1 Sam. 9 - Yus Papí: Shuarja̱i̱ Yus Yamaram Chicham Najanamu

Saur akupin anaikiamu

¹ Kame Piṉjiamín aentsnumia̱ áishmaṉ ámiayi Ajía náartin. Ajíaa uchirí̱ṉkia Pikiurátauyayi. Nuna uchirí̱sha Serurauyayi. Tura ni uchirí̱sha Awiar. Nuna uchirí̱ṉkia Kish nisha mesetnum ti kakarmauyayi.

² Kame Kisha uchirí̱ṉkia Saur náartin natsa páantniuyayi. Israer shuarnum niji̱a̱i̱ métektakuka peṉké atsumiayi. Ni tsakatíji̱a̱i̱ nekapma iismasha chíkich shuar naya armia nuka aya yákainman jearmiayi.

³ Tura nu tsawantai̱ Kisha umpururi̱ meṉkarámtai ni uchirí̱n Sáuran chicharuk “Ii takarniúri̱ chikichik jukim umpuru e̱a̱utarum” tímiayi.

⁴ Tutai nisha Eprainnium naintiar naintranmaani̱ wéar nuyá̱ Sarisa nuṉkanam jeawarsha peṉké wáinkiacharmiayi. Núnisan Sárim nuṉkanmasha peṉké wáinkiacharmiayi.

⁵ Tura Suj nuṉkanam jeawar Saur ni takarniúri̱ nin nemarmia nuna untsuk chicharuk “Wina aparka umpurunka enentáimtutsuk antsu iin kúntuts enentáimturma pujatsuash. Wátsek waketkitiai” tímiayi.

⁶ Tutai nisha aya̱k “Wats nekaata. Ju̱ péprunam Yusan enentáimtin áishmaṉ tí arantúkma pujawai. Kame ni támaka ímiatrusan uminniuiti. Yamaikia ii wétinian jintintrámawaintiajti. Ni pujamunam wetái” tímiayi.

⁷ Núnisaṉ Saur ni takarniúri̱n aya̱k “Tura wéakrisha nu áishmaṉsha ¿wariṉ juruktiajⁱ? Warí paṉ pitiaknumia̱ amuukaja. Yusan enentáimtin áishmaṉ juruktincha takaktsuji ¿warí takakajⁱ?”

⁸ Tutai ni takarniúri̱ Sáuran ataksha aya̱k “Iistá kuítian kuatru nakakmanumia̱n chikichkiniak wi takakjana ju̱na ii wétinian jintintramat tusan Yusan enentáimtin áishmaṉkan susatjai” tímiayi.

⁹ Yamaiya̱ ju̱i̱ Yúsnan etserin tájinia nuna tí yaunchuka ukunam átatna nuna nékanka neka tiniu ármiayi. Tuma asamtai tí yaunchu Israernumka yaaksha Yusan inintrústaj tusa wéakka “Winitiárum ukunam átata nuna neka pujamunam wemí” tiniu ármiayi.

¹⁰ Nuya̱ṉka Saur ni takarniúri̱n chicharuk “Péṉker tame, nuiṉkia wetái” tímiayi. Nuyá̱ Yusan enentáimtin pujumia nú peprunam wéarmiayi.

¹¹ Tura pepru náintri̱n wáakainiak nuwa̱ch entsan shikiktai tusar wénan iṉkiuṉkar anintruiniak “Ukunam túrunatta nuna nekáa pujawak.”

¹² Tutai nisha áiniak “Ee átum wéarmena nui̱ pujawai. Wárichik wetarum. Kame ashí aents Yus enentáimtutai̱niam áestuawartin ásarmatai yamái ju̱ péprunam tayi.

¹³ Atumsha péprunam waya̱krumka Yus áestakur enentáimtutai̱niam yurumáttsa wáachuk wainkiattarme. Warí ashí susamua nuna shiir awajsatniuiti tura ni jeachkuiṉkia yurumáchartatui. Nuya̱ṉka ipiaamusha yurumáwartatui. Tuma asamtai yamaikia wárichik wakatarum, wainkiattarme” tiármiayi.

¹⁴ Nuya̱ṉka nisha wákar péprunam jeawarmiayi. Tura pepru ajapéri̱n jeainiamunam enentáimtakur áestutai̱niam wakattsa Samuirka ni wajainiamunmaani̱ winimiayi.

