2 Sam. 14 - Yus Papí: Shuarja̱i̱ Yus Yamaram Chicham Najanamu

Juap Apsarún wáketman iwiartamu

¹ Sarwia uchirí̱ Juapka Apsarúnan úunt akupin anemia nuna nekáa

² Tekuanmaya̱ nuwa̱ ti neka nu utitiarum tusa Juapka akupkámiayi. Tura chicharuk “Waitneasam ajakmárua núnisam ajakmáru entsatái̱ pushí entsarta tura asuitisha yakaamaraip. Antsu nuwa̱ ajakmár kuntuts nekapeak núkap tsawant útas pujá núnikta.

³ Nuya̱ṉka úunt akupin pujamunam waya̱a̱m niji̱a̱i̱ chichakum jú̱nisam titiá” tímiayi. Tura warinia títiata núnaka Juap mash jintintrámiayi.

⁴ Nú nuwa̱ Tekuanmaya̱ taa úunt akupin pujamunam wayá̱ árantak tikishmátar nijia̱i̱ji̱a̱i̱ nuṉkan antiastatuk tsuntsumpruá chicharuk “Úunt akupniu yáintkiata” tímiayi.

⁵ Tutai úunt akupin chicharuk “Warí urukamea” tímiayi. Tutai nuwa̱ aya̱k “Maa waitnentrurta, wikia wáje̱tjai winia áishruka jákaiti.

⁶ Ame takartámniuka jimiará uchin takakuyi. Tura kampunniunam wekasar mánikiarmai. Tura nuna tsuriṉtin atsá asamtai chíkich chikichan ijiú mamai.

⁷ Túrasha ju̱ nekaata yamaikia ame takartámniu shuari̱ ashí káutkar chicharainiak ‘Ni yachi̱n maaya nu yamaikia iin amasta. Iisha núnisrik ni yachí̱ mámunam maami túrar juak júkitniua nusha mashⁱ emesturmi’ tuíniawai. Tura nuja̱i̱ ji kapá̱a̱ núnin kaji̱niak winia aishru náari̱sha tura shuari̱sha jú̱ nuṉkanmaṉka sakarai” tímiayi.

⁸ Nuya̱ṉka úunt akupin nuwa̱n chicharuk “Ame je̱e̱min waketkitia tura wi ame itiurchatrumniaka íistatjai” tímiayi.

⁹ Tura Tekuanmaya̱ nuwa̱ úunt akupniun chicharuk “Winia úuntur úunt akupniu wi tura winia aparu shuari̱ makuntrarti. Antsu úunt akupniuka tura ni akupeamuri̱sha makuchma ártí” tímiayi.

¹⁰ Tutai úunt akupin chicharuk “Ámin yajauch chichartamna nuka winí̱ itiata nuya̱ṉka ititkia peṉké awajtámsashtatui” tímiayi.

¹¹ Nuyá̱ nuwa̱ aya̱k “Úunt akupniu waitneasam Uunt Yus ame Yúsrum enentáimtusta. Tura numpa ukarmanum yapajkiartin emesmaki̱ we̱e̱ṉ tura winia uchirnasha emestura̱i̱ṉ” tímiayi. Tutai úunt akupin chicharuk “Uunt Yuska iwiaakui. Tuma asamtai uchirmi muuke̱ya̱ṉka chikichik intiashkesha nuṉkanka iniarchattawai” tímiayi.

¹² Tutai nuwa̱ chicharuk “Waitneasam winia úuntur úunt akupniu ame takartámin chikichik chichamnaksha títin tsaṉkatkata” tímiayi. Takui̱ úunt akupin chichaak “Chichakta” tímiayi.

¹³ Tutai nuwa̱ chicharuk “¿Urukamtai Yusa shuari̱sha tuusha enentáimtam? Kame úunt akupin tu chichaakka niṉki makumawai. Warí, úunt akupniuka ji̱i̱ki̱ aju̱i̱miunka atakka awakechuiti.

¹⁴ Kame ti nekas ashí jákartiniaitji. Entsa nuṉká ukarma ataksha awaiṉkir shikikminkiait núniniaitji. Túrasha Yus iwiaakmanka jurutrámtsuji antsu ji̱i̱ki̱ akupkámun Níiniash ji̱i̱ki̱ akupnáka̱i̱ṉ tusa iyawai.

¹⁵ Tura winia úuntur úunt akupniun ju̱na títiaj tusan yamái tarijiai ‘Warí, aentsush sapijmiamtikrukarai. Túrasha ame takartámin enentáimias chichaak “Wats úunt akupniun chichastájai. Kame ni takarniúri̱ tana nuna umirkainti” tu enentáimprayi.

¹⁶ Warí úunt akupniuka takarniúri̱ chichame̱n anturak Yúsnan nérentin ajastinian emesturattsa wakeriniuya̱ nuya̱ṉka winiasha uchirja̱i̱ métek uwemtikrurminiaiti’ tajai.

¹⁷ Ame takartámin chichaak ‘Winia úuntur úunt akupin ai̱rkattana nuka shiir enentáimtikrurti. Warí winia úuntur úunt akupniuka Yusa suntarí̱ya núnis asa yajauchincha tura péṉkernasha nekaatniun jeawai. Kame Uunt Yus ame Yúsrum ámiji̱a̱i̱ pujusti’” tímiayi.

