2 Sam. 10 - Yus Papí: Shuarja̱i̱ Yus Yamaram Chicham Najanamu

Amun aentsun Tawit nupetkamu

¹ Nuya̱ṉka Amun nuṉka úunt akupniuri̱ jakamiayi. Nu naṉkaamasmatai ni uchirí̱ Janun úunt akupin ajasmiayi.

² Nuiṉkia Tawit enentáimias “Ni aparí̱ waitnentriniuyania nútiksanak wisha Najasa uchirí̱ Janunan waitnentrattajai” tímiayi. Tusa ame apa jaka asamtai iisha kúntuts nekapeaji tiar péṉker enentáimtikrarat tusa Tawit ni takarniúri̱n akuprámiayi. Túrasha Amun aentsu uchirí̱ nuṉke̱n Tawitia takarniúri̱ jeawarmatai

³ Amun aentsu uchirí̱ uuntri̱ armia nu ni uuntri̱ Janunan chicharainiak “¿Tawit ame apan shiir awajeak iisha kúntuts nekapeaji tiar péṉker enentáimtikrurarat tusa Tawitkia ni takarniúri̱n akupráyi tuuk enentáimiam? ¿Antsu pepru emeskami tusanchuk émamkesrum íisrum mamikmárum ikiutárum tusanchuk Tawitkia takarniúri̱n akuprara?” tiármiayi.

⁴ Nuya̱ṉka Tawitia takarniúri̱n Janun achir yaruakmiayi. Túrawar susuri̱n ájapeni̱ṉ awaarar kesá kesatú awajsar núnisaraṉ pushiri̱ncha tsumua tímianai tsupirar akuprarmiayi.

⁵ Nuna Tawitian ujakármiayi tura nu áishmaṉ ti natsa̱a̱raru ásarmatai iṉkiutarum tusa aentsun akuptúkarmiayi. Tura úunt akupin chichaman akuptuiniak “Susuri̱ tsakarmám Jirikiúnmaṉ matsamsarti ukunam taarmi titiarum” ti akupkarmiayi.

Sírianmaya̱ja̱i̱ Amunnumia̱ suntar iruntraru nupetkarma

⁶ Tura Amun aentsu uchirí̱ Tawitji̱a̱i̱ nemasmanaikiarmia nuna nekamawarmiayi. Túrunawar Sírianmaya̱ aents Pitrejúpnum tura Súupanam pujuarmia nuna akikiar painti mir áishmaṉkan nuṉkak mánin armia nuna ni suntari̱ awajsarmiayi. Núnisaraṉ Máakanmaya̱ úunt akupniui̱ya̱ncha mir áishmaṉkan tura Istupnumia̱nka tuse mir áishmaṉkan niniu awajsarmiayi.

⁷ Tawit nuna antuk ashí suntar kakaram armia nuja̱i̱ Juápan akupkámiayi.

⁸ Tura Amun aents jíintrar mesetan juárkitiai tusar pepru wá̱i̱ti̱a̱i̱ri̱n pekamkarmiayi. Antsu Sírianam Suupa péprunmaya̱ṉka tura Rejupnumia̱sha tura Istupnumia̱sha núnisaraṉ Máakanmaya̱sha nu nisháa kampunniunmaani̱ matsamármiayi.

⁹ Kame Juapka eemsha tura úkumprusha meset juárkitniun nekáa Israer shuar nekas kakaram juurma armia nuya̱n suntaran júurmiayi. Tura Sírianmaya̱ja̱i̱ mesetan juárkitiai tusar suntar iruntrar pekamkarmiayi.

¹⁰ Tura suntar tiárunka ni yachi̱ Awisháin íktusmiayi. Tura nisha núnisaṉ Amun aentsu suntari̱ji̱a̱i̱ mesetan juárkitiai tusar suntar iruntrarun pekakmiayi.

¹¹ Nuyá̱ Juap chichaak “Sírianmaya̱ suntar wiji̱a̱i̱ naṉkaamas kakaram áiniakui̱ṉkia ame yaintkiattame tura Amun aents ámiji̱a̱i̱ naṉkaamas kakaram áiniakui̱ṉkia wi yáiṉtatjame.

¹² Ii aentsri̱ tura ii Yusri̱ pépruri̱ enentáimtusam kakaram ajasta túrar kakaram mániktai tura Uunt Yussha tuna péṉker iiyá núnis túrati.”

¹³ Nuna tuasuá Juapka suntar niji̱a̱i̱ pujuarmia nuja̱i̱ irunar Sírianmaya̱ja̱i̱ mániktai tusar weantúkarmiayi. Túrasha Juápan wáinkiar pisakármiayi.

¹⁴ Amun aents Sírianmaya̱ pisainian wáinkiar nisha Awishái̱ya̱ṉka pisararmiayi túrunawar péprunam ú̱mkarmiayi. Nuyá̱ Juapka Amun aents mániktinniaka iniais Jerusaréṉnum waketkimiayi.

¹⁵ Israer shuar nupetmakarmatai Sírianmaya̱ aentska waketrar ataksha iruntrarmiayi.

¹⁶ Kame Atatesérka Sírianmaya̱ aents entsá amaini̱ pujuarmia nuna ikiankatniun akuprarmiayi. Nuya̱ṉka Iramnum káunkarmiayi tura ni úuntri̱ṉkia Atateséra suntara uuntri̱ Supakauyayi.

¹⁷ Tura Tawit nu ujakam Israer shuaran ashí irur Jurtan entsan katitki̱ Iramnum jeawarmiayi. Tura Sírianmaya̱ suntarka Tawitji̱a̱i̱ mesetan juárkitiai tusar suntar iruntrarun pekakarmiayi tura Tawitji̱a̱i̱ iṉkiuniawar mánikiarmiayi.

¹⁸ Túrasha Sírianmaya̱ suntarka Israer shuara suntarí̱ya̱ṉka pisakármiayi. Kame Tawitkia Sírianmaya̱ aents kárunam eṉketáinianka siatisiántu tura kawainium eketáinianka kuaraintia mir suntaran mámiayi. Núnisaṉ suntara uuntri̱ Supaknasha íjiuarmiayi túram nisha nui̱ṉ jakamiayi.

¹⁹ Tura úunt akupin Atateséran mesetnum ashí yaintri̱ armia nuka Israer shuar nupetmakarun wáinkiar Israer shuarja̱i̱ aṉkant matsamsatniun chichaman najanawarmiayi túrunawar ni iniatairi̱ ajasármiayi. Nuyá̱ Amun aentsun yáiṉtinniaka Sírianmaya̱ṉka peṉké ashamkarmiayi.