2 Sam. 19 - Yus Papí: Shuarja̱i̱ Yus Yamaram Chicham Najanamu

¹ Tura Juápan ujainiak chicharainiak “Nekaata, úunt akupniuka uutui tura Apsarúnai̱ kúntuts pujawai” tiármiayi.

² Nu tsawantai̱ nupetmakmaka ashí shuaran kúntuts awajénak ajakmárua núnis nekapmamtikrararmiayi. Warí, nu tsawantka úunt akupin ni uchirí̱n enentáimtus ti wáitiawai táman ashí aents antukarmiayi.

³ Nu tsawantinkia ashí aents péprunam wáiniakka aents mesetnumia̱ pisarar natsamainiak urukainiawa núnisar ú̱mak waya̱warmiayi.

⁴ Kame úunt akupniusha ni yapi̱n nukuk kakantar untsumuk “Winia uchir Apsaruná, Apsaruná, winia uchiru, winia uchiru” ajamiayi.

Juap Tawitian chicharma

⁵ Juap úunt akupniu je̱e̱n wayá̱ chicharuk “Yamái ámin takartámin ame iwiaakmarmin ame nawantrumi iwiaakmari̱n tura ame uchirmi iwiaakmari̱n ame nuwemi iwiaakmari̱n tura ame núwemea núnis áiniana nuna iwiaakmari̱n aṉkant awajtúsaru ashí iniatsá̱rarume.

⁶ Warí nakitramainia nu anename tura anenmainia nuka nakitiáiniame. Nuka yamái ti paant awajsáme ámiji̱a̱i̱ṉkia ame suntarumi úuntri̱sha tura ámin takartámniusha peṉké itiurtamainiatsui. Ti nekas yamái nékajai ii ashí jakakrincha Apsarún iwiaakuiṉkia ámeka warasa̱a̱me.

⁷ Antsu yamaikia jiinkitia tura péṉker enentáimtusaram ame takartámin áujsarta. Warí, Uunt Yus íimmianum nekas tájame. Yamái jíinchakminkia ju̱ káshikia chikichik áishmaṉkesha ámiji̱a̱i̱ṉkia juákchattawai. Tura natsa asakmin ashí yajauch juártamkiaru yamaiya̱ ju̱i̱sha wáinmena núja̱i̱ṉkia naṉkaamas nu nekaska timiá yajauch arutrámtiatui” tímiayi.

⁸ Nuya̱ṉka úunt akupin wajaki̱ wá̱i̱ti̱a̱i̱niam pujusmai. Túrunamtai ashí aents chichainiak “Nekaatarum úunt akupniuka pepru wá̱i̱ti̱a̱i̱ri̱n pujawai” tu etserkarmiayi. Tura ashí aents úunt akupin pujamunam iruntrarmai. Nuna túmainiai̱ Israer shuarka pisakár aṉkant aṉkant ni je̱e̱n waketrarmiayi.

Tawit shuari̱n ataksha náwamma

⁹ Túrasha ashí aents nuamtak áujnainiak “Úunt akupin ii nemasri̱ya̱ aṉkant awajtámsaitji tura Jiristíanmaya̱ aents uwejé̱ya̱sha uwemtikrampraitji. Túraitiak yamaikia Apsarúnan ashamaak ju̱ nuṉkanmaya̱ṉka pisarárai.

¹⁰ Kame Apsarúnka ii asuiti muuknum ukatar ii úunt akupniuri̱ atí tusar anaikiamji túrasha nuka mesetnum jákaiti. Tuma ai̱sha entá ¿urukamtai takamtaksha pujarum úunt akupin awaketskesha?” tunaiyarmiayi.

¹¹ Tura úunt akupin Tawitcha Yúsnan pujurin Satukan Awiatárja̱i̱ chichaman akuptuiniak chicharainiak “Jutanmaya̱ uuntri̱ ainia nu chicharkuram ‘¿Urukamtai átumka úunt akupin ni je̱e̱n awaiṉkitniunmasha amúamunam úkusha juáktatrum? Warí, ashí Israer shuara chichame̱ úunt akupniui̱ ni je̱e̱n jeachaik.

¹² Átumka winia yatsuruitrume winia ukunchruitrume tura winia namaṉkruitrume. Túmaitiatrumsha entá ¿urukamtai úunt akupin awaiṉkitniunmasha amúamunmasha úkusha juáktatrum?’

¹³ Tura Amasasha núnisrumek chicharkuram ‘¿Ámeka nui̱ṉkia winia yatsurcha winia ukunchruchu tura winia namaṉkruchukaitiam? Tura Juápai̱ya̱ winia suntaru uuntri̱ awajchakui̱ṉkia Yus winia asuttiuáti tura umikchamtaisha nuna núkap patatrusti tawai’ titiarum” tímiayi.

