1 Sam. 19 - Yus Papí: Shuarja̱i̱ Yus Yamaram Chicham Najanamu

Saur Tawitian mátaj tama

¹ Saurka ni uchirí̱ Junatánan tura ni suntari̱ uuntri̱ armia núnaka Tawit mátarum tusa takarniúri̱n ashí untsukarmiayi. Túrasha Junatánka Tawitian ti anea asa

² ujakmiayi tura chicharuk “Winia apar Saur mantamnatniun wakerawai. Tuma asamtai kashin káshikkia anearta túram wáinkiachmin ú̱mkam pujusta.

³ Tura wisha jiinkittiajai túran ame pujuttamna nui̱ wisha winia aparja̱i̱ pujuttajai túran áminiun winia aparun áujsattajai nuya̱ṉka warí titiatá nuna ujaktatjame” tímiayi.

⁴ Nuyá̱ Junatánka Tawitian yáiṉtaj tusa ni aparí̱ Sáuran áujsamiayi. Tura chicharuk “Úunt akupniuka ni takarniuri̱ Tawitniaka yajauchikia peṉké awajsachminiaiti. Warí niṉkia úunt akupniunka yajauchikia peṉké awajchuiti antsu aya péṉkernak núkap túraiti” tímiayi

⁵ Jiristíanmaya̱ aentsun mátaj tusa ni iwiaakmari̱ncha tsuumainiam apujsamiayi túrunamtai Israer shuar ashí nupetmakarat tusa Jiuwá ti ikiakárarmai. Nuya̱ṉka úunt akupniusha timia ni jí̱jian wainkiamame tura ti warasmai. Túrayatcha ¿urukamtai umitmákchancha peṉké ántrasha itiurchat awajkati tura ántar makursha Tawitniasha maati?

⁶ Junatánka chichame̱n Saur antuk “Nekas tajai Jiuwá iwiaakui Tawitkia jákashtatui!” tímiayi.

⁷ Nuyá̱ Junatán untsuk úunt akupniuja̱i̱ áujmatsamia nuna ashí ujakmiayi Tawitian. Tura Saur pujamunam Tawitian ejemiayi. Túruna Tawitkia yaunchu Saura yaintri̱ pujuya núnisan ataksha pujusmiayi.

Tawitian Mikiar uwemtikramu

⁸ Nuyá̱ ataksha mesetan akui Tawitkia Jiristíanmaya̱ aentsja̱i̱ mesetnum mániattsa jiintiukmiayi tura ti kajeṉkar nupetkarmiayi túram níya̱ṉka pisakármiayi.

⁹ Nuya̱ṉka yajauch wakan Jiuwai̱ya̱ Sáuran eṉkemtuamtai tura je̱e̱ní̱ pujus uwejnum naṉkin achis eketmanum Tawitkia árpan túntuiniak pujumiayi.

¹⁰ Saurka naṉkiji̱a̱i̱ pana ji̱yan tanishnum anuataj tu enentáimtus aya neachma Tawitian naṉkin eketkamiayi túrasha Tawitkia naṉkin uwemturmiayi tura náṉkikia tanishnum akuuma juákmiayi. Tura Tawit jákatniunmaya̱ uwemar nu kashik pisarmiayi.

¹¹ Tura péṉker iisar káshik máwarat tusa Saurka aentsun Tawitia je̱e̱n akupkarmiayi. Túrasha ni nua̱rí̱ Mikiar Tawitian chicharuk “Ju̱ kashi iwiaakmaram uwemtikchakmeka kashinkia ámeka jakattame” tímiayi.

¹² Nuya̱ṉka Mikiarka ánkamunmaani̱ Tawitian ji̱i̱ki̱ nená akakmiayi túram we pisarmiayi.

¹³ Nuya̱ṉka Mikiarka aentsua ánin nakumkar najanamun achik atamprutai chipiu ure̱ja̱i̱ najanamun atamprumtik peaknum aepas pushiji̱a̱i̱ nukuk iniaisámiayi.

¹⁴ Tawit achiktarum tusar Saur akupkarma aents jearmatai Mikiarka nu áishmaṉkan chicharainiak “Jaa pujawai” tímiayi.

¹⁵ Túrasha Saurka Tawit e̱a̱ktarum tusa ataksha akupáiniak “peaknum itiatárum ju̱i̱ mátaj” tímiayi.

¹⁶ Nuya̱ṉka aents akupkarma Tawitia je̱e̱n waya̱war íiniaj tukamá aentsu ánin nakumkar najanamu atamprutai chipiu ure̱ja̱i̱ najanamun atamprus tepan wáinkiarmiayi.

¹⁷ Nuya̱ṉka Saur Mikiaran chicharuk “¿Urukamtai winiasha ju̱ni̱sha anaṉkruam tura winia nemasrusha ipisram?” tímiayi. Tutai Mikiar chichaak “Warí ni chichartak wétaj iniaitiusta núja̱i̱nchuka máattajme túrutkui iniaisajai” tímiayi.

Tawit Nayut Ramanam u̱mkamu

¹⁸ Tawitkia pisar wekaas Samuir pujamunam Ramanam jeamiayi tura Saur nin warí itiurkamia núnaka Samuiran ashí ujakmiayi. Tura nisha Samuirja̱i̱ we Nayutnum pujusármiayi.

¹⁹ Nuya̱ṉka Sáuran ujainiak “Tawitkia Ramanam Nayut nuṉkanam pujawai” tiármiayi.

²⁰ Nuya̱ṉka Tawit achiktarum tusa Saurka aentsun akuprámiayi. Túrasha Yúsnan etserin iruntrar Samuir jintintiáiniam Yúsnan étseruk pujuinian wáinkiarmiayi. Tura Saur akuprámu armia nusha Yusa Wakaní̱ eṉkemtuawaram nisha núnisaṉ etsertan naṉkamawarmiayi.

²¹ Tura Saur nuna nekáa ataksha chíkich aentsun akuprámiayi túrasha nisha núnisaran Yúsnan etseriarmiayi. Nuyá̱ Saurka ataksha menaitiú akupkarmiayi aentsun túrasha nisha núnisaran Yúsnan etseriarmiayi.

²² Nuya̱ṉka ímia niṉki Saur Ramanam wémiayi tura Sekunam nuṉka uunt tá̱i̱miunam jeamiayi. Tura nui̱ jeá chichaak “¿Samuirsha tura Tawitcha tui̱ pujuinia?” takui̱ “Ju̱i̱ Ramanam Nayut nuṉkanam niṉkia pujuiniawai” tímiayi.

²³ Tura Nayutnum wéak Ramanmaani̱ wean Yusa Wakaní̱ Sáuran eṉkemtuamiayi. Túram nisha núnisaṉ Nayutnum jeataj tusa weak Yúsnan etserki̱ Ramá ímianai jeamiayi.

²⁴ Nisha núnisan pushiri̱n aimiarmiayi tura nisha núnisaṉ Samuir íimmianum Yúsnan etsermiayi. Tura nú tsawantinkia takamtsuk tsawai̱sha káshisha misú pujusmiayi. Tura nui ¿Saursha núnisan Yúsnan etserniukait? tiáruiti.