2 Sam. 17 - Yus Papí: Shuarja̱i̱ Yus Yamaram Chicham Najanamu

¹ Nuya̱ṉka Ajitupírka Apsarúna chicharuk “Tuse mir áishmaṉkan juura yaruakan ju̱ kashi Tawitian pataatuktaj tsaṉkatrukta.

² Pimpikí̱ kakarmachu ajas pujan jatektaj. Túran awakkan aents niji̱a̱i̱ pujuiniana núnaka ashí ipiskáran aya úunt akupniunak mátaj.

³ Warí, aya níṉkichuk e̱a̱m. Tura ikiuakun ashí aentsun awaṉturtatjame. Nuyá̱ ashí aents waketrarka shiir aṉkant pujusártatui” tímiayi.

⁴ Ajitupíra chichame̱ṉka Apsarún tura ashí Israer shuara uuntri̱ armia nu íismasha péṉkerauyi.

⁵ Túrasha Apsarún chichaak “Waitneasrum Arkit aents Usaisha untsuktarum nisha warittiṉ antukartai” tímiayi.

⁶ Tura Usái Apsarúnai̱ támatai chicharuk “Ajitupírka ju̱ chichakai. ¿Ní tana núkek umirkattajⁱ? Núja̱i̱nchuka ame chichakta” tímiayi.

⁷ Tutai Usaikia Apsarúna chicharuk “Ajitupír chichakainia nuka antsu yamaikia péṉkerchaiti” tímiayi.

⁸ Tinia Usaikia chichaak “Ámeka nékame, ame apasha tura aents nin nemarainiana nusha ti kakaram áiniawai. Tura chái̱ nuwa̱ uchirí̱ atantrámua núnisar ti kajekar yujainiawai. Núnisaṉ ame ápaka mesetan unuimiátraiti tuma asa káshikia ni shuari̱ja̱i̱ṉkia iruntraṉka kanarchattawai.

⁹ Ju̱ nekaata, yamaikia wá̱a̱nmaṉsha núja̱i̱nchuka tui̱ṉsha ú̱mak pujawai. Tura nékachma nianiá jatetmákakri̱n meset yama naṉkammanumaṉ ame aentsrum kajinkiarmatai yaaksha nuna nekáa chichainiak ‘Apsarúna nemarainiaka nupetnakarai’ tíchartimpiash.

¹⁰ Túrunamtaiṉkia áishmaṉ ti kakaram úunt ya̱wa̱ enentái̱ya̱ tímianuitiat sapijmiaktatui. Warí Israer shuarka ashí nékainiawai ame apa ti kakarma núnaka núnisaraṉ aents niji̱a̱i̱ pujuinia nusha nisha tímiatrusaraṉ kakaram áiniana nunasha nékainiawai.

¹¹ Tura yamaikia ju̱na tájame Israer shuar ashí Tánnumia̱ juarki̱ Pirshiwia tímianai ámiji̱a̱i̱ iruntrarti. Kame nayantsa yantamén naikim írunna timianú untsurí iruntrarmatai antsu nui̱ṉkia timia amek mesetnumka wetá.

¹² Antsu nuiṉkia ashintiukar tui̱ pujutta nui̱ṉ sana nuṉkan ukateana nútiksar jatektai. Túrakrikia nisha tura aents niji̱a̱i̱ pujuiniana nusha chikichkisha iwiaakuka ikiukchartatji.

¹³ Tura chíkich péprunmaṉsha u̱mkamtaikia antsu nui̱ṉkia ashí Israernumia̱ chápik yaruakarar nu péprunam ashintiukar ashintsa tímianai japikir ikiankartai kayach chikichkisha nui̱ juáka̱i̱ṉ” tímiayi

¹⁴ Nuya̱ṉka Apsarún tura áishmaṉ Israernumia̱ nui̱ pujuarmia nu ashí chichainiak “Arkit aents Usái chichame̱ timiá péṉkeraiti Ajitupíra chichame̱ja̱i̱ṉkia” tiármiayi. Ajitupíra chichame̱ timiá péṉkerauyania núnaka Uunt Yus pachimprukmiayi Apsarúnan emeskattsa.

Apsarún urukatta nu Tawit ujakma

¹⁵ Nuiṉkia Yúsnan pujurin Satukan Awiatárja̱i̱ Usái chicharainiak “Ajitupírka Apsarúnan tura Israer shuara úuntri̱n ju̱na jú̱nis tiarmai tura wisha ju̱na jú̱nisan tiármajai.