¹⁴ Nú tutai ashí Jutanmaya̱ shuarsha chikichik aentsua núnisar Tawitian shiir enentáimtusarmiayi. Tutai nisha chicharainiak “Amesha tura ashí ámin takartámin ainia nui̱m waketra káunkatarum” tuíniawai titiarum tusa akupkarmiayi.

Tawit Jerusaréṉnum wáketma

¹⁵ Nuya̱ṉka úunt akupniuka waketki̱ Jurtan entsanam jeamiayi. Tura Jutanmaya̱ shuarka úunt akupniun iṉkiuṉkar Jurtan entsanam ikiankítiai tusar Jirkarnum ashinkiarmiayi.

¹⁶ Núnisaṉ Pajurímniumia̱ Piṉjiamín shuar Jera uchirí̱ Semaisha Jutanmaya̱ shuar úunt akupin Tawit iṉkiuṉtai tusar ashinkiui nisha wáuras wéarmiayi.

¹⁷ Kame Piṉjiamín shuar mir áishmaṉ níji̱a̱i̱ṉkia jearmiayi. Núnisaṉ Saura uchirí̱ takarniúri̱ Sépasha tura ni uchirí̱ kinse armia nuja̱i̱ tura painti takarniúri̱n yaruak wárikmasar úunt akupniuka táachmanumaṉ nianiá jearmiayi.

¹⁸ Túrunawar úunt akupin warinia wakera nuna túratai núnisaṉ úunt akupniu shuari̱n ikiati̱á̱rtinian yáimkiatai tusar akaaran katitrarmiayi. Tura nui̱ Jurtanan katitkittsa wéan Jera uchirí̱ Semái úunt akupniun tikishmátramiayi.

Tawit Semain tsaṉkurma

¹⁹ Tura úunt akupniun chicharuk “Wi awajirmanum winia úuntur makurchati núnisaṉ Jerusaréṉnumia̱ winia úuntur úunt akupin jiinkimnia nu tsawant ame takartámin yajauchin túramnia nusha enentáimtusaip. Tura úunt akupniuka ni enentái̱ncha núnaka ikiuschati.

²⁰ Wikia ame takarniunka nekas tunaan túramjai tura nekaata. Tuma asan yamaikia winia úuntrun úunt akupniun iṉkiuṉtaj tusan Jusé shuari̱ya̱ṉka wiawiá tajai” tímiayi.

²¹ Takui̱ Sarwia uchirí̱ Awishái chichaak “Tuma asa Uunt Yus asuitiji̱a̱i̱ muuknum ukatkámun yajauch yumiṉkra asa ¿Semaikia jákashtatuak?” tímiayi

²² Takui̱ Tawit chicharuk “¿Sarwia uchiri̱yá wíji̱a̱i̱sha atumsha warí takakrum yamái winia nemasur ajasártincha? ¿Yamái Israernum yaaksha jákatniukait? ¿Kame wi yamái ashí Israernum úunt akupin ajasjana núnaka nékatsjak?” tímiayi.

²³ Nuya̱ṉka úunt akupin Semain chicharuk “Jákashtatme nekas tajai” tímiayi.

Sepa anaṉkamia nuna Tawit nekaamu

²⁴ Núnisaṉ Saura uchirí̱ Mijipiusétcha úunt akupniun iṉkiuṉtaj tusa támiayi. Ni nawe̱ncha péṉkerka wáinkiachuyayi tura susurí̱ncha iwiarachu tura úunt akupin jiinkimia nuyá̱ nijiaachmak ataksha aṉkant waketki̱ tamia tímianaisha nijiamachuyayi.

²⁵ Úunt akupniun iṉkiuṉtaj tusa Jerusaréṉnum tamia nui̱ aníak chicharuk “Mijipiusétá ¿urukamtai wiji̱a̱i̱ winichmam?” tímiayi.

²⁶ Tutai ni aya̱k “Winia úuntur úunt akupniu winia takartin anaṉkruamai. Ame takartámniuka chichaak ‘Kawái iwiarturata nui̱ ekemkan úunt akupniuja̱i̱ wétaj’ timiai. Warí ame takartámniuka tunamáruiti.

²⁷ Tura winia úuntur úunt akupniui̱ ame takartámniun ní tsanumprurmai túrasha winia úuntur úunt akupniuka Yusa suntarí̱ya núniniaiti. Kame ame warí itiurkatniua wakeram nu túrata.

²⁸ Warí ame íismaka wi shuarka iwiaaku ácharmin antsu ashí jákatin armai túrasha winia úuntur úunt akupin ame takartámniuka ámiji̱a̱i̱ yurumáinia nui̱ amek apujsaitme. Tuma asan wisha ¿warí tsaṉkatkamuitiaj úunt akupniun seatniuncha?” tímiayi.

²⁹ Tutai úunt akupin chicharuk “¿Urukamtaik áminiusha nu arantcha áujmattsattaj? Warí wikia ámiji̱a̱i̱ Sepa nuṉkan nakarnáikiarti yaunchu tíniuitjiai” tímiayi.

