1 Sam. 7 - Yus Papí: Shuarja̱i̱ Yus Yamaram Chicham Najanamu

¹ Kiriat Jearímnumia̱ aents káunkar Uunt Yusna Eṉketáin júkiar naint iwiakar Apiniatápa je̱e̱n ikiusármiayi. Túrawar ni uchirí̱ Iriasáran wainkiat tusar imiatkincha awajsarmiayi.

Samuir Israera uuntri̱ ajasma

² Nuyá̱ Yusna Eṉketai̱ Kiriat Jearím nuṉkanam itiamu núkap tsawant painti uwí pujumiayi. Tuma asamtai Uunt Yusan ashí Israernumia̱ shuar tikishmátrar ti searmiayi.

³ Tuma asamtai Samuirsha ashí Israer shuaran chicharainiak “Atumsha nekas enentáiji̱a̱i̱ Yusai̱ weankurmeka najankamu yus chíkich nuṉkanmaya̱ enentáimtutai̱ ainia nu tura Astarte ainia nusha ajapa iniaisatnuitrume. Nuyá̱ atumí enentái̱ Uunt Yusai̱ iwiararum Niṉki umirkarum surumaktarum. Túrakrumni̱ṉkia atumí nemasri̱ Jiristíu aentsui̱ya̱ uwemtikramprattarme” tímiayi.

⁴ Nuya̱ṉka najankamu yus Astarten tura Páaran ajapawar nekas Uunt Yúsnak enentáimtusarmiayi.

⁵ Nuyá̱ Samuir ashí Israer shuaran chicharainiak “Mispa péprunam iruntratarum. Wisha nui̱ Uunt Yusan seattiatjarme” tímiayi.

⁶ Israernumia̱ shuar Míspanam iruntrar Uunt Yusan shiir enentáimtuiniak ni enentái̱n ukatratniua núnisaṉ entsan shikikiar nuṉká ukararmiayi. Nuyá̱ nu tsawant ijiarmáwar iruntramunam ni tunaari̱n iwiainiakar nekas Yusai̱ tunáa túraitji tiármiayi. Nui̱ Míspanam Samuir Israer shuaran sumamtikiarmiayi.

⁷ Tura Jiristíu aents Israer shuaran Míspanam iruntrarun nekaawar Jiristíu aentsu uuntri̱ mesetan junaitrar ashintiukarmiayi. Nuna Israer shuar nekaawar ti sapijmiakarmiayi.

⁸ Nuya̱sha Israer shuar Samuiran chicharainiak “Yawe̱tsuk ii Yusri̱ Uunt Yus iin seatkartitia. Jiristíu aentsu kakarmari̱ya̱ iin aṉkant awajkartustaj tusam túrata” tiármiayi.

⁹ Tura Samuir murik yamatskamchin maa takamtsuk Yusan áestak Israer shuaran seattiarmiayi. Túram Uunt Yus anturkamiayi.

¹⁰ Tura nui̱ Samuir murikiun maa takamtsuk Yusan áestak pujái̱ Jiristíu aentssha wárik mesetan juárkitiai tusar káutkarmiayi. Túmainiai̱ nu tsawantin Uunt Yus aya aneachma ti kakaram ipiamtan Jiristíu matsatmanum aju̱ntar enentái̱n ikiajtiúkar sapijian eṉketáwarmatai Israer shuarsha nu mesetnum nupetmakarmiayi.

¹¹ Tura nuya̱i̱k Israer shuar Míspanmaya̱ jiintiurar Jiristíu aentsun pataatukar mánaikiar Pitkiarnum ejewarmiayi.

¹² Nuyá̱ Samuir Míspaja̱i̱ Sen nuṉká ajapén kayan ápujuk chichaak “Tímiaja̱i̱ ii Uunt Yusri̱ yaintmakji” tusa Ipinisér anaikiamiayi.

¹³ Nuní̱ túrar nupetkamu ásar nuya̱ṉka Israer shuaran nuṉke̱nka Jiristíu aentska atakka peṉké eṉkemtichu ármiayi. Tura Samuir iwiaakuya̱ nui̱kia Uunt Yuska Jiristíu aentsja̱i̱ṉkia nemasmanaikiuyayi.

¹⁴ Nuní̱ túrawar Israer shuara uunt pépruri̱n Jiristíu aents Ikrunnumia̱ juárkiar Kaat peprua tímianai akintrukaru armia nuna awaiṉkiarmiayi. Núnisaṉ Israer shuarka ni nuṉke̱ Jiristíu aents akinkiarmia nuna ata̱i̱niarmiayi. Túrunamtai Israer shuar Amur aentsja̱i̱ aṉkant pujusármiayi.

¹⁵ Samuirka iwiaaku pujumia nuiṉkia Israer shuarnaka chichaman iwiarniuyayi.

¹⁶ Niṉkia uwir uwir Pitirnumsha nuyá̱ Jirkarnumsha tura Míspanmasha nú peprunam wekatuk chichaman iwiarniuyayi.

¹⁷ Nuna umik Ramá nuṉkanam ni je̱e̱ nui̱ pujá asamtai waketmiayi. Nui̱sha Israer shuarnaka chichaman iwiartiniuyayi. Kame nui̱ Yus áestutai̱n najanamiayi.