2 Sam. 13 - Yus Papí: Shuarja̱i̱ Yus Yamaram Chicham Najanamu

Amnun umai̱n Tamaran yajauch awajsamu

¹ Tawitia uchirí̱ Apsarúna umái̱ shíirmachin Tamaran aya̱kuyi. Tura chíkich tsawant Amnun Tawitia uchirí̱ Tamaran tuke enentáimtus pujumiayi.

² Amnunka ni umái̱ Tamaran tí enentáimtus suṉkurmakmiayi. Túruna jakamnia nekapramiayi. Kame niṉkia áishmaṉnasha nékachu asamtai Amnunka niji̱a̱i̱ warinkish túratniun jeachmai.

³ Tura Tawitia yachi̱ Semái uchirí̱ Junatápka Amnuna amikrí̱ṉkia tí enentáimin áishmaṉkauyayi.

⁴ Tura chichaak “Úunt akupniu uchiri̱yá ¿ju̱sha urukamtai tuke tsawantcha watsaki̱ watsaki̱ wéam nuka wíniaka ujatkachminkiaitiam?” Tutai Amnun chicharuk “Winia yatsuru Apsarúna umai̱n Tamaran tí aneajai” tímiayi.

⁵ Nuyá̱ Junatáp chichaak “Ajakmampram peakrumin tepesta. Túram ame apa iirmastaj tusa támatai chicharkum ‘Winia umar Tamar yurumkan surus ikiuraiti. Wisha pujajna ju̱i̱ṉ yurumkan iwiar surus ikiuraiti wisha umaru uwejé̱n yuátaj’ titiá” tímiayi.

⁶ Kame Amnunka jaajai tusa ajakmamar tepesmiayi. Tura úunt akupin íistaj tusa tarim Amnun úunt akupniun chicharuk “Winia umar Tamar winitriti tusan seajme. Winí̱i̱ taa páṉkan iniarkámtai ni uwejé̱ya̱n yuátaj” tímiayi.

⁷ Tutai Tawit Tamaran ni je̱e̱n pujan chicharuk “Yamaikia ame umai̱mi je̱e̱n weme yurumak iniartukam ayuram ikiuta” tímiayi.

⁸ Tutai Tamarka ni umái̱ Amnuna je̱e̱n wémiayi. Tura umai̱sha peaknum tepai̱ṉ niṉkia arinian achik pachimiak páṉkan najanamai. Nuyá̱ iniarkámiayi.

⁹ Tura piniṉkian achik paṉ iniarkámun umai̱n apujtusmiayi. Túramaitiat yurumátniun nakitrámiayi. Nuyá̱ Amnun chichaak “Ju̱ya̱ṉka mash jíintratarum” tutai ashí jíintrarmiayi.

¹⁰ Nuyá̱ Amnun Tamaran chicharuk “Kanutairui̱ yurumkaka itiartitia wi ame uwejmíya̱n yuátaj” tutai Tamarka yurumak iniarkámun jurukí̱ umái̱ kanutairi̱n werimiayi.

¹¹ Ni umái̱ yurumát tusa súam Amnun umai̱n uwejnum achik emeta chicharuk “Umaruá iiji̱a̱i̱ pujustai” tímiayi.

¹² Tutai Tamar aya̱k “Atsá umachiru wakerutkaip. Nuní̱ túmatniuka Israernumka nuka túrushtainti. Peṉké yajauch awajtúsam túrutawaip.

¹³ ¿Winia natsantruja̱i̱ natsaamaknasha warí urukatjak? Ámeka Israernumia̱ṉka tí yajauch nekaamu átatme. Yamaikia úunt akupin chichasai tusan seajme niṉkia wíniaka ámin íkturmas iniaitiústatui” tímiayi.

¹⁴ Támaitiat nin anturkatniun nakitrámiayi. Nuyá̱ kaká kakanak achik aji̱a̱r umai̱n turú pujus yajauch awajsámiayi.

¹⁵ Nuiṉkia Amnun ti kajerak peṉké nakitramiayi. Tura yamaikia yaunchu aneenuya núja̱i̱sha naṉkaamas nakitramiayi. Túram Amnun chicharuk “Nantaki̱ werumta” tímiayi.

¹⁶ Tutai nuwa̱ aya̱k “Atsá, winia ju̱ yajauch túrutamna nu tura a̱a̱ ji̱i̱ki̱ ajapruamna ju̱ka nuja̱i̱ naṉkaamas peṉké yajauchiti” tutaisha Amnunka nunasha peṉké anturkachmiayi.

¹⁷ Nuya̱ṉka ni yáintri̱n untsukmiayi tura chicharuk “Ju̱ nuwa̱ a̱a̱ jí̱i̱kim aju̱i̱tiá túram waiti epettia” tímiayi.

¹⁸ Kame niṉkia nuntuaru pushí uku̱jtiúrman entsaruyayi. Warí úunt akupniu nawantri̱ áishmaṉja̱i̱ tsaniṉcha armia nuka túman entsáu ármiayi. Nuya̱ṉka Amnuna takarniúri̱ Tamaran a̱a̱ ji̱i̱ki̱ aju̱í̱ wáitin epetmiayi.

¹⁹ Nuyá̱ Tamar yuṉkunmin muuknum yukumimiayi tura entsatái̱ uku̱jtiurman entsaruya nuna jáarmiayi tura uwejé̱ja̱i̱ muuke̱n achis untsumki̱ waketkimiayi.