³⁰ Takui̱ Mijipiusét úunt akupniu chicharuk “Núnaka niṉki ashí jukiti. Warí winia úuntur úunt akupniuka ni je̱e̱n waketki̱ péṉker aṉkant táchaik” tímiayi.

Tawit Parsiráinian péṉkernum yumiṉkramu

³¹ Núnisaṉ Karaatnumia̱ aents Parsiráisha Rujirímnumia̱ taa úunt akupniuja̱i̱ Jurtanan katitkímiayi. Kame núnaka nui̱ úuntan kuak akupkataj tusa katiṉmiayi.

³² Parsiráikia tí uuntach uchaintia uwí takakuyayi. Kame úunt akupniun Majanáimnium pujumia nui̱ṉkia ní ayurmiayi. Warí niṉkia ti kuítrintin áishmaṉkauyayi.

³³ Tura úunt akupin Parsiráin chicharuk “Wiji̱a̱i̱ wetái Jerusaréṉnum tura nui̱ṉkia wi áminkia wainkiatjame” tímiayi.

³⁴ Tura Parsirái úunt akupniun chicharuk “Úunt akupniuja̱i̱ Jerusaréṉnum wenasha nui̱sha ¿urutmá uwik pujustaj?

³⁵ Yamaikia wikia uchaintia uwí takakjai. ¿Yajauchincha tura péṉkernasha nekaatniun jeatjash? ¿Yuáttana tura umartatna nunasha ame takartámniusha nekapraintiash? ¿Kame áishmaṉ nuwa̱ja̱i̱ kantamáiniakui̱sha nunasha antukminkiaitiaj? ¿Urukamtai ame takartámniusha kijin júkitniua núnissha arittia winia úuntur úunt akupniuncha?

³⁶ ¿Urukamtaik úunt akupniusha tuusha akirkat? Ame takartámniuka úunt akupniuja̱i̱ Jurtanan katitkiṉkia ti arantka wéchattawai.

³⁷ Waitneasam ame takartámin waketkit akupkata tura winia péprurui̱ni̱ṉ winia apar tura nukur iwiarsarma nui̱ṉ jakatjai. Antsu ame takartámin Kimiam ju̱i̱ pujawai ni ámiji̱a̱i̱ṉkia winia úuntur úunt akupniuja̱i̱ṉkia winití antsu níji̱a̱i̱ṉkia ame warí itiurkatniua wakeram nu túrata” tímiayi.

³⁸ Nuya̱ṉka úunt akupin chicharuk “Kimiam winí̱ winití antsu nui̱ṉkia ni warinia wakera nuna umirkattajai. Tura ame warí seattiatam núnaka ashí túrattajai” tímiayi.

³⁹ Nuya̱ṉka ashí aents Jurtannaka katitrarmiayi núnisaṉ úunt akupniusha katitkímiayi. Nuyá̱ úunt akupin Parsiráin mukuná shiir pujutnum yumiṉkramiayi túram nuya̱ṉka ni je̱e̱n waketkimiayi.

⁴⁰ Nuya̱ṉka úunt akupniuka Jirkarnum wémiayi tura Kimiamsha niji̱a̱i̱ wémiayi. Kame Jutanmaya̱ṉka ashí aents antsu Israernumia̱ṉka ajapén nakakar úunt akupniunka nemariarmiayi.

Jutaja̱i̱ Israer úunt akupniun akasmatainiamu

⁴¹ Tura nekaata ashí shuar Israernumia̱ úunt akupniun tariar chicharainiak “¿Urukamtai Jutanmaya̱ shuar ii yachi̱ áiniayatcha achirmak juramkiar amincha tura amé aentsrumnia̱sha tura aents Tawitji̱a̱i̱ írutrainia nunasha Jurtannumsha ikiati̱á̱rara?” tiármiayi.

⁴² Tuíniakui ashí Jutanmaya̱ shuar Israer shuaran chicharainiak “Warí úunt akupniuka nekas íi shuaraiti. Túrasha ¿urukamtai atumsha núja̱i̱sha kajearum? ¿Kame úunt akupniui̱ aya̱msarik iisha yurumáitiaj núja̱i̱nchuka warinkisha ántar suramsakaitiajⁱ?”

⁴³ Tuíniakui Israernumia̱ shuar Jutanmaya̱ shuaran chicharainiak “Iikia úunt akupniui̱ṉkia tias nakakma nérenniuitji tura nekaska ii atumji̱a̱i̱ṉkia naṉkaamas Tawitkia nérenniuitji. Enta nuka urukamtai peṉké antra núnissha ¿enentáimtururam? ¿Kame nui̱ṉkia iyá iyakua úunt akupin awaiṉkitniuka chichakchajik?” tiármiayi. Túrasha Jutanmaya̱ shuara chichame̱ timiá kakarmauyi Israernumia̱ shuara chichame̱ja̱i̱ṉkia.