1 Tim. 2 - Yus Papí: Shuarja̱i̱ Yus Yamaram Chicham Najanamu

Yus áujsatin

¹ Wátsek, emka seajrume Yus áujeakum Yus yumiṉsam ashí shuaran yaintkiat tusam áujtusarta.

² Imiatkinchanum pujusár Yúsja̱i̱sha tura áentsja̱i̱sha shiir túratai tusar tura ashí akupin ainia nusha péṉker akupkarat tusar Yus áujtustiniaitji.

³ Áitkiasar seatin péṉker asamtai uwemtikramajnia nú Yus wakerawai.

⁴ Ashí shuar nekas chichaman nekaawar uwemprarat tusar wakerawai Yus.

⁵ Aya chikichik Yus awai. Tura Jesukrístu aents ajas niṉki Yusja̱i̱ aentsun nawamnaimtikiartiniaiti.

⁶ Ashí shuara tunaari̱n akikmatkataj tusa jákatniunam Jesukrístu surumakmiayi. Tura tsawant jeamtai nu chicham ashí shuarnum etsernaktiniuyayi.

⁷ Nuna túratniun Yus winia akatar akuptúkuiti. Israer shuarcha nekas chichaman enentáimtusarti tusa Yus akuptúkmiayi. Krístunu asan wáitrutsuk nekas tajai.

⁸ Nu asamtai áishmaṉka kajetsuk yajauch tunaitsuk antsu péṉker enentáiji̱a̱i̱ uweje̱ takuiniar Yusan áujsarti.

^9-10 Núnisaṉ núwa̱ka iwiarmamuk nekasmiancha péṉker enentáiji̱a̱i̱ entsararti. Chíkich shuar nu nuwa̱n iis temashmarmari̱ncha, shaukri̱ncha, kurimkiamuncha, iwiarmampramuri̱ncha núnaka enentáimtutsuk antsu ni péṉker túrunamun enentáimtusarti. Núnisaṉ áchatniukait nuwa̱ Yus shuar ainia nuja̱i̱. Ni péṉker túramuja̱i̱ nekas shiir awajmámsashtinkiait.

¹¹ Núwa̱ka tákamtak pujusár umiiniak unuimiárarti.

¹² Nuwa̱nka iruntramunam wajaki̱ unuikiartura̱i̱ṉ tura áishmaṉnasha akupkara̱i̱ṉ tusan suritiainiajai. Antsu tákamtak pujustiniaiti.

¹³ Yus emka áishmaṉkan Ataṉkan najanamiayi. Nuyá̱ nuwa̱n Éwan najanamiayi.

¹⁴ Tura Yus timian umirkach Ataṉka anaṉnachmiayi. Antsu Ewa anaṉna asa tunaan túramiayi.

¹⁵ Túmaitiat uchin takustin asa emesnartinniumia̱ uwempraiti. Tura Yusan nekas enentáimtak anenkartiniaitiuk tura esetar enentáimiuk péṉker wekasatniuiti.