2 Kur. 12 - Yus Papí: Shuarja̱i̱ Yus Yamaram Chicham Najanamu

Papru aya̱shi̱ najaimiatin sunasma

¹ Kame wiki shiir chicharmamsatniun nakitiajai. Túmayatnak íimiarjana nuna tura Uunt Jesus iniaktursamia nuna ujaktiniaitjiarme.

² Krístun umirin ana nú aishmaṉkan nékajai. Nú aishmaṉ jimiará nayaimpin naṉkaikin menaintiú nayaimpiniam junakniuiti. Nusha katurse uwí naṉkaamasuiti. Kame aya̱shtiuk wakaashit tura aya̱shtichu wakaashit. Núnaka nékatsjai aya Yusak nékawai.

³ Tura nekas junakniua núnaka nékajai. Aya̱shtiuk wakaashit, aya̱shtichu wakaashit, núnaka aya Yusak nékawai.

⁴ Yus shuara wakaní̱ shiir pujutai̱nium junakmiayi. Nui̱sha paant awajsachmin ana nuna antukmiayi. Ni antukmia nú chicham paant awajsatniun suritkiamuiti.

⁵ Nú aishmaṉka túrunamuri̱ naṉkamakuiti tajai. Tura wikia naṉkamakuitjiai túmamtsuk kakarmachuitjiana nuna paant ujaajai.

⁶ Naṉkamakuitjiai túmamtiaj tusan wakeraknaka nekas tíminiaitjiai ántran tíchaintjiai. Túrasha túratsjai. Winia túramuruk wainkiarum winia chichampruk antukrum waritia enentáimsarum nuja̱i̱ métek enentáimtursatarum tusan wakerajai.

⁷ Wi nayaimpiniam wainkiamajna nu timiá peṉker asamtai ántar waantu enentáimtumaschatniun jaṉki mesertinia núnisaṉ winia aya̱shrui̱ najaimiatniun sunasmiajai. Nuka wi wáitsatin Satanásnumia̱ akupkámuiti.

⁸ Nuka jurutkitia tusan Úuntan menaintiú seamjai.

⁹ Tuma ai̱ṉ Uunt winia turutmiayi “Atsá. Jaa pujayatmek winia waitnenkartutairja̱i̱ shiir pujame. Shuar kakarmachun winia kakarmarun Wi súakui ashí aents nu shuara aya̱shi̱i̱n winia kakarmarun wainiainiawai.” Tuma asamtai Kristu kakarmari̱ winia aya̱shrui̱ paant ati tusan kakarmachuitiatnak araantatsjai.

¹⁰ Tuma asamtai wi Krístun aneakui shuar katsekruiniakuisha, kajertuiniakuisha, winia kuítrusha, kakarmarsha atsa̱i̱ṉ waraajai. Kame ashí itiurchat ana nui̱ kakarmachuitiatnak kakaram nekapeajai.

¹¹ Wi “péṉkeraitjiai” túmamkun waurua núnisnak chichaajai. Tura atumsha winia péṉker chichartusminiaitiatrumek túrachu asakrumin tu chichasjai. Warí, wi peṉké ántraitiatnak “tí peṉker akatrámuitji” tumamainia nú nuṉkachichuitjiai.

¹² Atumji̱a̱i̱ pujumiaj nui̱ itiurchat ámanmaṉ katsuntran takasmiajai. Yuska ni kakarmari̱n iniakmastaj tusa tí uuntan aents tujintiamun túratniun surusmiayi. Nuja̱i̱ “Papru nekas winia akatrámuruiti” tusa paant iniakmasmiayi.

¹³ Warí, chíkich Yus shuaran yáiṉmiaj núnisnak atumniasha yáiṉmajrume. Áyatik atumín “kuit surusta” tíchamjarme. ¡Nu yajauchitkiuiṉkia tsaṉkurturtarum!

Papru atak tátintri̱n ujakma

¹⁴ Jú̱ja̱i̱ṉkia menaintiú iwiarnarjai atumín íistaj tusan. Tura jeaknaka “etserkamun akirkatarum” tíchattajrume. Atumí kuítri̱n wakeratsjai. Antsu atumín wakerajrume. Warí, winia uchirchakaitrum. Uchisha aparí̱n kuítian ikiauntukchatniuiti. Antsu aparí̱ ni uchirí̱n kuítian ikiauntuktiniaiti.

¹⁵ Atumniasha yáiṉtaj tusan ashí takakjana ju̱na ajapawaintjiai tura winia kakarmarnasha ashí emeṉkákaintjai. Wi ti wakeramaitiatrum átumka ishichik wakerutarmini̱ṉ túrawaintjiai.

¹⁶ Túrasha chíkich shuar chichainiak “Nekasaiti. Papru niṉki ii kuítri̱n jurutrámkichmaji. Túrasha anaṉkartuatniun neka asa iin anaṉkramachmiashia” turutainiatsuk.

¹⁷ ¿Nusha itiura? ¿Shuaran wi akupkámaj nuja̱i̱ kuítrumin achikjiak?

¹⁸ Atumín íirmasat tusan Titiun “wetá” tímiajai. Tura nin atamprit tusan chíkich Yus shuaran akupkámjai. ¿Títiusha kuítrumin jurutrámkimkiarum? ¿Wisha nisha mái̱ metek enentáimsar métek takaschamkajⁱ?

¹⁹ ¿Warí enentáimsarum? ¿Átum péṉker áiniawai turutik tusar nu tájik? Antsu, aneamu yatsurtiram, ii tájinia nu atumín Yusai̱ tura Kristui̱ ikiaká̱rtajrum tusar taji.

²⁰ Wi atumíin jeaknasha, wi wáinkiataj tusan wakeraj nuna wáinkiashtatjai, tu enentáimsan itiurchat enentáimjiai. Tura atumsha wakerarmena núnisrumek wáinkiashtatrume, tu enentáimjiai. Yajauch chicharnaikiatniuncha, yajauch enentáimtunaistinniasha, kajernaikiatniuncha, niṉki enentáimtumastinniasha, tsanumpratniuncha, mái̱ tunai ajatniuncha, waantu enentáimtumastinniasha, yajauch wekasatniuncha, ashí nuna wáinkiashtajash tusan itiurchat enentáimjiai.

²¹ Tura wi jeaknasha, átum yajauch túratniusha, tsanirmatniusha tura yajauch ti wakerarmena nu, yaunchu túrimiarmena nu, untsurí shuartiram iniaisachurmena nuna nekashtajash. Tura enentáim yapají̱tsuk tuke tura asakrumin útchatjash tajai. Kame wi átum umikchamun nekaamtai Yus winia iniatsá̱trattawai tusan tsúumajai.