1 Sam. 28 - Yus Papí: Shuarja̱i̱ Yus Yamaram Chicham Najanamu

Jiristíu aents Israera shuari̱ji̱a̱i̱ mániataj tusa iwiarnainiamu

¹ Nu tsawantin Jiristíu aents ni suntari̱n irurmiayi Israera shuari̱ji̱a̱i̱ mánaiktaj tusa. Nuyá̱ Ákis Tawitian chicharuk “Ámeka nékatsmek, amesha tura áminiu ainia nuja̱i̱ mesetnum wiji̱a̱i̱ wétiniaitme.”

² Tutai Tawit Ákisan aya̱k “Ame takartámin túrattana nu nekaata” takui̱ Ákis Tawitian chicharuk “Nui̱ṉkia winia wáitin atá tusan tuke anaikiattajme” tímiayi.

Saur Enturnumia̱ nekamniun chichaamu

³ Samuir jakaa asamtai ashí Israer shuar ni jakamun e̱a̱rarmiayi. Tura ni pépruri̱ni̱ṉ Ramanam iwiarsarmiayi. Tura nekamniuncha tura jaká untsú ainia nunasha Saurka nu nuṉkanmaya̱ṉka ji̱i̱rarmiayi.

⁴ Jiristíu aents irunar káunkar Súnemnum matsamkarmiayi. Tura Saur ashí Israer shuaran irur Kirpúanam matsamkarmiayi.

⁵ Jiristíu aents matsamkamun Saur wainiak tí sapijmiak enentáiniam kura̱a̱k niisháa enentáimpramiayi.

⁶ Tura nuya̱ṉka Saur Uunt Yusan aniasmiayi túrasha mesekranmaani̱sha Urimnumaani̱sha tura Yúsnan pujurin ainia nunisha peṉké Uunt Yuska ái̱kchamiayi.

⁷ Nuiṉkia Saur ni takarniúri̱ ainia nuna chicharuk “Jaká untsú ainia nu nuwa̱ e̱a̱truktarum wi nin werin anintrústaj” takui̱ ni takarniúri̱ aimiainiak “Nekaata Enturnum jaká untsú nuwa̱ awai” tímiayi.

⁸ Tutai Saur chíkich pushí entsar nusháa iira ajas jimiará áishmaṉka jukí̱ wémiayi. Tura nuwa̱ pujamunam kashi jeariármiayi. Tura Saur nuwa̱n chicharuk “Waitneasam jakaa ainia nu untsutrukta tura wi títiatjamna nuna wakaní̱ untsukam itiartitia” tímiayi.

⁹ Nuní̱ tutai nuwa̱ áimiuk “Ju̱á, Saur túramia nu ame nékame. Nekamniuncha tura jakaa ainia nuna untsuuncha Israernumia̱ ji̱i̱r akupkacharmaka. Tuma ai̱sha ¿urukamtai winia anaṉkruam mantuataj tusam wakerutam?”

¹⁰ Nuya̱ṉka Saurka nekas umiktatjai tusa chichaak “¡Jiuwá nekas iwiaaku asamtai yáintkiakminkia yajauchikia peṉké tarutrámchattawai!” tímiayi.

¹¹ Nuiṉkia nuwa̱ anintrak “¿Yana wakata títiataj?” takui̱ ni aya̱k “Samuir iwiakta” tímiayi.

¹² Nuwa̱ Samuiran wainiak ti kakaram untsumkamiayi. Tura nuwa̱ Sáuran chicharuk

¹³ “¿Urukamtai anaṉkruam? Ámeka Sáuraitme” tutai úunt akupin chicharuk “Ashamkaip. ¿Warí wainkiam?” tutai nuwa̱ Sáuran aya̱k “Chikichik yusa núninian nuṉkaya̱ wákun wainjiai” tímiayi.

¹⁴ Takui̱ ni chichaak “¿Urukú íirait?” tutai nuwa̱ aya̱k “Áishmaṉ úuntach tarachi̱ penumaruiti” tímiayi. Nuyá̱ Saurka Samuiran tawai tusa nekáa tikishmátar ni yapi̱ji̱a̱i̱ nuṉkan antiṉmiayi.

¹⁵ Nuya̱ṉka Samuir Sáuran chicharuk “¿Urukamtai iwiarkataj tusam itit awajtam?” tutai Saur aya̱k “Jakamnia nekapeajai. Jiristíu winia mesetan jurutainiawai tura Yus wini̱ya̱ kanakniuiti. Nuya̱ṉka Yúsnan pujurin ainia nui̱sha tura mesekranmaani̱sha ai̱rtsui. Tuma asamtai warinia túrataj nu paant ujatkai tusan untsukjame” tímiayi.

¹⁶ Tutai Samuir chicharuk “Uunt Yuska ikiurmaki̱ ame nemasrum ajasu ai̱sha ¿urukamtai winiasha anintiam?

¹⁷ Uunt Yus takui̱ ámin tímiajmena nuna yamaikia túrayi. Uunt Yuska ame uwejmíya̱ṉ jurutramkí̱ ame tsaníakmarmin Tawitian akupeamurminkia súsaiti.

¹⁸ Uunt Yusa chichame̱sha ¿urukamtai umirkachmam? Amarík aentsun suira kaje̱ntuk amuktárum timia nusha anturkachmame. Nu umikcha asakmin Uunt Yus ámiji̱a̱i̱ nuna yamái túrayi.

¹⁹ Nu arantcha Uunt Yus Israera shuari̱n núnisaṉ áminkia Jiristíu aentsu uwejé̱n surutmaktatrume. Kashin ame nuyá̱ ame uchirmiji̱a̱i̱ wiji̱a̱i̱ pujuttarme. Tura Israera suntari̱n Uunt Yus Jiristíu uwejé̱n surukartatui.”

²⁰ Nuiṉkia Saur ti náyaitiat nuṉká iniantmiayi tura Samuira chichame̱n antuk ti sapijmiakmiayi. Tsawai̱sha tura káshisha peṉké yurumáchu asa kakarmachu nekapmiayi.

²¹ Nuyá̱ nuwa̱ Sáuran tarí ti sapijmiak pujan wainiak chicharuk “Nekaata ame takartámniuka ame chichammin umikiái. Tura ame túrutmena nunak antukan winia iwiaakmarnasha tsuumainium ikiusjai.

²² Antsu yamaikia seajme amesha núnismek ame takartámniu chichame̱ anturkata. Yurumá kakaram ajasam weminiam waitneasam nákarsata” tímiayi.

²³ Tutai Saur chichaak “Yurumáshtatjai” tímiayi. Tura ni takarniúri̱sha núnisaṉ nuwa̱sha yurumát tusa núkap seawarmiayi. Túram nisha anturkarmiayi. Nuya̱ṉka nuṉkaya̱ wajaki̱ peaknum pujusmiayi.

²⁴ Tura nuwa̱ waaka yamatskam nuérman takakuyayi tura nuna wáurtus mámiayi. Nuyá̱ arinia achik pachimiar páṉkan karinia eṉkettsuk iniarkámiayi.

²⁵ Tura Saur ni takarniúri̱ji̱a̱i̱ yurumáwarat tusa apujtusarmiayi. Túram yurumá umikiar waketainiak nú chichamaik kashi jíinkiarmiayi.