¹⁸ Nuya̱ṉka úunt akupin nuwa̱n aya̱k chicharuk “Waitneasam wi aniastatjamna nuka ú̱rtutsuk ujatkata” tutai nuwa̱ chichaak “Winia úuntur úunt akupin chichakti” tímiayi.

¹⁹ Takui̱ úunt akupin anintrak “¿Jú̱naka Juápchak jú̱tiksam titiá tusa ashí túrama?” Tutai nuwa̱ aya̱k “Winia úuntur úunt akupniu nekas tame. Ame chichamna nuya̱ṉka yaaksha menanmaani̱ṉsha núja̱i̱nchuka untsurnumaani̱ṉsha kanakchamniaiti. Nekasaiti winia úuntur úunt akupniu, ame takartámin Juap wíniaka akuptúkai. Ame takartámin chichakainia nú chichamnaka niṉki ashí akattúrai.

²⁰ Ame takartámin Juapka yamái naṉkamana nú yapajniát tusa núnis túrayi. Túrasha winia úuntruka ti nékaiti. Kame Yusa suntari̱ji̱a̱i̱ métek ashí nuṉkanam íruneana núnaka nékawai” tímiayi.

²¹ Nuya̱ṉka úunt akupin Juápan chicharuk “Nekaata, yamái wi ju̱na tsaṉkatjame. Weme natsa Apsarún awaiṉkim itiata” tímiayi.

²² Nuna takui̱ Juapka ti arantúkmaja̱i̱ tikishmátar nijia̱i̱ji̱a̱i̱ nuṉkan antiastatuk tsuntsumpruá úunt akupniun shiir pujutnum yumiṉkramiayi. Tura Juap chicharuk “Ame takartámin ame waitnenkartutairmin wáinkiainia nuna yamái nekaayi. Winia úuntur úunt akupniu tura ni takarniúri̱ seamman úunt akupin umirkayi” tímiayi.

²³ Nuya̱ṉka Juapka wajaki̱ Jesurnum wémiayi tura Apsarúnan Jerusaréṉnum itiamiayi.

²⁴ Túrasha úunt akupin chichaak “Wíniaka íirtsuk ni je̱e̱n wetí” tímiayi. Tutai Apsarúnka úunt akupniunka íitsuk ni je̱e̱n wémiayi.

Apsarún Tawitiai̱ jeamu

²⁵ Kame ashí Israernumka iismasha chíkich áishmaṉ shíiram asamtai Apsarúnja̱i̱ métek ti shiir awajtai̱ṉkia peṉké atsumiayi. Kame nawé̱ pakari̱ya̱ juárkin muuke̱a tímianaisha imiatkintri̱ṉkia peṉké atsurmiayi.

²⁶ Intiashí̱n tsúpiakka (uwí amúamunam tsúpiniuyayi intiashí̱ ti kijin asamtai) intiashí̱ kijintri̱ṉkia tusiantu sikru nekapek jean tsupi wémiayi.

²⁷ Kame Apsarúnka menaintiú uchi áishmaṉkan tura chikichik nuwa̱nak yajutmarmiayi. Nawantri̱ṉkia Tamar náartiniuyi. Nisha tí shiirmachiyayi.

²⁸ Apsarúnka Jerusaréṉnum jimiará uwí pujusmiayi túrasha úunt akupniunka peṉké wáinchamiayi.

²⁹ Tura Apsarúnan úunt akupniui̱ akupkátaj tusa Juap untsuká uturtitiarum tusa akupkámiayi túrasha Juapka ni pujamunam weritniun nakitrámiayi. Tura ataksha untsukmiayi túrasha nui̱sha táchamiayi.

³⁰ Nuya̱ṉka Apsarún ni takarniúri̱n chicharainiak “Juapa nuṉké winia nuṉkarja̱i̱ métek ana nui̱ sewatan takakui. Werum jiji̱a̱i̱ akáa ikiutárum” tusa akupkarmiayi. Tutai Apsarúna takarniúri̱ jiji̱a̱i̱ akáa ikiuwearmiayi.

³¹ Nuya̱ṉka Apsarúna je̱e̱n weri Juap chicharuk “¿Urukamtai ame takarniúram winia nuṉkarun ekemátrukara?” tímiayi.

³² Takui̱ Apsarún Juápan aya̱k “Nekaata wi ámin winitriti tusan untsukjame úunt akupin pujamunam werim chicharkum ¿Urukamtaik Jesurnumia̱sha ju̱i̱sha támaj? Nekaska ai̱ṉ péṉker pujua̱a̱jai. Tuma asan yamaikia úunt akupniun íistinian wakerajai tura winí̱i̱ tunáa ákuiṉkia antsu nui̱ṉkia mantuati” tímiayi.

³³ Nuya̱ṉka Juap úunt akupniun werí ujakmiayi. Nuyá̱ Apsarúna untsukmiayi tura untsukam úunt akupin pujamunam wayá̱ tikishmátar nijia̱i̱ji̱a̱i̱ nuṉkan antiastatuk tsuntsumpruámiayi. Túram úunt akupin Apsarúnan mukunámiayi.