1 Tis. 3 - Yus Papí: Shuarja̱i̱ Yus Yamaram Chicham Najanamu

^1-2 Iisha ataksha atumín íistaitsar ti wakerimji. Tura tujintiakur iikia Atenasnum juákur ii yachi̱ Timiutéu atumín íirmainiarat tusar akupkatai, timiaji. Iisha Kristui̱ uwempratin chicham etsermiaj nui̱ Timiutéuka iiji̱a̱i̱ métek takasuiti. Tuma asa nisha Yusa takatrí̱n takáa asa atumniasha Yusai̱ kaka̱rtarum turamarti tusar akupkámji.

³ Tura nú arant itiurchatan wáiniuk iniaisara̱i̱ṉ tusa ikiakátmararti tusar Timiutéu akupkámji. Yatsuru, átumka nékarme, ashí Yus shuaraitjinia nuka páchitsuk wáitsatniuitji. Iis, tuma asamtai atumsha ti nekas itiurchatnum pujarme, Yus Chicham umirka asarum.

⁴ Íimiatarum, atumji̱a̱i̱ nuik tuke pujumjinia nui̱ “iisha wáitsartatji” tíchamkajrum. Iis, túrunachaik. Nuka nékarme.

⁵ Tura atumín íwianch tunaanum aju̱nmárchariash tusan wisha kúntuts enentáimsamiajai. Tura ántrar takaschajiash tu enentáimsamiajai. Tuma asamtai nekaataj tusan ti wakerakun wisha tí nukap tsawant nákaschamiajai. Antsu wárik Timiutéun akupkámiajai. Yusja̱i̱ péṉkerash wekainia tusan “nu inintrúsam ikiuuta” timiajai.

⁶ Tura yamaikia Timiutéu Tisarúnikianmaya̱ waketki̱ tayi. Nisha taa, átum Yus aneakrum shiir enentáimtamuncha ujatmaji. Tura átum iin anenma asarum tuke enentáimsar pujamuncha tura ii atumín íistaitsar wakerajnia núnisrumek atumsha iincha íirmaitiai tusarum wakeramuncha Timiutéu ujatmaji.

⁷ Tuma asamtai yatsuru, ashí itiurchat tura wáitsatin wáiniatrik átum Yus shiir enentáimta asakrumin iisha shiir enentáimji.

⁸ Atumsha Yusja̱i̱ tariara weká asakrumin shuar jaa péṉker ajas enentái̱ chiṉkiana áintsarik enentáimji.

⁹ Yus péṉker umirka asakrumin iisha shiir waraaji. Warasu asar ii Yusri̱ ti yúmiṉkiaji.

¹⁰ Iincha Yus akuptámkurni̱ṉkia atumíin tímiaja̱i̱k jeartiai tusar wakeraji. Túrar Yusna nekaatin mash nékatsrum nu jintintiatai tusar tuke ti seaji.

¹¹ Atumíin weri íistinian ii Aparí̱ Yussha tura ii Uuntri̱ Jesukrístusha iin yaintmaktai tusar wakeraji.

¹² Atumín ii aneajnia núnisaṉ Yus atumniasha mái̱ anenai ajatniun tura chikitcha anenaiyatniun enentáimtikramprarti. Tura nú nukap aneṉkrattain Yus amasárti tusar wakeraji.

¹³ Yus ikiakátmakui átum tunáa túrutsuk Yus umirkarum wekasatarum tusar ii Aparí̱ Yus seaji. Ii Uuntri̱ Jesus Níniuri̱ji̱a̱i̱ winiak péṉker wekaarmin tatí tusar taji.