Ame takartámniu tunaarí̱ tsaṉkurata. Warí nétsea núnisan túrachjak” tímiayi.

¹¹ Kame Tawit káshik nantaki̱ pujái̱ Yúsnan etserin Kaat Tawitian Yusa chichamen ujauya nuna Uunt Yus chicharuk

¹² “Tawit werim chicharkum ‘Uunt Yus chichaak “Túrunatniun menaintiun títiatjamna nuyá̱ chikichik achikta túrawakmin núnaka Wiki túrattajai” tawai’ titiá” tímiayi.

¹³ Nuyá̱ Kaat Tawitian werí chicharuk “Ame nuṉkemín siati uwí tsuka atí ¿tamek, nuíchuka menaintiú nantu ame nemasrum apapétmainiakui u̱mkiní̱ ajatin wakeramek, núja̱i̱nchuka ame nuṉkemín menaintiú tsawant suṉkurja̱i̱ kaji̱nkiarat tusamek wakeram? Wats, yamaikia winia akuptúkainia nuna itiurak ai̱ktaj tusam enentáimprata” tímiayi.

¹⁴ Nuní̱ tutai Tawit Káatan chicharuk “Tí kuntuts nekapeajai. Tuma asamtai Uunt Yus asutiámatai. Warí Niṉkia ti waitnenkartichukait. Antsu wikia aents asutiuáwara̱i̱ṉ tusan peṉké nakitniuitjiai” tímiayi.

¹⁵ Uunt Yus Israer shuaran káshik juarki̱ Tánnumia̱ Pirshiwia tímianai tsawant tesamua nuja̱i̱ métek suṉkuran akuptúkarmiayi. Túramtai sataintia mir shuar jákarmiayi.

¹⁶ Nui̱ṉkia Jípiusnumia̱ aents Arauna trikiu awa̱jtiutairi̱n ayamach Yusa suntari̱ wajamiayi. Nui̱ Tawit yajauch túramunam Jerusaréṉnumia̱ aentsun amuktaj tusa pujurun atak íksaṉ Uunt Yus waitnentrar Ni suntari̱n chicharuk “Máakete iniaisarta” tímiayi.

¹⁷ Nuyá̱ Tawit Yusa suntari̱ ashí aentsun amukí̱ wéan wainiak Uunt Yusan chicharuk “¿Ju̱ aentssha warinia túrawaruit? Tunaan túraj nuka Witjiai. Tuma asamtai seajme, winiak wi shuarja̱i̱ asuutiuata” tímiayi Tawit.

¹⁸ Nu tsawantin Kaat Tawitian werí chicharuk “Jípius aents Arauna trikiu awa̱jtiutairi̱ya̱ nui̱ weme Uunt Yus áestutai̱ najanata” tímiayi.

¹⁹ Nuya̱ṉka Uunt Yus timia nuja̱i̱ métek Kaat ujakam Tawitkia tímiatrusaṉ umik wémiayi.

²⁰ Tura Arauna úunt akupin ni takarniúri̱ji̱a̱i̱ ni pujumia nuní̱ wininian wainkiamiayi. Nuyá̱ Arauna jiintiuki̱ úunt akupniun tikishmátar tsuntsumpruámiayi.

²¹ Túruna Arauna anintrak “Winia úunt akupniuru ame takartámniusha ¿urukamtai tariniam?” Tutai Tawitcha aya̱k “Ame trikiu awa̱jtiutairam nuṉká nuna sumarkan Uunt Yus áestutai̱ najanan áestakun suṉkur aentsun yajauch awajeana nuna asaktúrtaj tusan winitjiai” tímiayi.

²² Tutai Arauna Tawitian chicharuk “Pai winia uuntru, ámiji̱a̱i̱ túratin péṉkeraitkiuiṉkia túrata. Yus takamtsuk áestuatniunka jimiará waaka nuṉka pukutai wajainiawai. Tura jikia neketai̱ numisha nuyá̱ waaka kuntujnum numi ikiurtaisha ju̱i̱ṉ irunainiawai” tímiayi.

²³ Nuyá̱ Arauna úunt akupniun chicharuk “Uuntru, ashí ame támena núnaka Araunaka amaawai.” Nu arant chichaak “Ame Yúsrum Uunt Yus anturtamkaṉka maak ainti” tímiayi.

²⁴ Tutai úunt akupin Araunan chicharuk “Atsá antsu kuitji̱a̱i̱ sumaktatjai. Warí winia Úunt Yusrun takamtsuk áestuatniun kuitji̱a̱i̱ sumakchamuṉka peṉké súsashtatjai” nuna tinia Tawit nu nuṉkancha tura waakancha seṉkuintia kuitji̱a̱i̱ sumakmiayi.

²⁵ Tura Tawit Yus áestutai̱n nui̱ najana umik taṉkú maa takamtsuk aestua nuyá̱ Uunt Yus shiir awajeamun áestuamiayi. Tura Uunt Yus nuní̱ tura seamun anturak Israer shuarnum suṉkur sakarmiayi.