2 Akup. 16 - Yus Papí: Shuarja̱i̱ Yus Yamaram Chicham Najanamu

Jutanmaya̱ úunt akupin Akaas

^1-10 Kame Akaaska painti uwí takaku Jutanam úunt akupin ajasmiayi. Nisha chíkich túrawarmia núnisaṉ yajauchin túramiayi. Núnisaṉ nu nuṉkanmaya̱ aents túrin armia núnis nisha ni uchirí̱n jinium áesamiayi. Áitkiasaṉ najankamu yus áestutai̱ armia nui̱ ántar súsarmancha tura kuṉkuinniasha áesamiayi. Nuya̱ṉka Sírianmaya̱ úunt akupin Tikratpirisér Israernumia̱ úunt akupniuja̱i̱ Akaas meset najatatai tusar Jerusaréṉnum káutkarmiayi. Túrunamtai úunt akupin Akaas Uunt Yusa Je̱e̱n kuit tura kuri irunmia nuna juuk ántsaṉ akupniu je̱e̱ya̱ncha mash irur Asirianmaya̱ úunt akupniun akuptak chichaak “Wikia ame takarniúrmetjai. Tuma asamtai yamaikia yáintkiata” tu chichaman akuptúkmiayi. Nuna nekáa Asirianmaya̱ úunt akupniuka tarí Akaasan ayamprúkmiayi tura Sírianmaya̱ úunt akupin Resenanka máwarmiayi.

Chíkich áestutai̱ Uunt Yusa Je̱e̱n Akaas najanamu

^11-20 Nuyá̱ Akaaska Tamaskunam pujus áestutai̱n wainkiamia nuna ti wakerukmiayi. Tura Yúsnan pujurin Uríasan áestutai̱ ju̱ní̱ najanata tusa papin najatak akuptúkmiayi. Nuya̱ṉka Jutanam waketki̱ taa áestutai̱nkia najanamun wainkiamiayi. Túrunamtai Akaaska takamtsuk áestuatniuncha tura ántar súsarmancha náṉkamas nui̱ áesmiayi. Nuya̱ṉka áestutai̱ ni najanamunka Uunt Yusa Je̱e̱n naka ápujuk áestutai̱ kapantin jiruja̱i̱ najanamu nui̱ pujumia núnaka arakaani̱ apujsamiayi. Tura Akaasa chíkich túrawarmari̱nkia Jutanmaya̱ Úunt Akupin Túrunawarma Aatai̱ papiniun aakma áiniawai. Nuya̱ṉka Akaaska jakamiayi túrunamtai ni uuntri̱ iwiarsamu armia nui̱ Tawitia Pépruri̱n iwiarsarmiayi. Túrunamtai ni uchirí̱ Esekías Jutanmaṉka úunt akupin ajasmiayi.