2 Akup. 12 - Yus Papí: Shuarja̱i̱ Yus Yamaram Chicham Najanamu

¹ Jeú akupeamuka siati uwiya̱ nuyá̱ Juas (siati uwí takaku) akuptan naṉkama Jerusaréṉnum kuaraintia uwí akupkámiayi. Ni nukurí̱ṉkia Pirshiwia péprunmaya̱ Sewia náartiniuyayi.

² Ashí tsawant Yúsnan pujurin Juyata unuiniamia nuiṉkia Juaska Uunt Yus íimmianum péṉkeran túramiayi.

³ Túmaitkiuisha nainnium najankamu yus enentáimtutai̱nkia iniaisacharuyayi. Tura aentsush taṉkun maa áestuiniak núnisaṉ kuṉkuinniasha áestiarmiayi.

⁴ Nuya̱ṉka Juas Yúsnan pujurin ainia nuna chicharuk “Ashí aents aṉkant aṉkant akiktin apujsamu suinia nusha tura ashí kuítian aents ní enentái̱ji̱a̱i̱ṉ Uunt Yusan suíniana nusha Uunt Yusa Je̱e̱n irumpramua nu

⁵ Yúsnan pujurin árumna nútiram Uunt Yusa Je̱e̱ ashí mamuk chiṉkiara iwiarkataj tusarum kuítian wáinin seatarum” tímiayi Juas.

⁶ Túrasha Juas akupin ajasmaka paintitráis uwí jeamtaisha Yúsnan pujurin armia nusha Yusa Uunt Je̱e̱nka tuke iwiarcharmiayi.

⁷ Nuya̱ṉka úunt akupin Yúsnan pujurniun Juyatan tura chíkich Yúsnan pujurin armia nunasha untsukar chicharainiak “¿Urukamtai Yusa Uunt Je̱e̱ wáitiri̱sha íwiartsuram? Antsu yamaikia atumí kuítri̱n wáinin pujuinia nuka atumniaka akirmákchattarme, antsu Uunt Yusa Je̱e̱n iwiarainia nuna akikiártatui” tímiayi.

⁸ Nuna tiniu asamtai Yúsnan pujurin armia nu nekas tawai tuíniak kuítian suarmia nuna achikcharmiayi tura Yusa Uunt Je̱e̱n ashí mamuk chiṉkiara iwiaratniuncha iniaisarmiayi.

⁹ Nuya̱ṉka Yúsnan pujurniu uuntri̱ Juyata eṉketai̱n achik etektutai̱ri̱n chiṉkiá nú eṉketai̱n Yus áestutai̱niam ayamach Uunt Yusa Je̱e̱n waya̱na nuna untsuurí̱ni̱ apujsamiayi. Yúsnan pujurin wáitin wáiniarmia nu ashí nú kuítian Uunt Yusa Je̱e̱n júkitin armia núnaka nui̱ eṉkearmiayi.

¹⁰ Eṉketáiniam kuit núkap eṉkemámtai iisar úunt akupniunun kuítian wáitniuya nu tura Yúsnan pujurniu úuntri̱ji̱a̱i̱ kuítian Uunt Yusa Je̱e̱n amia nuna nekapmarar umpursanam eṉkeawar

¹¹ Uunt Yusa Je̱e̱ wáinkiarat tusar apujsamu armia nuna suármiayi. Tura nisha takatan takakmau armia nuna kuítian akiniak je̱a̱ je̱a̱mniuncha tura Uunt Yusa Je̱e̱n iwiarniuncha akikiármiayi.

¹² Núnisaṉ kayaja̱i̱ je̱a̱mniuncha tura numi nakarmán iwiarniuncha numin sumauncha tura kayá iwiarkamu sumauncha Uunt Yusa Je̱e̱ mamururi̱n iwiarniuncha, Yusa Uunt Je̱e̱ iwiaratniun kuítian akiktin armia nuke ashí akiarmiayi.

¹³ Tura Uunt Yusa Je̱e̱n eṉkemámia nu kuítji̱a̱i̱ṉkia tsapancha, amamkuncha kachuncha tura shirikip kesatai̱ncha kuítji̱a̱i̱sha tura kuriji̱a̱i̱sha peṉké najanacharmiayi.

¹⁴ Antsu takatan takakmau armia nuna akikiar Uunt Yusa Je̱e̱n iwiariarmiayi.

¹⁵ Tura nu áishmaṉnaka péṉker enentáimkia ásarmatai je̱a̱ṉ je̱a̱mainiakui iin armia nusha páchichu ármiayi.

¹⁶ Makunmianum taṉku Yus áestuatniunam akikmamu kuitkia tura tunáa túramunam Yus áestuatin kuitcha Yúsnan pujurniunu asamtai nú kuitniaka Uunt Yusa Je̱e̱nkia itiachu ármiayi.

Uwí amúamunam tura Juas jakamu

¹⁷ Antsu nuya̱ṉka Sírianmaya̱ úunt akupin Jasaér Kaatja̱i̱ mániawar nupetkar achir yaruakmiayi. Nuya̱sha Jasaérka Jerusaréṉja̱i̱sha mániktaj tusa werimiayi.

¹⁸ Túramtai Jutanmaya̱ úunt akupin Jusapátcha Juramsha Ukuséassha Yúsnan takarkur takatai̱ súsarma armia nuna Juas juuk ikianak nuja̱i̱ niṉki Uunt Yus susamuja̱i̱ irur ashí kurincha Uunt Yusa Je̱e̱n kuit ikiutai̱nmaya̱ tura akupniu jé̱e̱ya̱ncha yaruak Siria úunt akupniuri̱ Jasaéran akuptúkmiayi.

¹⁹ Nu naṉkaamassha Juasa túramuri̱ ainia nuka tura ni takatrí̱sha Jutanmaya̱ Úunt Akupin Túrunamu Aatai̱ papinium áarchamuk ainia.

²⁰ Ni yaintri̱ armia nuke Juásnaka chichaman jurusar Sera jintia akaana nuní̱ Witmirunam máwarmiayi.

²¹ Ni yaintri̱ Jusakar Semeata uchirí̱ya̱nia nu Kejusapát Sumira uchirí̱ máwarmiayi. Túrawarmatai ni aparí̱ya núnis Tawitia pépruri̱n iwiarsarmiayi. Nuya̱ṉka ni uchirí̱ Ananías úunt akupin ajasmiayi.