2 Akup. 25 - Yus Papí: Shuarja̱i̱ Yus Yamaram Chicham Najanamu

Jerusaréṉ pepru akintrukma

¹ Kame Setekíaska nuiwi uwí akupin ajas pujái̱ tias nantutin tsawantka tiástin úunt akupin Napukutunusúr ashí ni suntari̱ji̱a̱i̱ mániatai tusa Jerusaréṉkan káutkarmiayi. Tura nui̱ matsamtúkar kumpinian najatkar téntakarmiayi.

² Tura Setekías aunse uwí akupin ajasma jeamunmasha nu péprunka tuke téntakar matsamtiarmiayi.

³ Tura nú uwitin kuatru nantu tura tsawantka nuíwitin péprunam ashí tsukamawarmiayi. Túrunamtai nú nuṉkanmaṉka yurumkaka peṉké atsumiayi.

⁴ Nu túmakui̱ pepru wenuke̱ chiṉkiamamiayi. Túrunamtai úunt akupniuja̱i̱ suntar mesetan unuimiátka armia nuka jintiak wáitinmaani̱ wéar jimiará wenukea nuke úunt akupniu kuku̱j ajarí̱ni̱ṉ Kartíu aentska péprun téntakar matsamtuiniai̱ṉ kashi jíintrar Arapánmaani̱ pisarar wéarmiayi.

⁵ Tura Kartíu suntarka úunt akupin Setekíasan apapékar Jirikiú pakarí̱n amayá̱ṉkarmiayi tura ni suntari̱nkia ipistukarmiayi.

⁶ Kame úunt akupin Setekíasnaka achikiar Papirúnia akupniúri̱ pujamunam Ripra péprunam júkiarmiayi. Túrawarmatai Setekíasan itiurkartata núnaka úunt akupin chichaman najatamiayi.

⁷ Nuyá̱ ni uchirí̱nkia nisha íimiai̱ṉ suen tsupirkar máwarmiayi. Antsu Setekíasnaka ji̱ ukuitrar yaṉkú jiruja̱i̱ jiṉkiawar Papirúnianam júkiarmiayi.

Jerusaréṉ pepru emeskamu

⁸ Tura úunt akupin Napukutunusúrka tiasinuíwi uwí Papirúnianmaya̱ akupin ajas pujái̱ seṉku nantu tsawantka siátitin úunt akupniu wáinin suntara uuntri̱ Napusaratán úunt akupniu yaintri̱ Jerusaréṉnum támiayi.

⁹ Túrawar Yusa Je̱e̱ncha tura akupin pujutai̱ je̱a̱ncha núnisaṉ ashí je̱a̱n nuyá̱ mátsatkamunam je̱a̱ uunt armia núnaka ashí ekemárarmiayi.

¹⁰ Nuyá̱ untsurí Kartíu suntar ni úuntri̱ji̱a̱i̱ taarmia nuka Jerusaréṉ pepru mátsatkamu wenuke̱ncha ashí yumpuararmiayi.

¹¹ Nuna tura Papirúnianam yarumainiak péprunam juákaru matsamármia nunasha tura niṉki sumamawarmia nunasha núnisaṉ arantaani̱ pujuarmia nunasha irurar úunt akupniu wainniu kapitiántri̱ Napusaratán wáketuk yaruakarmiayi.

¹² Tura kuítri̱ncha armia núnaka nuṉká takakmasar úwan arakmawarti tusa kapitián Napusaratán ikiukiármiayi.

¹³ Nuyá̱ Kartíu suntar Yusa Je̱e̱n sá̱a̱kiarmia nui̱ yaṉkú jiruja̱i̱ pauwa ánin najana atusmancha tura entsa pajamtai yaṉkú jiruja̱i̱ najankamuncha tsairar Papirúnia nuṉkanam yaruakarmiayi.

¹⁴ Nútiksaraṉ ichiṉnancha, yuṉkunim shikitiáincha, ji keá ikiajniátaincha, shikikiá jutai̱ncha, nuyá̱ yaṉkú jiruja̱i̱ najankamu nui̱ takakmatai̱ irunmia núnaka mash yaruakarmiayi.

