1 Tis. 4 - Yus Papí: Shuarja̱i̱ Yus Yamaram Chicham Najanamu

¹ Iikia Uunt Jesus akupkámuitji. Tuma asar nu kakarmaja̱i̱ atumniasha ju̱ túratarum tusan akupeajrume. Atumsha iwiaaku pujarmena nui̱ Yus shiir waramtiksatarum tura tuke péṉker túrukrum wetarum tusar seajrume. Iisha nuik atumín unuiniarmajrumna nútiksarmek túratarum.

² Uunt Jesusa akupeamuri̱ji̱a̱i̱ tura nu kakarmaja̱i̱ atumniasha nuik unuiniarmajrumna nu átumka nékarme.

³ Atumín Yus wakerutmarmena nu ju̱i̱ti, shuar aya Wini̱ni̱ṉ sumama pujusat tusan wakerutmarme kame chikichkisha tsanirmashti.

^4-5 Yus shuarcha ainia nu Yusan nékainiachu ásar aya niṉki enentáimtumasar aya ni aya̱shi̱ wakeramunak umiktinian wakeruiniak nuwa̱n enentáimtuiniawai. Atumsha núnisrumek túrawairap. Antsu atumsha atumí nua̱rí̱ péṉker enentáimtusrum shiir aneasrum aya̱starum.

⁶ Nú arant amesha ame yátsum anaṉkam ni nua̱rí̱ yajauch awajtúsaip. Nu túrakrumni̱ṉkia ii tímiajrumna nútiksaṉ Uunt Yus ti kakaram asutiámawartatui.

⁷ Warí, Yus iincha péṉkercha yajauch túratarum turamchaitji. Antsu aya péṉkerak túratarum túramji.

⁸ Tuma asamtai shuar ju̱ chichaman nakitiakka aentsun nakitiatsui antsu Yusan nakitraiti. Tura nu Yussha tunaan túrashtinian ni Wakaní̱n amaawiti.

⁹ Tura yamaikia nuamtak Yus shuar anenaistin ana nuna tí neka asakrumin áatrashtatjarme. Warí, imia Niṉki Yus atumín mái̱ anenai ajatniun jintintrámawarmatai nékarme.

¹⁰ Iis nútiksarmek ashí Masetúnianam matsatainia nuja̱i̱ aneniatsrumek. Túrasha yatsuru, atumí aneṉkrattairi̱ nú nukap ajasti tusan seajrume.

¹¹ Yamaikia tímiaj nútiksarmek yajauchin túruinia nui̱ wekatsuk chíkich shuarna pachittsuk atumí takatrí̱ṉ shiir aṉkant pujusrum atumí uweje̱ja̱i̱ṉ takakmá pujutarum.

¹² Átum táasa̱i̱rum tusan tájarme. Túrakrumni̱ṉkia atumniasha chíkich shuar péṉker enentáimturmasartatui.

Kristu tátintri̱

¹³ Yatsuru, Yus shuarcha ni shuari̱ jakamtai “atakka wáinkiashtatjai” tusa tí kuntuts enentáimainiawai. Tuma asamtai atumsha nútiksarmek kúntuts enentáimsa̱i̱rum tusan ju̱na tájarme. Jákaru ainia nu urukawartinkit paant nekaatarum.

¹⁴ Jesus jakayat nantakchamkia. Núnisaṉ Yus Jesusan iniantkin Nin umirkar jákaru áiniana nunasha iniantkíttiawai. Paant nékaji nusha.

¹⁵ Tuma asamtai Yus Chicham nekaprutamnia nuna atumniasha jintintiajrume. Iisha tuke iwiaaku pujarin Kristu táakuisha jákaru ainia nuka ikiuakur émkishtatji.

¹⁶ Antsu Yus akupeakui Yusa suntarí̱ uuntri̱ untsumkui tura Yusa kachuri̱n umpuarmatai Uunt Jesukrístu untsumuk Yus pujamunmaya̱ tarattawai. Nuiṉkia Krístunu ajasár jákaru áiniana nu iwiarsamunmaya̱ emka nantakiartatui.

¹⁷ Tura nuyá̱ iisha Yus shuar tuke iwiaaku pujajnia nu Krístuja̱i̱ yuraṉminiam ajapén iṉkiunaikiartatji. Nuní̱ ashí nayaimpiniam ii Uuntri̱ Jesukrístuja̱i̱ tuke iwiaaku pujusártatji.

¹⁸ Tuma asamtai ju̱ shiir chicham atumín ujakjana ju̱ja̱i̱ mai̱ ikiakánai ajatarum.