1 Sam. 20 - Yus Papí: Shuarja̱i̱ Yus Yamaram Chicham Najanamu

Tawit Junatánja̱i̱ chícham najanamu

^1-23 Tawit Ramanmaya̱ pisar yaintkiai tusa Junatánan werimiayi. Kame nantu takamtai úunt akupin irunar tuke yurumin asamtai wikia úunt akupniuja̱i̱ nui̱ pujushtaj yáintkiata tusa Junatánan seamiayi. Núnisaṉ Junatáncha úunt akupniu chichame̱nka ashí ujaktatjame tusa Yus íirmanum nekas umiktatjai tímiayi. Nu arantcha Junatán Tawitian chicharuk “Wisha iwiaakai̱ṉ úunt akupin ajakmeka Uunt Yusa waitnenkartutairiji̱a̱i̱ winiasha waitnentrurta tusa” Tawitian seamiayi. Nuní̱ Junatán ni anea asa Tawitji̱a̱i̱ chichaman najanawarmiayi. Warí niṉkia nekas enentáiji̱a̱i̱ anea asa túramiayi.

Saur Junatánan mátaj tama

^24-34 Kame Tawitkia kampunniunam u̱mkamiayi. Tura yurummanum kashincha táchamtai Tawitcha ¿tui̱ pujá? tusa úunt akupin Saur Junatánan aniasmiayi. Tutai Junatán chichaak “Winia yatsur chichartak ‘Ii shuarja̱i̱ iruntrar taṉku maar Piriṉnum áestuami túrutui. Tuma asamtai wisha wétaj tsaṉkatrukta’ túrutkui tsaṉkatkájai” tímiayi. Nu tutai Saur Junatánan suíran kaje̱ntukmiayi tura chicharuk “Ashí tsawant Tawit iwiaaku pujuttana nuiṉkia úunt akupin ajastincha tura akupeamusha áminiu áchattawai. Tuma asamtai Tawitkia jákatniuiti” takui̱ Junatán aparí̱ aya̱k “¿Urukamtia jákatniuit. Warinia túrait?” tutai mátaj tusa Saur naṉkin eketkamiayi. Nuya̱ṉka Saur Tawitian mátaj timia nuna Junatán paant nekaamiayi. Tura Junatánka yurumtsuk kajek jiinkimiayi. Tura Tawitian enentáimtus tí kuntuts enentáimpramiayi.

Junatán Tawitian u̱kma

^35-42 Kashin tsawa̱r Junatánka Tawitji̱a̱i̱ áujmatsarmia tímiatrusaṉ kampunniunam jiinkimiayi. Tura Junatán Tawitian chicharuk “Sétutsuk wárikmasam wetá. Warí Uunt Yusa náari̱ji̱a̱i̱ nekas umiktatji tusar chícham najanachukaitiajⁱ. Kame wíkisha tura ameksha umíachkumnisha núnisaṉ winia uchir ame uchirmiji̱a̱i̱ uminiachkuisha Uunt Yusak iirmasartai. Tuma asamtai aṉkant wetá” tímiayi. Tutai Tawitkia wajaki̱ wématai Junatánka péprunam waketkimiayi.