1 Sam. 31 - Yus Papí: Shuarja̱i̱ Yus Yamaram Chicham Najanamu

Saur menaintiú uchirí̱ji̱a̱i̱ métek maamu

¹ Nuyá̱ Israera shuari̱ṉkia mesetnum mánainiak Jiristíu aents nupetainiam pisakármiayi. Túrasha Kirpúa nainnium tí untsurí jákarmiayi.

² Tura Jiristíu aentska Sáuran tíjiu̱ch pataatuki̱ wésar ni uchirí̱n Junatánan Apiniatápan tura Markisúancha mantuawarmiayi.

³ Kame mesetka tí tsuumai̱ ajattsamiayi Sáurnaka tura tíshimkiun naṉkimtan unuimiátka armia nu wáinkiar tíshimkiuja̱i̱ eketkar tukuarmiayi.

⁴ Nuya̱ṉka ni tantari̱n takurkauya nuna Saur chicharuk “Jiristíu aents tsupirnakcha ainia nu ijiuti jí̱i̱rawar wishikrurara̱i̱ṉ tusam ame puya̱rum ukuinkiam ijiuti ji̱i̱ram mantuata” tímiayi. Túrasha ni yáintri̱ṉkia tí ashamak nakitrámiayi. Túram niṉki ni puya̱ri̱niak ukuiniak ijium tekem iniarmiayi.

⁵ Tura ni tantari̱n takurkauya nu Saur jakaan wainiak nisha nútiksaṉ ní puya̱ri̱niak ukuiniak ijium tekem iniar niji̱a̱i̱ métek jakamiayi.

⁶ Kame nuní̱ túrunawar nu tsawantin Saur ni menaintiú uchirí̱ji̱a̱i̱ tura ni tantari̱n takurkauya nusha tura ashí ni shuari̱ nin nemariarmiania nuja̱i̱ métek nu mesetnum jákarmiayi.

⁷ Israera suntari̱ pisarármatai Israer shuar nuṉka paka tépakmanumaani̱ matsamin armia nu tura Jurtan entsa amaini̱ pujuarmia nusha nisha pisararmiayi. Warí Saur ni uchirí̱ji̱a̱i̱ jákarun wáinkiar ní pepruri̱n ajapa ikiuiniak pisarármiayi. Túrunamtai nuiṉkia Jiristíu aents nú peprun akintrukar matsamkarmiayi.

⁸ Kashin tsawa̱r Israera suntari̱ jaka armia nuna Jiristíu aents warirí̱ armia nuna ata̱rtaj tusa wéarmiayi. Tura Sáurnasha núnisaṉ menaintiú uchirí̱ji̱a̱i̱ Kirpúa nainnium jaka tepenan wáinkiarmiayi.

⁹ Nuya̱ṉka Jiristíu aents armia nu Saura muuke̱n tsupirkarmiayi. Túrawar mesetnum mánitiai armia nunasha atar yaruakarmiayi. Túrawar ashí nuṉkanam Jiristíu matsamtainmaṉka péṉker chichaman etserniun etserat tura ni najankamu yusri̱ je̱e̱ncha nuyá̱ aents pujuinia nunasha ujakárat tusa akupkarmiayi.

¹⁰ Kame Saur mesetnum mánitiairi̱n atái júkiarmia nuna Astarte je̱e̱n ikiusármiayi túrawar Saura aya̱shí̱nkia Pitshana wenuke̱n ajintruawar nenasarmiayi.

¹¹ Ashí Japisnumia̱ aents Karaatnum armia nu Jiristíu aents Saur nuní̱ túramun nekaawar

¹² nuiṉkia ashí mesetan unuimiátra áishmaṉ kakaram armia nu wajakiar nu kashi takamtsuk wekasar nuyá̱ jeariar Saura aya̱shí̱ncha tura ni uchirí̱ aya̱shí̱ncha Pitshana wenuke̱n aan atá̱i̱ júkiarmiayi. Nuyá̱ Japisnum jeawar ekemákarmiayi.

¹³ Tura ukunchí̱nkia Japisnum numi tamarísku ajetari̱n iwiarsarmiayi. Túrawar siati tsawant ijiarmáwarmiayi.