2 Jṉ. 1 - Yus Papí: Shuarja̱i̱ Yus Yamaram Chicham Najanamu

Nekasa nunasha tura anenaitniuncha ujaawai

¹ Wi Juaṉ Yus shuara uuntri̱ asan ii umái̱ Yus achikma nuna tura ni uchirí̱ncha ju̱ papin áateajai. Wisha nekasan atumín aneajrume. Tura aya wíkichu antsu ashí Yus shuar ainia nusha nekas chichaman nekaawaru ásar atumín anenmarme.

² Nekas chicham tuke amuutsuk ii enentái̱n pujá asamtai aneajrume.

³ Yus ii Aparí̱sha tura ii Uuntri̱ Jesukrístusha, Yus Apa Uchirí̱ asa, atumín anenmak aṉkant tuke shiir pujustinian waitnentramak yaintmakarti. Nuja̱i̱ nekas chicham nekaarum anenaittiarme.

⁴ Ame uchiram Yus Apa akupkámuja̱i̱ métek umiiniakui nuna nekaan ti shiir enentáimprajai. Nekas chichaman umin áiniawai.

⁵ Yamaikia, umaru, tájame, mái̱ anenai ajartai. Yamaram akupkámun áattsujme antsu yámankamtaik antukmiaj nunak tájame.

⁶ Nekas anenkartinia nú shuar Yus akupkámun uminiaiti. Tura Yus akupkámuka “anenkartin tuke atarum” tawai. Nusha yámankamtaikniumia̱ antukuitrume.

Anaṉkartincha írunui

⁷ Ju̱ nuṉkanam anaṉkartincha ti írunui. Jesukrístu nekas aents ajas akiiniamia nuna enentáimtuiniatsui. Nu shuar anaṉkartin ásar Kristu nemasri̱ áiniawai.

⁸ Nu shuarja̱i̱ aneartarum. Yajauch shuar ántar yaya̱krumin Yus átum takasman métek akirmákchamniaiti. Antsu aneara takasakrumin Yus métek akirmákarmi.

⁹ Ashí shuar Kristu jintíamun iniais “naṉkaamas nékajai” tana nu, Yúsnachuiti. Antsu Kristu jintíamun umíana nu shuar Yus Apaja̱i̱sha tura ni Uchirí̱ji̱a̱i̱sha mai̱ tsaniṉ pujawai.

¹⁰ Shuar nekas Kristu chichame̱n jintíachu atumí je̱e̱n íirmastaj tusa jeakui awayá̱wairap tura “shiir taume” tiirap.

¹¹ Kame nu shuar “shiir taume” tákumka nu shuar yajauch jintíamu jímiareame.

Umíamu chicham

¹² Tí nukap atumji̱a̱i̱ áujmatsatniun wakerajai. Túrasha ju̱ papinium mash áatrashtatjarme. Antsu imia wiki atumín iyakun jeatjai. Nuyá̱ naka chichasar ti shiir warastatji.

¹³ Ame kaim Yus achikma nuna uchirí̱ amikmátmainiawai. Nuke atí.