2 Sam. 18 - Yus Papí: Shuarja̱i̱ Yus Yamaram Chicham Najanamu

¹ Kame Tawitkia aents niji̱a̱i̱ irunar yujarmia nuna íisarmiayi tura nuya̱nak mírnumsha tura siánnumsha suntara úuntri̱n anaitiurmiayi.

² Nuyá̱ Tawit aentsun menaintiú nakakman akuprámiayi. Emka nakakmanumka Juápauyi úuntri̱ṉkia. Tura nuyá̱ nakakamunmaṉka Juapa yachí̱ Sarwia uchirí̱ Awishái nuyá̱ amúamu nakakamunmaṉka Jit aents Itiái úuntri̱ṉkia ámiayi. Nuyá̱ úunt akupin aentsu chicharainiak “Timiá wiki atumji̱a̱i̱ṉkia winittiajai” tímiayi.

³ Takui̱ aents chicharainiak “Winishtatme, warí ii aya aneachma pisaakrincha iinkia pachitmaschartatji. Ii suntari̱ ajapén nakaak kaji̱ṉkiarmataisha núnaka peṉké pachischartatui. Túrasha yamaikia tias mirja̱i̱ métek ámeka jeame. Antsu ámeka péprunam pujusmek iinkia yáimkiata” tiármiayi.

⁴ Tuíniakui úunt akupin chicharainiak “Wats nuiṉkia átum iisam túa péṉkerait nuna túratjai” tímiayi. Nuya̱ṉka aentska sian sian tura mir mir junairar jiiniainiamunam úunt akupniuka wá̱i̱ti̱a̱i̱niam wajas juákmiayi.

⁵ Tura úunt akupniuka Juápan Awisháin tura Itiain akupénak chicharainiak “Winia waitanentra asarum natsa Apsarúnka shiir awajsatarum” tímiayi. Tura úunt akupin ashí uuntri̱ armia nu akupénak Apsarúnnan timia nunasha ashí shuar antukarmiayi.

⁶ Kame aentska kampunniunmaani̱ wéarmiayi Israer shuarja̱i̱ iṉkiukatai tusar túrunawar Eprain kampunniunam wainniaikiar mánaikiarmiayi.

⁷ Nui̱sha Tawitia suntari̱ Israer shuaran nupetkarmiayi. Nu tsawantai̱ painti mir aentsun máwarmiayi.

⁸ Mesetka nú nuṉkanmaṉka ashí waṉkarmiayi. Kame nu tsawantinkia puya̱ja̱i̱ mantamnawarua nuna naṉkaamas kampunniuka aentsun amukmiayi.

⁹ Tura Apsarúnka Tawitia takarniúri̱ armia nuja̱i̱ iṉkiunaikiarmiayi. Apsarúnka umpururi̱n eketka wémiayi tura umpuruka ensena numi kae̱ wéakmanun wáiṉmiayi. Nuya̱ṉka ensena kanawe̱n Apsarúna intiashí̱n penumak yakí̱ juákmiayi antsu umpuruka nuṉkak naṉkaamakmiayi.

¹⁰ Aents nuna wainiak Juápan ujaak chicharuk “Nekaata Apsarúnnaka ensenanam nétan wainkiajai” tímiayi.

¹¹ Takui̱ áishmaṉ chichaman etsermia nuna Juap chicharuk “Kame wainkiayatmesha ¿urukamtai nuṉká itiaram nui̱ṉ máachum? Túrajai tákumni̱ṉkia tias kuítian tura chikichik akachumtai̱niak amasa̱a̱jai” tímiayi.

¹² Nuna takui̱ aents Juápan chicharuk “Kame wikia mir kuítian uwejruí̱ achiknásha úunt akupniu uchirí̱nkia winia uwejrunka tsaṉkatkachaintjiai. Warí iisha antukmaji úunt akupin ámin Awisháin tura Itiaiji̱a̱i̱ akuptamuk chichaak ‘Natsa Apsarún péṉker waitrukta turamchamka’ tímiayi.

¹³ Tura wi iwiaakmarun tsaṉkamatkamtaisha amesha wíniaka kajertukame. Warí úunt akupniuka peṉké ú̱rkachminiaiti” tímiayi.

¹⁴ Tutai Juap aya̱k “Ámiji̱a̱i̱ṉkia tsawantnaka ántrantka wasurkashtajai” tímiayi. Nuya̱ṉka menaintiú naṉkin achik Apsarúnka tuke iwiaaku ensenanam nétan enentáiniam ijiumiayi.

¹⁵ Tura tias natsa Juapa tantari̱ takurin armia nu téntakar awena mai̱ ijiú awajiármiayi túrukiar máwarmiayi.

¹⁶ Nuya̱ṉka Juap kachu umpuarmiayi. Túrunamtai aents Israer shuaran patatiarmia núnaka iniaisarmiayi. Tura Juap ni shuari̱nkia “Pai, máakete” tímiayi.

¹⁷ Nuya̱ṉka Apsarúnnaka júkiar kampunniunam uunt wa̱a̱ ámanum eṉkeawarmiayi túrawar kayan chumpirá áimkiarmiayi. Antsu Israer shuarka pisakár aṉkant aṉkant ni je̱e̱ni̱ṉ waketrarmiayi.