²⁰ Apsarún umai̱n chicharuk “Amnun ame umai̱m nekasaṉ ¿yajauch awajtámsa? Auka takamáttsata winia umaru. Warí ame umai̱miti tuma asamtai nuka yamaikikia tikia enentáimtusaip” tímiayi. Nu tutai Tamarka atsaṉkrachmin ajas ni umái̱ Apsarúna je̱e̱n juákmiayi.

²¹ Nuya̱ṉka úunt akupin Tawit nuna antuk nekáa ti kajekmiayi.

²² Tura Apsarún Amnunnaka péṉkerja̱i̱sh tura yajauchija̱i̱sh áujtanash peṉké áujchamiayi. Apsarúnka Amnunan peṉké nakitmiayi ni umái̱ Tamaran yajauch awajsa asamtai.

Apsarún yapajmiákma

²³ Nuyá̱ ukunam jimiará uwí naṉkaamasu ai̱ Apsarúnka murikiu ure̱n tsupirniun takakuyayi. Paarasúrnum Eprainnium ápatnik amia nui̱ Apsarúnka ashí úunt akupniu uchirí̱ armia nuna ipiaamiayi.

²⁴ Nuya̱sha Apsarún úunt akupniu tarí chicharuk “Nekaata yamaikia ame takartámniuka murikiu ure̱n tsupirin ainia nuna takarui. Waitneasam úunt akupniu ame takartámin ainia nuja̱i̱ tura ámin yaintma ainia núja̱i̱sha winitiárum tusan ipiajrume” tímiayi.

²⁵ Tu tutai úunt akupin Apsarúnan aya̱k “Atsá, winia uchiru túrutmena nuka máshikia winichartatji. Kame ashí winiakrikia ámin tí itit awají̱j tusar nakitiaji” tímiayi. Winit tusa nú arant chichaki̱ wémiayi túrasha nakitrayat wétsuk shiir pujutnum yumiṉkramiayi.

²⁶ Nuyá̱ Apsarún chicharuk “Núja̱i̱nchuka winia yatsur Amnun iiji̱a̱i̱ winit akupkata” tutai úunt akupin aya̱k “¿Urukamtaik ámiji̱a̱i̱sha winit?” tímiayi.

²⁷ Apsarúnka nu arant Tawitniaka tuke seakí̱ wémiayi túramtai úunt akupniu uchirí̱ji̱a̱i̱ wéarat tusa Amnunnasha iniaisámiayi.

²⁸ Apsarún ni takarniúri̱n útsuiniak chicharainiak “Amnun wíniun umar nampekmatai wi atumí chicharkun pai yamaikia Amnun ijiutarum takui̱ mátarum. Ashamkairap ¿Warí auka wíchak útsuajrum? Kakaram ajasrum áishmaṉ ajastarum” tímiayi.

²⁹ Apsarúna takarniúri̱ armia nu Amnun túratarum tusa akupkámia tímiatrusaṉ túrawarmiayi. Nuya̱ṉka úunt akupniu uchirí̱ ashí wajakiar aṉkant aṉkant umpururi̱n ekemkar pisararmiayi.

³⁰ Niṉkia jintiá wenai̱ Apsarún úunt akupniu uchirí̱ armia nuka ashí máamuiti tura ní shuar armia nuka chikichkisha juákchaiti táman Tawit antukmiayi.

³¹ Nuyá̱ úunt akupin wajaki̱ ni pushiri̱n ja̱a̱k nuṉká pujusmiayi. Tura ni takarniúri̱ armia nusha ashí ni pushiri̱n ja̱a̱rarmiayi.

³² Tura Semái uchirí̱ Junatáp Tawitia yachi̱n tarí chicharuk “Winia uuntru, úunt akupniu uchirí̱ natsa armia nuna ashí máwaruiti tuinia nuka ámeka nekasaiti tuuka enentáimsaip. Antsu aya Amnunak jákaiti. Kame nuka Amnun ni umai̱n Tamaran yajauch awajsámia nuja̱i̱ Apsarún chichaman jurus maiti.

³³ Yamaikia winia uuntru úunt akupniu ántar chichaman ujatmainiak ‘Úunt akupniu uchirí̱ arma nuka jákaruiti’ tuinia nuka nekasaiti tu enentáimtusaip antsu Amnun níchik mámuiti” tímiayi.

Apsarún pisarma

³⁴ Tura Apsarúnka pisarúyayi. Tura natsa jintiá iin paṉkái̱ íimiaj tukamá untsurí aents etsa̱ akatainmaani̱ya̱ naint yantam jintiak wininian wainkiamiayi.

³⁵ Nuiṉkia Junatáp úunt akupniun chicharuk “Nekaatarum úunt akupniu uchirí̱ wininiawai. Ame takartámin ujatmákmia núnis túrunamiayi.”

³⁶ Tura chichasua úmisu ai̱ṉ úunt akupniu uchirí̱ táarmiayi tura nuna chichakiar útiarmiayi. Núnisaṉ úunt akupin ni takarniúri̱ji̱a̱i̱sha tí kuntuts enentáimprar útiarmiayi.

³⁷ Apsarúnka pisar Amijiúta uchirí̱ Tarmai Jesurnumia̱ úunt akupin pujamunam wémiayi. Túrasha Tawitkia ashí tsawant uchirí̱n enentáimtus útmiayi.

³⁸ Apsarúnka pisar Jesurnum wémiayi. Túruna menaintiú uwí nui̱ pujusmiayi.

³⁹ Tura úunt akupin Tawitkia Amnun jakamunka nea̱ nútsuru asa Apsarúnnaka íistinian wakerak aya jámiayi.