2 Akup. 6 - Yus Papí: Shuarja̱i̱ Yus Yamaram Chicham Najanamu

Iriséu jachan entsaya̱n inianásma

¹ Yúsnan etserin armia nuna uchirí̱ Iriséun chicharainiak “Ju̱ je̱a̱ ámiji̱a̱i̱ pujajnia ju̱i̱ṉkia ti uchichiti.

² Jurtannum wétin tsaṉkamkata nuyá̱ aṉkant aṉkant numi achiktatji. Túrar nui̱ pujustin je̱a̱mkattaji.” Tutai chichaak “Wetarum” tímiayi.

³ Nuyá̱ chikichik chichaak “Waitneasam ame takarniúrmiji̱a̱i̱ winitiá” tutai nisha “Ayu, winitjiai” tímiayi.

⁴ Nuiṉkia niji̱a̱i̱ wéarmiayi tura Jurtannum jeawar numin tsupirarmiayi.

⁵ Chikichik aents numí tsupí pujus jachan entsá aju̱ṉmiayi tura untsumuk “Maa, winia uuntru, ju̱ka ikiamsamuiti” tímiayi.

⁶ Nui̱ṉkia Yúsna aishmaṉ chichaak “¿Tui̱ iniaṉka?” tutai “Ju̱i̱ iniaṉkai” tusa iniaktusmiayi. Túramtai Iriséu numí tsupik jacha iniaṉmanum naṉkía jachan inianmimiayi.

⁷ Túrunamtai “Achikta” tutai uwejé̱n iwiaintiuk achikmiayi.

Iriséu Sírianmaya̱ aentsja̱i̱ túramu

⁸ Tura Siria nuṉka úunt akupniuri̱ Israer shuarja̱i̱ mesetan pujurainia ásar suntara úuntri̱ji̱a̱i̱ tui̱ṉ matsamkar mániataj tusar chichaman júsarmiayi.

⁹ Túrasha Yúsna aishmaṉ Iriséu Israera úunt akupniuri̱n chichaman akuptak “Anearta, nú nuṉkaka aṉkant iniaisaip. Kame Sírianmaya̱ suntar nuní̱ wéar matsamkartatui” tu ujakmiayi.

¹⁰ Tura Yúsna aishmaṉ nui̱ túrunatniun Israera úunt akupniuri̱n ujakam ni suntari̱n akupkarmiayi. Nuní̱ tura emka iwiaramiayi. Núnisaṉ ataksha nuyá̱ ataksha nuka untsurí túrunamiayi.

¹¹ Nuya̱ṉka Sírianmaya̱ úunt akupin nuja̱i̱ ti itiurchat enentáimiar ni takarin armia nuna untsukar chicharainiak “Turuttiarum ¿ya Israera akupniúri̱n atumíya̱ páchitkia?”

¹² Takui̱ chikichik takarniúri̱ chichaak “Maa, winia úuntur akupniu, chikichkisha atsawai antsu Yúsnan etserin Israernum pujana nú Iriséukete. Kame ame kanutairmin chichamna núnaka Israera úunt akupniuri̱n paant awajtawai” tu ái̱kmiayi.

¹³ Nuyá̱ akupin chichaak “Wetá, tui̱ṉ pujá iistá tura achikiárat tusan akuptúkartatjai.” Nuyá̱ “Tutannum pujawai” tu ujakármiayi.

¹⁴ Tuíniakui nui̱ṉkia úunt akupin aentsun kawaiji̱a̱i̱ tura núkap suntaran kárunam akuprarmiayi. Nuyá̱ kashi jeariar uunt péprun téntakarmiayi.

¹⁵ Tura Iriséu takarniúri̱ káshik nantaki̱ íimiaj tukamá nu péprun untsurí suntar ni kawairi̱ji̱a̱i̱ nuyá̱ mesetnum mánitiaiji̱a̱i̱ téntakarun wainkiamiayi. Tura nuya̱i̱k Iriséun werí chicharuk “¡Aushaa uuntru! ¿Iisha warí urukattajia?” tímiayi.

¹⁶ Tutai Iriséu aya̱k “Ashamkaip. Iiji̱a̱i̱ pujuinia nuka niji̱a̱i̱ naṉkaamas untsuríntji” tímiayi.

¹⁷ Tura Iriséu Yusan seak “Uunt Yusru paant awajtúsam nisha wainkiati tusan seajme” tutai Uunt Yussha Iriséu takarniúri̱n paant íimtiksamiayi. Túram untsurí aents kawaiji̱a̱i̱ mánitiai káruri̱sha keena Iriséu pujumia nuka mash téntakman wáinmiayi.

¹⁸ Nuyá̱ Sírianmaya̱ suntar winitiáiniam Iriséu Uunt Yusan seak “Ju̱ aents ji̱ ukusturarta” tímiayi. Takui̱ Iriséu seamia tímiatrusaṉ ji̱sha kusurú juákarmiayi.

¹⁹ Túrunawarmatai Iriséu chicharainiak “Ju̱ka jíntiachuiti, átum pepru e̱a̱rmena nusha jú̱chaiti. Antsu áishmaṉ e̱a̱rmena núnaka jintintian ejetjarme” tinia Samaria nuṉkanam yaruakmiayi.

²⁰ Nui̱ ejeniar Iriséu Yusan seak “Yamaikia Uunt Yusru íimiarti” takui̱ Uunt Yus íimtikiaram iimkiamá Samarianam ajapén wajamun nekamawarmiayi.

²¹ Tura Israera úunt akupniuri̱ nuna wáinkiar Iriséun chicharuk “¿Winia uuntru, máwartatjak?” tímiayi.

²² Tutai Iriséusha aya̱k “Atsá máwairap. ¿Wats ame mesetnum puya̱rumji̱a̱i̱ tura naṉkirmiji̱a̱i̱ misatak achikma mámniakaitiam? Tuma asamtai péṉker ayurawaram umartincha súsaram ni úuntri̱ni̱ṉ awakearta” tímiayi.

²³ Nuna takui̱ tímiatrusaṉ namperan najata péṉker ayuram tura umarar ní uuntri̱ni̱ṉ waketkiarmiayi. Nuya̱ṉka atakka Sírianmaya̱ mesetan unuimiátkaka Israer nuṉke̱nka wekaicha ajasármiayi.