¹⁶ Tuma asamtai Tawitian ju̱na ujakárat wárik akupkatarum. Jú̱ kashikia kampuntin atsú nuṉka pakarí̱i̱nkia kanarchati antsu Jurtan entsan katitkiti úunt akupin ashí shuar niji̱a̱i̱ pujuiniana nuja̱i̱ métek amunkara̱i̱ṉ” tímiayi.

¹⁷ Tura Junatánka Ajimiásja̱i̱ Intrujír yumirmat ayamach pujuarmiayi. Kame niṉkia péprunam wécharmin ásarmatai nuwá̱ takarin werí ujakártiniuyayi. Nuyá̱ niṉkia úunt akupniun weriar ujakártiniuyayi.

¹⁸ Túrasha uchi natsa nuna wainiak Apsarúnan ujakmiayi. Tuma ásar jímiar armia nuka tí warik jíinkiar Pajurímnium aents pujumia nuna je̱e̱n jeawarmiayi. Kame taurma yumirmatan ni á̱a̱ri̱n takakuya nui̱ init waya̱warmiayi.

¹⁹ Nuya̱ṉka nuwa̱ tarachi̱n achik yumirmata wa̱a̱ri̱ nukuk nui̱ trikiu pakarman matsakmiayi. Tura nuka peṉké nekanacharmiayi.

²⁰ Tura Apsarúna takarniúri̱ nuwa̱ je̱e̱n jeariar chicharainiak “¿Ajimiássha tura Junatáncha tui̱ pujuinia?” tutai nuwa̱ chichaak “Entsan katitraraijiá” tú ai̱kiarmiayi. Kame e̱a̱karsha wáinkiachar nuya̱ṉka Jerusaréṉnum waketrarmiayi.

²¹ Tura aents wéarmatai taurma yumirmatnumia̱ jíinkiarmiayi. Tura nuya̱ṉka wéar úunt akupin Tawitian ujak chicharainiak “Wetarum tura pee ajasam wárik entsa katitkitia. Warí Ajitupírka jatektarum tú chichakai” tiármiayi.

²² Nuya̱ṉka Tawitkia aents niji̱a̱i̱ írutra pujuarmia nuja̱i̱ irunar Jurtan entsan katitrarmiayi. Tura tsawa̱rmataiṉkia Jurtan entsan katitkichuka chikichkisha atsumiayi.

²³ Ajitupírka ni chichame̱n umirkacham umpururi̱n iwiar ekemak jiinkí̱ ni pépruri̱n je̱e̱ amia nui̱ waketkimiayi. Nui̱ je̱e̱n jeá írunun iwiarak ikiuak kaje̱mar jakamiayi. Túrunamtai ni aparí̱ ikiusmanumaṉ iwiarsarmiayi.

Apsarún akupeamunmaya̱ jí̱i̱kim jakamu

²⁴ Tawitkia Majanáimnium jeamiayi antsu Apsarúnka ashí Israer shuarja̱i̱ Jurtan entsan katitrarmiayi.

²⁵ Apsarúnka Juápai̱ya̱ṉka Amasan suntara uuntri̱ awajsámiayi. Amasaka áishmaṉ Israernumia̱ Itra tutai uchirí̱yayi. Kame nuka Juapa nukurí̱ kai̱ Sarwia umái̱ Najasa nawantri̱ Apikiáirja̱i̱ tsaniṉkiuyayi.

²⁶ Apsarúnka Israernumia̱ja̱i̱ Karaat nuṉkanam matsamkarmiayi.

²⁷ Tura Tawit Majanáimnium jeamtai Amun aentsu uchirí̱ Rapanmaya̱ Najasa uchirí̱ Suupi tura Rutepárnumia̱sha Amiara uchirí̱ Makir núnisaṉ Rujirímnumia̱sha Karaat aents Parsirái

²⁸ Tawitian itiaráiniak peakan amamkun ichiṉkian nuweja̱i̱ najanamun tríkiun sewatan trikiu nekeṉman sha nuikman uunt míkian rentejan

²⁹ míshkin muntsu kutamámun muriknasha tura waka muntsurí̱ kantékún Tawitian tura ashí aents niji̱a̱i̱ pujuarmia nu yuáwarat tusa ikiatkar súsarmiayi. Kame aents atsamunam matsamás tsukamainiak tura kitiakén pimpikiar matsatainiatsuash tu enentáimias núnaka túrawarmiayi.