¹⁵ Tura Saurka kashin tátin ai̱ Uunt Yuska Samuir túratniuya nuna ujak chicharuk

¹⁶ “Kashin etsa̱ ju̱ni̱ ai̱ṉ áishmaṉkan Piṉjiamín nuṉkanmaya̱n akuptúktatjame. Túramtai Wi tímiaj nuja̱i̱ métek asuiti muuknum ukatram Wi shuarnum Israera akupniúri̱ awajsattame. Tura nisha Jiristíu aents wáitkiainiamunmaya̱ Israer shuaran aṉkant awajsattawai. Warí Israer shuar tí waitiainiak seatainiancha anturkarjai” tímiayi Uunt Yus.

¹⁷ Nuyá̱ Samuir Sáuran wainkiamia nui̱ Uunt Yus Samuiran chicharuk “Ju̱i̱ti wi tímiajmena nú aishmaṉ Israer shuaran akupniúri̱ átatna nu” tímiayi.

¹⁸ Nuya̱ṉka Saursha pepru wá̱i̱ti̱a̱i̱ri̱n jearí Samuiran chicharuk “¿Tuí̱mpiait neka je̱e̱sha? Waitneasam iniaktursata.”

¹⁹ Tutai Samuir Sáuran aya̱k “Witjiai túrunatta nuna nékanka. Wikia jeatsa̱i̱ṉ Yus áestakur enentáimtutai̱niam wakata túrawakmin yamaikia wiji̱a̱i̱ yurumámnium. Nuya̱ṉka kashin káshik wéakmin ashí ame enentáimin ana nuna ujakan akupkáttajme.

²⁰ Kame umpururam menaintiú tsawant meṉkakarma nuka enentáimsaip. Warí wáinkiaru áiniawai. Túrasha Israernum imiá péṉker wakeru ajamaiya̱ nusha ¿yának ati? ¿Áminiuchuk tura ame apá ashí shuariniuchuk átata?” tímiayi Samuir.

²¹ Nuyá̱ Saur aya̱k “Túrasha Israer shuarnumia̱nka ¿Piṉjiamín wea shuarti imiá ishichkichukaitiajⁱ? Tura Piṉjiamín shuarti imiá ishichkitji. Tuma asar páantniuchu áiniaji. Tuma árincha ¿urukamtai ímianusha túrutam?”

Samuir Sáuran asuitiji̱a̱i̱ ukatar akupin awajma

²² Nuya̱ṉka Samuir Sáuran ni takarniúri̱ji̱a̱i̱ jukí̱ traintia aents ipiaamu pujuarmia nui̱ eem apujsarmiayi.

²³ Tura Samuir apatku iniarniun chicharuk “Wi namaṉke̱n jusam ju̱shá ikiusta tusan amasaj nu ju̱i̱ itiata” tímiayi.

²⁴ Tutai apatku iniarin namaṉken jusa Saur eketmanum aeprusmiayi. Túram Samuir chicharuk “Wats akankar ikiusma áminiu ju̱i̱ti. Yuátá, warí wi yamaiya̱ ju̱i̱ aentsu ipian ámiji̱a̱i̱ yurumáwartiniaitji” tímiayi. Kame nu tsawantai̱ Saur Samuirja̱i̱ yurumámiayi.

²⁵ Tura Yus áestakur enentáimtutai̱nmaya̱ akaikí̱ péprunam taar je̱a̱ yakiri̱n nui̱ Samuir Sáuran áujsamiayi.

²⁶ Nuyá̱ kashin etsa̱ wákuk kapant ajasmanum aya aneachma Samuir Sáuran yakí̱ je̱e̱n pakari̱n kanú tepan untsúak “Saurá nantaktia áujsan ikiurkímnium” tutai Saur nantakmiatai Samuir Saurja̱i̱ métek jiinkí̱ wéarmiayi.

²⁷ Túrunawar péprunka naṉkaiki̱ wésar Samuir Sáuran chicharuk “Ámin takartámin ‘emka eestá’ titiá túrasha ámeka ishichik ju̱i̱ nákarsata Yus winia túrutna nuna ujaktájam” tutai ni takarniúri̱n émtikiamiayi.