1 Sam. 4 - Yus Papí: Shuarja̱i̱ Yus Yamaram Chicham Najanamu

Jiristíu aents Yusna Eṉketáin ata̱i̱miu

¹ Túram Samuirsha ashí Israer shuaran nu chichaman ujáa wémiayi. Nu tsawantin Israer shuar iwiarnarar Jiristíu aentsja̱i̱ mániatai tusar Ipinisér nuṉkanam matsamtúkarmiayi. Tura Jiristíu aentssha Awik péprunam iwiarnatrar matsamkarmiayi.

² Túrawar nu mesetnumsha jíinkiar Jiristíu aents Israer shuaran nupetkar kuatru mir aentsun máwarmiayi.

³ Túrawaram matsamkamunam waketkiar Israer shuara uuntri̱ iruntrar chichainiak “¿Urukamtai Uunt Yussha Jiristíu aents nupettamkatniuncha tsaṉkampramkaji? Yamaikia Uunt Yus Aentsja̱i̱ Chícham Najanamu Eṉketai̱ Siru péprunmaya ju̱i̱ itiatai tura nu ii nemasri̱ya̱ ayamprutmak aṉkant awajtámsattaji” tu tiármiayi.

⁴ Tuma asamtai Ashí Akupin Uunt Yus ni akupkur pujutái̱ri̱ṉkia kirupín matsatmanum ajapén ana núnan Yusna Eṉketai̱ Sírunmaya̱ utitiarum tusa Israer shuarka akupkarmiayi. Tura Irí mai̱ uchirí̱ Upni Piniasja̱i̱ṉkia Yus Aentsja̱i̱ Chícham Najanamu Eṉketai̱ pujamunam pujuarmiayi.

⁵ Tura Uunt Yusna Eṉketáin matsamkamunam itiarmatai Israer shuarka ti warainiak charaatum ajainiak nuṉkan umuchiarmiayi.

⁶ Túmainiakui Jiristíu aentssha Israer shuar charaatum ajainiamun antukar anintruiniak “¿Urukamtai Israer shuar ni matsamkamunam charaatum ajainia?” tiármiayi. Túrasha Uunt Yusna Eṉketáin matsamkamunam itiarmatai warainiak túmainiamun nekaawarmiayi.

⁷ Tura Jiristíu aents sapijmiainiak “¡Israer shuar pujuiniamunam Yus tayi!” tiármiayi. “¡Maaj itiurkatjik! Yáunchusha jú̱nis naṉkaamaschaiti.

⁸ ¡Maaj urukawartajik! ¿Ju̱ yusa kakarmari̱ya̱sha yaki ayamprutmaktajⁱ? Nu yúskechuk Ejiptunmaya̱ aentsun kampuntin atsunum chíkich chíkich suṉkur ainia nuja̱i̱ amuukarmia.

⁹ Wats Jiristíu aentstiram iwiarnaktarum. Túrarum kakaram ajasrum mánaiktarum. Ni atumí takarniúri̱ ajasármania núnisrum atumsha Israer shuara takarniúri̱ ajasá̱i̱rum” tiármiayi.

¹⁰ Nuna tiar Jiristíu aents Israera shuari̱ja̱i̱ mánaikiarmiayi. Nui̱ Jiristíu aents ti maṉkartuiniak Israera shuari̱n nuṉkak mánain armia nuna traintia mir máwarmiayi. Tura nupetkam Israer shuarka matsamkamunmaṉ waketrarmiayi.

¹¹ Tura Irí uchirí̱n Úpnin, Piniasja̱i̱ máwar Yusna Eṉketáin ata̱i̱niarmiayi.

¹² Túrawarmatai Piṉjiamín wea mesetnumia̱ pisar nú tsawantai̱k pushiri̱ já̱a̱naru muuknumka nuṉkak ajasu tsékeṉki̱ Sírunam jeamiayi.

¹³ Nui̱ jeá Irisha Yusna Eṉketáin júkiaru ásarmatai uunt kutaṉnum ekemas kúntuts enentáimiar jintiá ii pujumiayi. Nu péprunam jeá etserkamtai nuna antukar ashí shuar charaatum ajarmiayi.

¹⁴ Tímiatainiakui Irisha antuk “¿Urukamtai charaatum ajainia?” tu enentáimia pujái̱ nu áishmaṉ wárik tarí Irin chichaman ujakmiayi.

¹⁵ Irisha nuwintiúchu uwin takaku asa ji̱ kusurúyayi. Tuma asa wáinmachmiayi.

¹⁶ Kame Irin nu áishmaṉ chicharuk “Yamái mesetnumia̱ pisaran tajai” tímiayi. Tutai Irisha chichaak “¿Uchiru, warí itiurkaria?” tímiayi.

¹⁷ Tutai ujaak “Israer shuarsha Jiristíu aents nupetkaram pisararai tura nu arantcha ti untsurí jákarai. Túrawar ame uchirmíncha Upni tura Piniasan mái̱ máwar Yusna Eṉketáin ata̱i̱niarai” tu ujakmiayi.

¹⁸ Tura Yusna Eṉketáin ata̱i̱niarai táman antuk Irikia wáitiniam ayamach pujá asa kutaṉnumia̱ tuntupem iniantmiayi. Tura kuntujé̱n akak jakamiayi. Warí Irikia tí uuntach tura tí nuermauyayi. Kame Irikia kuaraintia uwí Israer shuaran sumamtikin pujusmiayi.

¹⁹ Tura Irí najati̱sha Piniasa nua̱rí̱ Yusna Eṉketáin ata̱i̱miun núnisaṉ we̱a̱rí̱sha áishri̱sha jákarun nekáa takustatuk ajas najaimiá pujá asa uchin wárik takusmiayi.

²⁰ Peṉké jakui uchí takumtikin nui̱ pujuriarmia nu chicharainiak “Uchi áishmaṉ takusume. Tuma asam kakaram ajasta” tiármiayi. Tútaisha nékakcha ajasu asa peṉké áimkiachmiayi.

²¹ Nuyá̱ Yusna Eṉketai̱ ata̱i̱miu asamtai núnisaṉ we̱a̱rí̱ jakamuncha nuyá̱ aishri̱ mámuncha pachis nú nuwa̱ka chichaak “Israera páantniuri̱ sakarai” tusa uchin Ikiapút anaikiamiayi.

²² Núwa̱ka ní chichasan “Yusna Eṉketai̱ ata̱i̱miu asamtai Israera páantniuri̱ sakarai” tímiayi.