1 Sam. 29 - Yus Papí: Shuarja̱i̱ Yus Yamaram Chicham Najanamu

Israerja̱i̱ mánikiai tusar Tawit Sekrak awaiṉkimiu

^1-5 Jiristíu aentsu uuntri̱ suntar iruntrar aṉkant aṉkant matsamkarum iisar Tawitcha ni suntari̱ji̱a̱i̱ tura Ákisja̱i̱ iruntrar uku matsatainian wáinkiarmiayi. Tura anintruiniak “Israera shuari̱sha ju̱i̱sha ¿warinia matsamtuinia?” tuíniakui Ákis áimiuk “¿Kame Israernumia̱ úunt akupniu Saura takarniúri̱ Tawitchakait? Wiji̱a̱i̱ núkap tsawant pujusuiti. Warí, uwir uwir wiji̱a̱i̱ pujusa nui̱sha tura yamaiya̱ tímiaja̱i̱sha ni yajauchiri̱nkia peṉké wáitkiachuitjiai” tímiayi. Túrasha uuntri̱ armia nu nin kajerkar “Ju̱ áishmaṉ iiji̱a̱i̱ mesetnum wini̱ṉ tusarum awaiṉkitiarum, warí ii nemasri̱ ajaschamniakait. Núnisaṉ Jiristíu aentsu muuke̱n jukí̱ ni uuntri̱ waitnenkartutairi̱nkia timiá péṉkerka wáinkiachminkiait” tiármiayi.

^6-11 Nuiṉkia Ákis Tawitian chicharuk “Uunt Yus iwiaakui ámeka péṉker enentáimkiaitme. Ámiji̱a̱i̱ mesetnum werí tátinkia péṉkeraiti. Túrasha uunt ainia nu ámin iirmas péṉker enentáimturmainiatsui. Tuma asamtai yamaikia péṉker aṉkant waketkitia. Jiristíu uuntri̱ ainia nu péṉker iirmascharai” tímiayi. Tawit nuní̱ tutai káshik tsawa̱a̱na ai̱ Jiristía nuṉkanam Sekraknum waketkiartai tusar nantakiarmiayi.