¹⁸ Kame Apsarún iwiaaku pujus Úunt Akupniu Pakarí̱i̱n nakumprukrum winia najatatarum tusa akupkámiayi. Kame winia uchirsha atsawai tura ukunmasha yaki winia náarnasha enentáimtusat tusa túramiayi. Nakumkar najanamunam ni náari̱n áatrarmiayi. Tura yamaisha núnaka Apsarún nakumkar najanamu tiniu áiniawai.

Apsarún mámun Tawit nekaamu

¹⁹ Nuya̱ṉka Satuka uchirí̱ Ajimiás chichaak “Tsékeṉkin úunt akupniun péṉker chichaman itiurká Uunt Yus ni nemasri̱ya̱ aṉkant awajsa nunasha ujaká ikiutjai” tímiayi.

²⁰ Takui̱ Juap aya̱k “Ju̱ tsawantinkia ámeka chíchamka júkishtatme. Antsu ámeka chíkich tsawant jukitia. Ámeka chíchamka júkishtatme warí úunt akupniu uchirí̱ jákachaik” tímiayi.

²¹ Nuya̱ṉka Juap Itiupíanmaya̱ aentsun chicharuk “Weme ame wainkiamna nu úunt akupin ujakta” tímiayi. Nuyá̱ Itiupíanmaya̱ aents Juápan tikishmátar ikiuak tsékeṉmiayi.

²² Nuyá̱ Satuka uchirí̱ Ajimiás ataksha Juápan chicharuk “Ánkisha Itiupíanmaya̱ aentsu úkuri̱i̱n tsékeṉtiaj tsaṉkatrukta” tímiayi. Takui̱ Juap chicharuk “Winia uchiru ¿urukamtai ántramsha chícham etserkattsamsha tsékeṉtiatam akirmákartatuak?” tímiayi.

²³ Tutai ni aya̱k “Túmaitkiuish tsékeṉtiatjai” takui̱ chichaak “Tsékeṉtia” tímiayi. Tura Ajimiáska pakanmaani̱ tsékeṉmiayi túmak Itiupíanmaya̱nka naṉkaikimiayi.

²⁴ Tawitkia jimiará waiti ámanum ajapén pujumiayi. Tura jintian íistin awajsamu wenuknum waiti ámanum waka íimiaj tukamá áishmaṉ niṉki tseke winian wainkiamiayi.

²⁵ Nuya̱ṉka jintian íistin awajsamu úunt akupniun untsuk ujakmiayi. Tura úunt akupin chichaak “Niṉki winiakka péṉker chichaman inimiui” tímiayi. Nuya̱ṉka tíjiu̱ch ajakar ajamiayi.

²⁶ Tura jintian íistin awajsamu ataksha chíkich áishmaṉ tseke winian wainkiamiayi. Tura jintian iin waiti wáinniun untsuk chicharuk “Nekaata, chíkich áishmaṉ niṉki tseke winiawai” tímiayi. Tura úunt akupin chichaak “Ausha núnisaṉ péṉker chichaman inimiui” tímiayi.

²⁷ Jintian iin ataksha awaiṉki̱ chicharuk “Emka nuna tséketairi̱ṉkia Satuka uchirí̱ Ajimiása tséketairi̱nti” tímiayi. Takui̱ úunt akupin aya̱k “Ju̱ áishmaṉka péṉker áishmaṉkaiti tura péṉker chichaman inimiui” tímiayi.

²⁸ Ajimiás úunt akupniun untsuk chicharuk “Aṉkantaiti” ti tikishmátar nijia̱i̱ji̱a̱i̱ nuṉká antiastatuk tsuntsumpruá chichaak “Áishmaṉka winia úuntur úunt akupniun mátaj tuinian ni nemasrí̱n uwejé̱e̱n íktusarai nu Uunt Yus ame Yúsrum shiir awajsamu atí” tímiayi.

²⁹ Nuyá̱ úunt akupin anintrak chichaak “Natsa Apsarúncha ¿péṉkerak pujá?” tímiayi. Takui̱ Ajimiás aya̱k “Juap úunt akupniu takarniúri̱n akupkainia nui̱ ame takartámin charaatum ajainian wainkiayi túrasha nekaachjai warí ama” tímiayi.

³⁰ Takui̱ úunt akupin chicharuk “Waya̱m nui̱ wajasta” tutai wayá̱ wajasmiayi.

³¹ Nuya̱ṉka Itiupíanmaya̱ aents taa chichaak “Winia úuntur úunt akupniu péṉker chicham nekaata. Ámin shuar kajertamainia nuyá̱ Uunt Yus ame itiurchatrumin yamái ayamprutmakai” tímiayi.

³² Tura úunt akupin Itiupíanmaya̱ aentsun aníak “¿Natsa Apsarún péṉker pujawak?” tímiayi. Takui̱ Itiupíanmaya̱ aents aya̱k “Winia úuntur úunt akupniu nemasri̱ṉkia tura yaaksha yajauch awajkattsa wakeruiniana nusha nú natsa urukaya núnikiarti” tímiayi.

Tawit Apsarúnan e̱a̱rma

³³ Nuyá̱ úunt akupin purushnirmiayi. Túruna wáitiniam yakí̱ tesamu amia nui̱ waka útmiayi. Utki̱ wákuk chichaak “Winia uchir Apsaruná, winia uchiru, winia uchiru wi amiin jakanka maak a̱a̱jai. Winia uchir Apsaruná, winia uchiru, winia uchiru” ajamiayi.