1 Sam. 24 - Yus Papí: Shuarja̱i̱ Yus Yamaram Chicham Najanamu

Tawit Sáuran tsaṉkuramu

¹ Kame Saur Jiristíu aentsun pataatuk waketki̱ támatai chicharainiak “Tawitkia Eṉketi kampuntin atsunum pujawai” tiármiayi.

² Tuíniakui Saur ashí Israernumia̱n menaintiú mir suntar nekas juurma armia nuna yaruakan Tawitian tura aents Tawitji̱a̱i̱ yujarmia nuna e̱a̱ktai tusar kampunniunmaya̱ kapra matsamtai̱ naint muchiṉ áiniana nuní̱ ashinkiarmiayi.

³ Tura Saur jintiá wesa murik matsatmanum jeamiayi. Tura ni atsumamuri̱n túrataj tusa kayá wa̱a̱ nui̱ ámanum waya̱miayi. Túrasha Tawitkia ni shuari̱ji̱a̱i̱ nu wa̱a̱ náṉkatkamunam pujuarmiayi.

⁴ Tura ni shuari̱ Tawitian chicharainiak “Nekaata. Ame nemasrumnia̱ka Wi ámin amastatjai túramtai ame wakeramu túrattame Uunt Yus turama nú tsawant yamái jeayi” tiármiayi. Tutai Tawit wajaki̱ Saurka nékatsa̱i̱ṉ pushirí̱ tsakarí̱n tsupirkamiayi.

⁵ Túrasha Saura pushirí̱ tsakarí̱n tsupirka asa Tawitkia ni enentái̱n tí itiurchat nekapramiayi.

⁶ Nuya̱ṉka Tawit ni shuari̱n chicharainiak “Winia úuntrun itiurchat awajkatniunmaya̱ṉka Uunt Yus aṉkant awajtusti. Warí níchukait Uunt Yus anaikiamuka” tímiayi.

⁷ Núnisaṉ ní shuari̱n chicharkar Sáuran itiurchat awajkara̱i̱ṉ tusa suritkiarmiayi. Tura Saurka wétaj tusa nuyá̱ jiinkimiayi.

⁸ Nuyá̱ Tawitkia wajaki̱ wá̱a̱nmaya̱ jiinkí̱ Saura úkuri̱n untsumuk “Winia uuntru úunt akupin” tímiayi. Tutai Saur apajá̱s iimkiui Tawit tsuntsumá nijia̱i̱ji̱a̱i̱ nuṉká antiṉ tikishmátramiayi.

⁹ Nuyá̱ Tawit Sáuran chicharuk “Tawitkia Sáuran itiurchat awajkataj tawai tusa aents ántar ujatmainia nuna chichame̱sha ¿urukamtai anturainiam?

¹⁰ Wats ju̱ nekaata. Ju̱ wa̱a̱nam itiura Uunt Yus ámin winia íktursa nu yamái amek wainkiame. Maatá turutainiai̱n wikia ámin waitnentran chichaakun winia úuntrunka itiurchatka awajsashtatjai. Warí Uunt Yus anaikiachmakait tájame.

¹¹ Winia aparu íimsakia ame pushirmi tsakarí̱n uwejruí̱ takakjai. Wi pushirmi tsakarí̱n tsupirkajme túrasha máchjame. Íimsam nekaata. Wikia áminkia yajauchikia enentáimtatsjame nu arant umirkatin nakitiakur kajerkatniusha winiinkia atsawai. Tuma asan wikia amiincha yajauchin túrachuitjiai túmaitiatam ámeka winia mantuataj tusam patáturú wekaaturme.

¹² Túrasha Uunt Yus ii túramuja̱i̱ métek iis nekáa winiasha tura amincha sumamtikramatai. Núnisan Uunt Yus amiya̱ṉka wíniaka ayamprutkati. Túrasha iikia áminkia itiurchat awajsashtatjame.

¹³ Kame nekatai̱n jintinkiartin chicham ii uuntri̱ chichatai̱ ‘Yusan enentáimtichu ainia nuka chíkich aentsun yajauch awajui’ tátsuk túrasha wikia áminkia yapajkiashtatjame.

¹⁴ Israera úunt akupniuri̱sha ¿yana mátaj tusa jiintiukin? ¿Ya apapéam? ¿Ya̱wá̱ jakak nuíchuka sunkuuk?

¹⁵ Tura sumamtikniuka Uunt Yus atí tura Nisha ii túramuja̱i̱ métek iis nekáa winiasha tura amincha sumamtikramatai. Núnisaṉ Niṉki iis wíniaka mánitrukti tura amiiya̱ṉka ayamprutkati” tímiayi.

¹⁶ Tura Tawit Sáuran tuasua umikmatai Saur chichaak “¿Winia uchir Tawitia ju̱ka ame chichammechukait?” ti Saurka kakantar útmiayi.

¹⁷ Nuyá̱ Tawitian chicharuk “Nekas ámeka wiji̱a̱i̱ naṉkaamas péṉkeraitme. Wikia yajauch awajmaitiatmek ámeka wíniaka péṉker ewekátme.

¹⁸ Tuma asam ame péṉker túramu yamái iniaktursame. Warí Uunt Yus ame uwejmín winia íktusu ai̱ṉ ámeka mantuachume.

¹⁹ Kame aents ni nemasri̱n wainiak ¿aṉkant máatsuk akupkámniakait? ¡Ju̱ tsawant ame winia túrutamna núnaka Uunt Yus péṉkerja̱i̱ akirmákti!

²⁰ Yamaikia nekaata. Ame úunt akupin nekas ajastatme tura ame akupeamurmeka umuchkiachmin Israernumka átatui.

²¹ Antsu yamaikia Uunt Yus íimmianum nekas tájame tusam ‘Wi jakamtaisha áme shuarumnia̱ka amukchartatjai núnisnak ame náarmincha áme shuarumiya̱ṉka japirchattajai’ turuttia” tímiayi.

²² Tutai Tawit Sáuran chicharuk “Uunt Yus íimmianum nekas umiktatjai” tímiayi. Tura Saurka ni je̱e̱n waketkimiayi. Antsu Tawitkia irunar wekarmia nuja̱i̱ wenuke péṉker iwiarturma asa nupetkachminium wákarmiayi.