2 Kur. 9 - Yus Papí: Shuarja̱i̱ Yus Yamaram Chicham Najanamu

Yus shuar kuítrincha yaiṉma

^1-2 Kame átum Yus shuar kuítrincha súsatin wakerarme, nuna nékajai. Tuma asan núnaka áatrachminiaitjiarme. Atumsha súsatin wakera asakrumin wi nunasha shiir enentáimsan “Akayanmaya̱ shuar nuik uwitinia wakerusmatak yáiṉtinian wakeruiniawai” tusan Masetúnianmaya̱ shuaran ujaajai.

³ Tura “kuítniasha súsatniun ti wakeruiniawai” tímiaj nuna “wáitiaiti” tíara̱i̱ṉ tusan nakitiajai. Tuma asan kuit susatajtsa wakerarum nu iwiaratarum tusan nu menaintiú Yus shuaran nuna yaintmakarat tusan emka akupénajai.

⁴ Wi ukunam Masetúnianmaya̱ shuarja̱i̱ atumíin jean, kuit súsatin tímiarmena nuna iwiarachman wainkian natsa̱a̱ra̱i̱j tusan tura atumsha natsa̱a̱ra̱i̱rum tusan túrajai. Warí, súsatniun ti wakeruiniawai tuke tu wéatsjak.

⁵ Nu tuma asamtai au takui̱ suarme tu enentáimsara̱i̱ṉ tusan ju̱ Yus shuaran emka akupénajai. Nisha nu kuítian iwiaratniun yainmakarti tajai. Nuiṉkia wisha Masetúnianmaya̱ aentsja̱i̱ ukunam jeawakrin nu kuit atumsha nekas atumí enentái̱ji̱a̱i̱ṉᵏⁱ súsatin wakerarmena nu nekaamnia átatui.

⁶ Tura ju̱nasha paant tájarme, ishichik araana nu ishichik júuktatui. Núkap araana nusha núkap júuktatui. Kame kuit súsatniuja̱i̱sha núniskete.

⁷ Tura ashí shuar ni enentái̱n enentáimna nunak susati. “Nakitiayatnak susatjai” tíchamniaiti. “Turutainiakui susatjai” tíchamniaiti. Shiir enentáimias súana núnaka Yuska shiir enentáimtawai.

⁸ Ashí péṉker ana nuna súrak Yusa waitnenkartutairi̱n tí nukap Yus amasminiaiti. Nuja̱i̱ átum wariṉkish atsumashtatrume. Túrasha chikichan yáiṉtin atsumattamna nui̱ṉ núkap takustatrume. Nuja̱i̱ ashí péṉker túratin jeattame.

⁹ Yus Papinium ju̱ aarma awai. Kuítrinchan núkap susayi. Nuna tura, tuke túratin átatui.YKan. 112:9

¹⁰ Arakmaun arakan súana nusha Yúsaiti. Tura yurumkan súana nusha Yúsaiti. Nisha átum péṉker araatniun suramsattarme. Tura araarumna nuja̱i̱ péṉker túratarum tusa arakrumin ipiampártatui.

¹¹ Tuma asamtai núkap juukma takaku asarum núkap súsatin jeattarme. Nuiṉkia súarmena nuna ii uwejé̱ya̱n chíkich Yus shuar achikiar Yusan yumiṉsartatui.

¹² Warí, ju̱ kuit Yus shuar kuítrincha súakrin ni atsumamuri̱ncha atsumachartatui. Tura nú naṉkaamas Yusan ti yumiṉsartatui.

¹³ Nu shuar yaiṉtai tusarum tura ashí Yus shuar yaiṉtai tusarum súatsrumek. Nuja̱i̱ Kristu shiir chichame̱n umíarmena nuna nékainiawai. Tura kuítrum ementutsuk sua asakrumin nisha Yusa náari̱n uunt awajsártatui.

¹⁴ Kame Yus atumín ti waitnentramainiakui kuítrum súatsrumek. Sua asakrumin nu shuar atumín ti anenmainiak Yusan áujturmasartatui.

¹⁵ ¡Tura ashí iisha ii Yusri̱ ti yumiṉsatniuitji! ¿Iin súramjinia nuna yaki jintíartinian jeá?