¹⁵ Nuyá̱ úunt akupniu suntari̱ wainniu úuntri̱sha kuṉkuin áestai̱ncha nuyá̱ piniṉnasha kúriji̱a̱i̱ṉ najankamu armia nuna tura kuít jiruja̱i̱ṉ najankamu armia nunasha yaruakarmiayi.

^16-17 Saramúṉ Uunt Yusa Je̱e̱n je̱a̱muk pauri̱n tura nayantsan nakumak núnisaṉ shutukratniuri̱ncha yaṉkú jiruja̱i̱ najankamia núnaka kijin nekapmatai̱ji̱a̱i̱ mash nekapmatai̱ tukamá tujintkiarmiayi. Warí chíkich pauk tiasiúchu kuntu ásarmatai pau awajátniusha yaṉkú jiruja̱i̱ najanamu menaintiú kuntu jeá nájankur munchi nakumprukar péṉker iwiarkar najankamu armai.

^18-21 Kame suntara úuntri̱nkia Yúsnan pujurniu uuntri̱ Serayásan núnisaṉ chikichnasha Yúsnan pujurniun Supuníasan nuyá̱ waiti wáinniun menaintiun achikiármiayi. Áitkiasaṉ úunt akupniu yáintri̱ncha séṉkun tura aentsun achiniak papin áinian nuyá̱ ni yaintri̱ sasaintia armia nunasha achirármiayi. Tura Napusaratán Papirúnianmaya̱ úunt akupin pujamunam yaruakarmiayi. Kame Amat nuṉkanam Ripra péprunam ejewarmatai úunt akupin nui̱ máwarmiayi. Túrawar Jutá shuarnaka achirar yajá yaruakarmiayi.

^22-24 Tura aents Jutanam juákarun akupkarat tusa úunt akupin Napukutunusúrka Jetaríasan uuntri̱ anaikiamiayi. Tura úunt akupin Jetaríasan uuntri̱ anaikiamu nekaawarat Jutanmaya̱ suntara uuntri̱ tura suntarsha Jetaríasan iistai tusar Míspanam káunkarmiayi. Nui̱ táaruka Ismaer, Jujanán, Serayás tura Jasanías núnisaṉ aents niji̱a̱i̱ írutra armia nu káunkarmiayi. Tura Jetarías chichaak “Papirúnianmaya̱ náakam ainia nuka ashamkairap. Antsu ju̱i̱ juákrum Papirúnianmaya̱ úunt akupin takarsatarum túrakrumka péṉker pujustatrume” tiármiayi.

^25-26 Túrasha siati nantu jeamtai úunt akupin armia nu shuar Ismaer tias suntarja̱i̱ werí Jetaríasnaka máwarmiayi. Núnisaraṉ Jutanmaya̱ ántsaṉ Papirúnianmaya̱ aents niji̱a̱i̱ Míspanam pujuarmia nunasha kajeṉkármiayi. Túrawar Papirúnianmaya̱ aentsun ashamainiak Ejiptunam ashí pisakármiayi.

²⁷ Juakinkia achikma yajá jukimiu traintisiáti uwí pujumiayi. Tura nú uwitin nantu túsetin tsawantka paintisiáti ámanum Papirúnianmaya̱ úunt akupin Epirmirutak chikichik uwí akupin ajas pujá asa Jutanmaya̱ úunt akupniun Juakinkian tsaṉkur aṉkant awajás sepunmaya̱ṉka jí̱i̱kmiayi.

²⁸ Juakinji̱a̱i̱ṉkia amikrí̱ya núnis chichasmiayi tura akupin Papirúnianam niji̱a̱i̱ pujuarmia nuja̱i̱ naṉkaamas páantin awajás apujsamiayi.

²⁹ Sepunam pujusár entsatái̱ pushinkia yapajmiama ni pujumia nuiṉkia tuke tsawant Juakinkia úunt akupniuja̱i̱ yurummiayi.

³⁰ Kame ni pujumia nui̱ṉkia kuítian atsumak tuke tsawant úunt akupniui̱ya̱n tuke sukí̱ wéarmiayi.