1 Sam. 3 - Yus Papí: Shuarja̱i̱ Yus Yamaram Chicham Najanamu

Uunt Yus Samuiran untsukma

¹ Tuma asamtai Samuirka natsa amia nuiṉkia Irí jintintiam Uunt Yúsnan péṉker takamiayi. Nu tsawantinkia Uunt Yusa chichame̱sha peṉké ishichik etsernakmiayi. Tura ímiaja̱i̱k wáinmancha túkeka wain wécharmiayi.

² Kame nu tsawantinkia Irisha úuntach ajasu asa ji̱ kusutémprauyayi. Kashi ajasu asamtai kanartajtsa tepesmiayi.

³ Tura Yusna Eṉketai̱ Uunt Yusa Je̱e̱n apujsamuya nú je̱a̱nam shirikpisha kajintsa̱i̱ṉ Samuirka kanú tepemiayi.

⁴ Uunt Yus Samuiran untsúak “¡Samuirá!” tutai “¿Jaá? Ju̱i̱ pujajai” tímiayi.

⁵ Nuya̱ṉka Irí tepamunam tséken ajakí̱ “Ju̱i̱ pujajai. ¿Urukamtai untsuram?” takui̱ Irisha “Wikia untsúatsjame. Waketkí̱ tepuuta” tutai Samuirsha waketki̱ tepeumiayi.

⁶ Ataksha árusan Uunt Yus untsúak “Samuirá” tímiayi. Tutai Irin werí “Ju̱i̱ pujajai. ¿Urukamtai untsuram?” takui̱ “Wikia uchiru untsúatsjame. Waketkim tepuuta” tímiayi.

⁷ Kame Samuirsha Úunt Yusnaka tuke nékachuyayi. Tura núnisaṉ Uunt Yusa chichame̱ncha peṉké ántichuyayi.

⁸ Nuyá̱ Uunt Yus menaintiú untsúak “¡Samuirá!” tutai ataksha Samuir Irin werí “urukamtai untsuram” takui̱ nuiṉkia Irisha Uunt Yus Samuiran untsumia nuna nekaamiayi.

⁹ Tuma asa Samuiran Irí chicharuk “Weme tepuuta. Tura yamái untsurmakuinkia ‘Ámin takarin asan ánturjame. Uuntá turuttia’ titiá” tímiayi.

¹⁰ Nuyá̱ ataksha árusan emka untsumia nútiksan Uunt Yus nui̱ tarí untsúak “¡Samuirá, Samuirá!” tímiayi. Tutai Samuir aya̱k “Turuttia, Uuntá. Ame takarniúram anturtamui” tímiayi.

¹¹ Nuiṉkia Uunt Yussha Samuiran chicharuk “Israer shuara nuṉke̱n tí tsuumainian túrattajai. Nuna túrakui antukar ti itiurchat enentáimprartatui.

¹² Tura nu tsawantin Irí shuari̱n asutiáttajai tíniuitjiana núnaka ti nekas mash umiktatjai.

¹³ Warí Uunt Yusa náari̱n pachisar peṉké netse túrawaruiti. Nuna Irisha nékayat ni uchirí̱ncha peṉké chicharkacharuiti. Nu yajauch túramunam Irí shuarnaka ashí amuktinian paant ujakuitjiai.

¹⁴ Tuma asan Irí shuarnaka nekas túrattajai tusan chicharainiakun Irí shuar yajauch túrawarma tumashri̱ṉkia taṉku mantuarish núja̱i̱ṉchuka ántar susamuja̱i̱sha akikmatnakchattawai” tímiajai.

¹⁵ Tu ujakam Samuirsha kanarmiayi. Nuyá̱ kashin káshik nantaki̱ Uunt Yusa Je̱e̱ wáitiri̱n urarmiayi. Tura Samuirsha ímiaja̱i̱k Uunt Yus timia nuna Irin ujaktinian ashamak arantimiayi.

¹⁶ Nuyá̱ Irí Samuiran untsúak “Uchiruá, Samuirá” tutai “Uuntá, waritia” tímiayi.

¹⁷ Nuya̱ṉka Irí inintrak “¿Uunt Yus warinia turama? Nuka ú̱rtutsuk ujatkata. Tura chikichik chichamkesha ú̱rtukakminkia Yus ti asutiámati” tímiayi.

¹⁸ Nuna takui̱ Samuir ú̱rtsuk mash ujakmiayi. Nuiṉkia Irí chichaak “¡Uunt Yusaiti! Ni wakera nuja̱i̱ métek túrati” tímiayi.

¹⁹ Nuyá̱ Samuirsha tsakarmiayi tura niinkia Yus pujurmiayi. Tuma asamtai ni chichame̱nka chikichkinkisha umitskeka iniaichamiayi.

²⁰ Tuma asamtai Israer shuarka ashí Tánnumia̱ juárkiaraṉ Pirshiwia tímianaisha “Samuirka nekas Uunt Yúsnan etserniuiti” tiármiayi.

²¹ Nuyá̱ Uunt Yuska ataksha Samuiran Sírunam wantintiukmiayi. Warí Samuirnaka aya chíchame̱ja̱i̱ṉ Uunt Yuska Sírunmaṉka wantintiukmiayi.