1 Sam. 6 - Yus Papí: Shuarja̱i̱ Yus Yamaram Chicham Najanamu

Jiristíanmaya̱ Yusna Eṉketáin awaiṉkiarma

^1-3 Uunt Yus Aentsja̱i̱ Chícham Najanamu Eṉketáiṉkia Jiristíanam siati nantu pujusmiayi. Jiristíu aentska nekascha yus armia nuna pujurniuncha tura nekamniuncha inintrúsar “¿Yusna Eṉketai̱ itiurkamniakit. Tura itiurak pujutái̱ri̱n awaiṉki̱ ikiumniait?” tunaiyarmiayi.

^4-12 Nuyá̱ Jiristíanmaya̱ aents chichainiak “Jimiará waaka uchirí̱n tuke úmuntseakunam kareta yamaram nená Yusna Eṉketái̱ṉkia eṉkear akupkatai. Tura ántar súamusha seṉku émumar kuriji̱a̱i̱ najanamu tura seṉku katip nuṉká emeskarma nu nakumkar kuriji̱a̱i̱ najanamu chíkich eṉketái̱nnium eṉkear nusha akupkatai” tiármiayi. Nuyá̱ waaka uchirí̱ṉkia wenuknum eṉkeamunmaṉ ni nukurí̱ṉkia útkiar karetanka nená tura Yusna Eṉketáincha núnisaṉ ántar súamu eṉketái̱ncha eṉkea untsurnumaani̱ṉsha tura menanmaani̱ṉsha wétsuk nákak Pitsemís nuṉka tesamua tímianai jeawarmai.

Yusna Eṉketai̱ Israernum awakeamu

^13-16 Pitsemísnum aents matsamin armia nu Yusna Eṉketáin wáinkiar warasarmiayi. Riwí shuarka Yusna Eṉketáin tura chíkich eṉketái̱nnium kuri najankamu eṉkemármia nuna karetanmaya̱ akakiar kaya úuntnum ekentsarmiayi. Nuyá̱ kareta numiri̱nkia nakarár waakan máwar takamtsuk Uunt Yusan áestuawarmiayi. Tura Jiristíu aentsu uuntri̱ seṉku armia nuka nuna wáinkiar nu tsawantai̱k Ikrunnum waketkiarmiayi.

^17-21 Nuyá̱ Pitsemísnumia̱ aents Uunt Yusna Eṉketáin initri̱n iisu ásarmatai sataintia áishmaṉkan Yus mámiayi. Túramtai Pitsemísnumia̱ aents chichainiak “Ju̱ Tunaarincha Uunt Yusai̱sha ¿yaki eemsha wajasaint?” tiármiayi. Nuya̱ṉka Kiriat Jearím aentsun chichaman akuptuiniak “Jiristíu aents Uunt Yusna Eṉketáin awaiṉkí̱ itiaruiti. Tuma asamtai winitrum jukirum ní pujutái̱ri̱ni̱ṉ awaiṉkí̱ ikiutarum” tiármiayi.