1 Sam. 25 - Yus Papí: Shuarja̱i̱ Yus Yamaram Chicham Najanamu

Samuir jakamtai iwiarsamu

¹ Samuir jakamiayi tura jakamtai ashí Israer shuar e̱a̱rtai tusar irunturarmiayi. Tura Ramanam ní je̱e̱ni̱ṉ iwiarsarmiayi. Nuyá̱ Tawitkia atsamunam Parannum wémiayi.

Nawar Tawitian natsan awajkámu

^2-11 Karmirnum áishmaṉ kuítrintin Nawar náartin pujuyayi tura ni nua̱rí̱ náari̱ṉkia Apikiáir náartiniuyayi. Nawarka arantichu tura yajauchin túriniuyayi tura ni nuwe̱ṉka ti enentáimniuyayi tura shíirmachiyayi. Nu tsawantinkia ni murikrí̱n menaintiú míran tura mir kápran ure̱n Nawara yaintri̱ tsúpiruk atsamunam pujuarmiayi. Nu takakmainiakui Tawit áishmaṉja̱i̱ iruntrarmia nuna wainiainia ásarmatai Tawit tias natsan yurumkan seamiarat tusa akuprámiayi. Tura natsa Nawaran amikmáwar Tawit seamna nuna ujakármiayi. Túramaitiat Nawarka Tawitia shuari̱n akupkámun ajamas akupkatniun nakitrámiayi. Antsu tumá Tawitian ti katsekkamiayi.

Apikiáir Tawit pujamunam chichampramu

^12-22 Nuyá̱ Nawara chichame̱n Tawitian ujakármiayi. Tawit nuna antuk ti kajek kuatrusiántu áishmaṉkan chicharainiak “Aṉkant aṉkant puyá̱ akachumatarum” tímiayi. Tura Tawit chichaak “Nuikia ashí ni takarna nuka iikia peṉké ántrar kampuntin atsunum wáitkiaruitji. Túramaitiat péṉkernum yapajtiutsuk antsu yajauchí yapajtiukai. Tsawa̱tsa̱i̱ṉ chikichik áishmaṉnaksha Nawarnan iwiaaku ikiuakuinkia winia nemasur ainia nunasha núnisaṉ Yus túrati” tímiayi. Nuyá̱ Nawara takarniúri̱ nuna antuk Apikiáiran ujakmiayi. Kame nuiṉkia Apikiáir wáurtus yurumkan núkap achik kawainium áentskamiayi. Tura ni takarniúri̱ armia nuna chicharainiak “Átumka eema ajatarum tura wikia atumí úkuri̱n winittiajai” tímiayi túrasha ni áishri̱nkia núnaka ujakchamiayi.

^23-31 Tawit ni shuari̱ji̱a̱i̱ wininian iṉkiuṉ Apikiáirka kawainiumia̱ akaikí̱ Tawit wajamunam nuṉká tikishmar tsuntsumá chichaak “Winia uuntru, wi makuntratjai tura ámin takartámin chichakat tsaṉkatkata. Waitneasam yajauch enentáintin Nawarka anturkaip. Warí enentáimchatairi̱ṉkia níniukete. Antsu winia uuntru natsa akupkarmamna núnaka wikia wáinkiacharmajai. Tura winia uuntru, Uunt Yus iwiaaku asamtai ame iwiaakme. Tuma asa amek yapajmiakum numpa ukartinniasha Uunt Yusak suritrámkayi. Yamaikia ame nemasrumsha tura winia úuntrun yajauch awajsatniun enentáimtuinia nusha Nawarja̱i̱ métek ártatui. Tura yamaikia winia uuntru ame takartámin amastinian itiartámainia ju̱ achikta. Áitkiasmek ame takartámin yajauch chichartamkamtaisha tsaṉkurai tusan seajme. Nekas Uunt Yus winia úuntrunka kakaram awajsattawai. Warí ámeka Uunt Yus meset nájanma nu émtame. Kame ame iwiaakmarminkia yajauch wainkiamu amiinkia peṉké atsutí. Uunt Yus ámin turamniua nú ashí uminkiamtai Israer shuara uuntri̱ ajasmesha winia uuntru, amek yapajmiakum numpa ukarmanumsha itiurchat enentáimkium túrumainchu ajakmiaj tuuka enentáimchattame. Tura Uunt Yus winia úuntrun péṉker awajsámtaikia ame takartámniusha enentáimturta” tímiayi.

^32-35 Tawit Apikiáiran aya̱k “Uunt Yus Israera Yusri̱ shiir atí. Yamái winia iṉkiuṉkatniun akuptámkai Ni péṉkeri̱sha shiir atí. Yamái wi numpá ukartasa wéawai tura winia uwejruja̱i̱ yapajmiáktaj tusan wéawai tsurintruku asam shiir awajsamu atá. Winia iṉkiuṉkataj tusam tsawa̱tsa̱i̱ṉ tarutchaitkiumni̱ṉkia Nawarka iwiaaku juákcha̱a̱yi” tímiayi. Tura nuwa̱ Tawitian ántar susamia nuna Tawit achikmiayi tura je̱e̱min péṉker waketkit tusa akupkámiayi.

Nawar jakamu

^36-39 Túramtaikia Apikiáir Nawarai̱ waketkimiayi. Tura ni je̱e̱n tí peṉker núkap yurumátniun Nawar najanauyayi úunt akupniu je̱e̱n tí peṉker núkap yurumátin ana ímiatrus ámiayi tura nampetnasha ti nampekuyayi. Tuma asa Apikiáirka ya̱u̱ timia nunasha áishri̱nkia ujakchamiayi antsu Nawar kashin tsá̱rmatai ujakmiayi. Nuya̱ṉka Nawar nuna antukmia nui̱ enentáinkia naṉkankamiayi, túruna kaya núnikmiayi. Túruna tias tsawantchik naṉkaamas Uunt Yus Nawaran antiṉmiayi túram jakamiayi. Nawar jakaan nekáa Tawit Uunt Yusan shiir awajás Nawar natsant awajkartusmia núnaka sumamtikia asamtai Tawitkia yumiṉsamiayi. Nu arant Tawit yajauch túratniun Yus tsuriṉkia asamtai nunasha Yusan yumiṉsamiayi. Tura Nawara yajauchiri̱ji̱a̱i̱ Uunt Yus nin yajauch awajtúsmiayi.

Tawit Apikiáiran nuatkamiayi

^40-44 Ukunam Tawit Apikiáiran nuatkataj tusa chichaman akupkámiayi. Tura nuwa̱ aya̱k “Juá ame takarniúram nawemin nijiartámprati” tímiayi. Tura Apikiáir Tawitiai̱ seṉku takarniúri̱ armia nuja̱i̱ wárikmas wémiayi.