1 Sam. 8 - Yus Papí: Shuarja̱i̱ Yus Yamaram Chicham Najanamu

Israera shuari̱ úunt akupin atí tiarma

¹ Kame Samuirka ti weampra asa ni uchirí̱niak yamaikia átum Israer shuar sumamtikin atarum tusa anaikiarmiayi.

² Tura iwia̱i̱ri̱ṉkia Juírauyayi nuyá̱ patai̱ṉkia Awías. Nisha Pirshiwia nuṉkanam chichaman iwiarin ármiayi.

³ Túrasha ni aparí̱ umikmia tímiatruska túracharmiayi. Antsu kuítriniatniun ti wakeruinia ásar kuit akikiar útsuamu ásar chichaman péṉker iwiarticharmiayi.

⁴ Túruiniakui ashí Israer shuara uuntri̱ armia nu Ramá péprunam Samuir pujá asamtai chichastai tusar weriarmiayi.

⁵ Tura nui̱ chicharainiak “Ámeka yamaikia ti weamsachumek tura uchirmesha ame tuke péṉker túriniuyamna nuja̱i̱ métek túruiniatsui. Nu asamtai chíkich nuṉkanam akupin pujuinia nútiksamek iincha atí tusam anaikiata” tiármiayi.

⁶ Tura Samuiran chicharainiak “Íiniusha úunt akupin atí” tiarmia nuna antuk Samuir shiir enentáimchak Uunt Yusan áujsamiayi.

⁷ Nuyá̱ Uunt Yus Samuiran aya̱k “Nu shuar ashí seatmainia nu anturkarta. Áminkia nakitramainiatsui antsu Wi akupin ai̱ṉ tusar Wíniaka nakitruiniawai.

⁸ Warí nu tsawantin Ejiptunmaya̱ júsarmiajna tímianaiya̱ṉ yamaisha ámin warí itiurtamainia núnisaraṉ Winiasha turutin ármiayi. Tuma ásar Winia iniaitiusar najankamu yusan enentáimtuiniawai.

⁹ Tuma asamtai seatainia nu anturkam ashí iruram úunt akupin nin akupénak itiur sumamtikiawartata nu jintintrarta” tímiayi.

¹⁰ Nuya̱ṉka úunt akupin atí tusa ashí Israer shuar searmia nuna Uunt Yusa chichame̱n Samuir ujakármiayi.

¹¹ Tura ujainiak “Ii akupniúri̱ atí tárumna nu jú̱nis átatui. Atumí uchirí̱niak mesetnum mánitiai karuja̱i̱ máninniasha chikichnaka kawainiun ekemkar máninniasha núnisaṉ uunta káruri̱n eem tsékeṉniusha ni nemari̱n awajsártatui.

¹² Nuyá̱ chikichnaka mir suntara uuntri̱ tura chikichnaka 50 suntara uuntri̱ awajsartatui. Antsu chikichnaka arakmatniun nuyá̱ araka nere̱n juu awajsartatui. Nuyá̱ chikichnaka mesetnum mánitiai jirun tura mánitiai karu jirurí̱n najanin awajsartatui.

¹³ Ántsaṉ atumí nawantri̱ncha kuṉkuinian najanniuncha tura apatkun iniarniuncha nuyá̱ páṉkan najanniuncha awajsártatui.

¹⁴ Nuyá̱ atumí ajarí̱ya̱ uwa tura uriwiu tí peṉker nerekartatna nuna júukar ni takarniúri̱n suu ártatui.

¹⁵ Atumí arakri̱ya̱ uwa tura chíkich araknumia̱ ainia nusha tiásnumia̱ chikichik jukirum akupniu yaintri̱ peṉkeri̱ ainia nuna tura ni takarniúri̱ncha súsatniun akupin sútatrume.

¹⁶ Nu arant atumí takarniúri̱ncha áishmaṉnasha nuwa̱ncha natsa peṉkeri̱ wari ainia nunasha núnisaṉ umpuruncha atantramkiar ni takatrí̱n émtikiartatui.

¹⁷ Nuyá̱ atumí murikrí̱ tiásnumia̱ chikichkiniak jurutrámiartatui tura ni takarniúri̱ awajtámsattarme.

¹⁸ Nu tsawantin túrutmakrumin atumí akupniúri̱ anaikiamarumna nu yajauchiti tusarum Uunt Yus seakrumnisha peṉké pachitmaschattarme” tímiayi Samuir.

¹⁹ Túrasha Samuir timia nuna ántutsuk ashí Israer shuar chichainiak “Atsá, iinkia nuka itiurtamatsji antsu úunt akupin atí tusar wakeraji.

²⁰ Antsu ashí nuṉkanam akupniúrtin áiniatsuk. Iisha núnisrik iincha akuptámin tura mesetan péṉker chichampruk júkitniun tura émtikin ati tusar ii úunt akupniuri̱ wakeraji” tiármiayi.

²¹ Nuyá̱ Samuirsha Israer shuar iruntrar ashí chichakarmia nuna Uunt Yusan ujakmiayi.

²² Tura Uunt Yussha Samuiran chicharuk “Turamainia nu anturkam úunt akupin anaitiukarta” tímiayi. Nuya̱ṉka Samuirsha ashí Israernumia̱ uuntri̱ áishmaṉ armia nuna chicharainiak “Tú péprunmaya̱ támarum nui̱ṉ waketratarum” tímiayi.