1 Tis. 1 - Yus Papí: Shuarja̱i̱ Yus Yamaram Chicham Najanamu

¹ Wikia Pápruitjiai. Wisha Serpanuja̱i̱ tura Timiutéuja̱i̱ Tisarúnikianmaya̱ Yus shuar ajasuitrumna nuna áatjarme. Atumsha Yus shuar asarum Apa Yúsnaitrume tura Uunt Jesukrístunuitrume. Ii Aparí̱ Yus tura ii Uuntri̱ Jesukrístu waitnentrama ásarmatai aṉkant ti shiir pujustarum, tu wakerajrume.

Yus nekas enentáimtusar umirkatniun jintinma

² Iisha Yus áujkurkia atumniasha tuke enentáimtusar Yus shiir yumiṉsaji.

³ Atumsha Yus nekas enentáimtakrum umirkarumna nu nékaji. Núnisrumek Yus aneakrum takaarme. Tura ii Uuntri̱ Jesukrístu tatí tusarum tuke tsawant nákarme. Nu neka asar ii Aparí̱ Yus iniaitsuk áujkur ashí átum enentáimtusar Yus áujtaji.

⁴ Yatsuru, Yus anenmarme. Anenma asa Winia ártí tusa achirmákurmena nusha nékaji.

⁵ Enentáimpratarum. Iisha Yusai̱ uwempratin chicham atumín ujakmajnia nusha aya chíchamja̱i̱ṉ tíchamji. Antsu nú arant nu chicham nekasaiti tusar Yusa Wakaní̱ kakarmari̱ji̱a̱i̱ tímiaji. Tura átum péṉker matsamsarat tusar atumji̱a̱i̱ pujusár shiir iruntrar wekasarmiaji. Nusha paant nékarme.

⁶ Atumsha yamaikia íksarmek ii túramiaj nu tura ii Uuntri̱ Jesukrístu túramia nu túrarme. Itiurchat ai̱ṉ Yus Chicham umikiurme. Tura wáitiayatrumek Yusa Wakaní̱ shiir enentáimtikramkui warasrum pujarme.

⁷ Nu túrakrum ashí Masetúnianmaya̱ tura Akayanmaya̱ Yus shuarsha shiir wekasatin jintintiarme.

⁸ Tuma asarum Uunt Yusa Chichame̱ tí ipiampárurme. Tuma asamtai aya Masetúnianmaya̱ tura Akayanmaya̱ shuarkeka núnaka nékainiatsui. Antsu nuna naṉkaamas Yus nekas umirkaitrumna núnaka ashí aents nékainiawai. Nuna nékainia ásar ii étserman atsumainiatsui.

⁹ Antsu átum iin péṉker itiaamun ni íksaṉ ujatmainiaji. Tura nuya̱sha najankamu yus enentáimtustin iniaisarum nekas iwiaaku Yus nekas enentáimtusrum umirkarumna nunasha ujatmainiaji.

¹⁰ Tura nuya̱sha Yusa Uchirí̱ Jesus jakamunmaya̱n Yus iniantkímia nu, nayaimpinmaya̱ tatí tusarum átum nákamuncha ujatmainiaji. Iis, Jesus Níṉkiti Yusa kajetáiri̱ tsawantri̱ jeattana nuyá̱ uwemtikrampratin.