2 Kur. 5 - Yus Papí: Shuarja̱i̱ Yus Yamaram Chicham Najanamu

¹ Wats ju̱ nékaji. Nayaimpiniam ii shiir pujustinian amukachmin aya̱shin Yus najanamun ikiurtámsaitji. Aents najanachmaiti nu. Tuma asamtai ii aya̱shi̱ emesnakuisha warí itiurtamajia. Nuka aaka núnisaṉ amukámniaiti.

² Ju̱ aya̱shnium pujusár wáitiaji, taji. Yamaram aya̱sh nayaimpiniam pujana nu achiktai tusar wakeraji.

³ Aya̱shtichu ajasá̱i̱j tusar yamaram aya̱shtin ajastaitsar wakeraji. Pushía núnik yamaram aya̱sh iin nukurmáktai tusar wakeraji.

⁴ Tura aya̱shji̱a̱i̱ ju̱i̱ pujusár wáitsar pujakur shiir enentáimtsuji. Arut pushí áiktinia núnisrik ju̱ aya̱sh ikiuktiaitsar tátsuji. Antsu yamaram pushí entsartinia núnisrik yamaram aya̱shnium tuke pujusmí tusar taji. Iistá, ju̱ aya̱sh amuukachminkiait. Yamaram aya̱shnium pujusár tuke iwiaaku pujustatji.

⁵ Yamaram aya̱shtin ajastinian iwiarturmaruitjinia nu Yúsaiti. Tura nekas túrattajai tusa ni Wakaní̱n suramsaitji.

^6-7 Ju̱ nékaji. Ju̱ aya̱shnium pujajnia ju̱i̱ṉkia Uunt Jesusja̱i̱ pujatsji. Tuma asamtai wáinjinia nu ti enentáimtutsuk Yus enentáimtusar tuke shiir enentáimsar wekaaji.

⁸ Tura ju̱ aya̱shniumia̱ jíinkir Uunt Jesusja̱i̱ tuke pujustaitsar wakeraji. Tura túrattaji tu nékaji.

⁹ Tuma asamtai ju̱ aya̱shnium pujakrisha tura ju̱ aya̱sh ikiukrisha Uunt Jesus tuke waramtiksatai taji.

¹⁰ Warí, ju̱ aya̱shji̱a̱i̱ ii túramajnia nu ujakam “péṉkeraiti,” “yajauchiti” Kristu turutit tusar ashí iisha Uunt Kristui̱ jeatniuitji. Tura ii túramuja̱i̱ métek akirmáktatji.Rum. 14:10; Ipi. 6:8; Apu. 22:12

Krístun waramtiksataj tajai

¹¹ Tuma asamtai ju̱ nékaji. Uunt umirkashtin ti tsuumainti. Nu enentáimsar ashí shuar nekasa nuna nekaawarti tusar ti takaaji. Urukuitiajⁱ nuna Yus paant nekarmaji. Atumí enentái̱ncha nusha paant atí taji.

¹² Ataksha “wi péṉkeraitjiai” tusar nu tátsuji. Antsu ii túramu nekáa asakrumin enentáiniam ana nuna enentáimtsuk aya pátatkea nuja̱i̱ warainia nú shuar tsanumprutmainiakrin yáiṉkratkatarum tusar taji.

¹³ “Wáurkaiti” turamainiajiash. Nusha warí, itiurtamajia. Ashí túrajnia nu Yus aneakur tura atumín yaiṉtai tusar túraji.

¹⁴ Kame ashí ii túrajnia nu Kristu aneṉkrattairi̱ji̱a̱i̱ túraji. Kame ju̱ nékaji, Kristu ashí shuaran jaruku asamtai Yus íimmianum ashí iisha jaka núnisaitji.

¹⁵ Kristu ashí shuaran jaruk nantarkimiayi. Tuma asamtai Krístunam iisha iwiaaku pujajnia ju̱i̱ iik wararmamtsuk Kristu umirkatniuitji.

¹⁶ Tura yamaisha aya ni aya̱shi̱ iirsar “nu shuar péṉkeraiti” tura “nu shuar yajauchiti” títin tujintiaji. Kame yaunchu aya ni aya̱shi̱ iirsar “Kristu yajauchiti” tu enentáimsamiaji. Tura yamaikia yapaji̱ár, esettsar enentáimkiur “Kristu Yusa Uchirí̱nti” taji.

Krístuja̱i̱ yamarmaitji

¹⁷ Tuma asamtai, Krístunu ajasúka yamaram najanamuiti. Yaunchu enentáimtai̱ meṉkakaiti. Antsu núnaka íikias ni enentáimtairi̱ṉkia nekas yamaram ajasuíti yamaikia.

¹⁸ Nunasha Yus túraiti. Iin nawampramkattsa Krístun akuptúrmakuitji. Tura nu etserkatniun iincha ataktamsaitji.

¹⁹ Yuska iin tunaarinniutin asutiámatniun nakitiak Krístuja̱i̱ nawampramkamiaji. Tura iincha Yus shuartin nu ujaktinian ataktamsaitji.

²⁰ Krístunu ataksamu asar Yuska atumín suir íirmarmena nu atsaṉkrarum aṉkant ajasat tusa Krístuja̱i̱ nawamnaikiatarum tusa ii wene̱ja̱i̱ atumín seatmarme. Tuma asakrin Kristu náari̱i̱n túratarum tájarme.

²¹ Krístuka peṉké tunaarinchauyayi. Túmanak íi tunaari̱n Yus Krístun makumiayi. Nuna tura Kristui̱ iikia makuchmin Yusa péṉkeri̱ ajasúk tusa túraiti.