1 Sam. 18 - Yus Papí: Shuarja̱i̱ Yus Yamaram Chicham Najanamu

Tawit Junatánja̱i̱ nawamnaiyamu

¹ Tawit Saurja̱i̱ chichaasua umikmatai Junatána wakaní̱ṉkia Tawitia wakaní̱ji̱a̱i̱ jiṉkiamua núnis juákmiayi. Tuma asa Junatán ni aya̱shí̱n anea tímiatrus Tawitian anemiayi.

² Nu tsawantinkia ni aparí̱ je̱e̱n waketki̱ tusa Saur emetamiayi.

³ Nuyá̱ ni aya̱shí̱n aneana tímiatrusaṉ anea asa Junatán Tawitji̱a̱i̱ chichaman najanawarmiayi.

⁴ Nuyá̱ Junatánka pushin entsaruya nuna ai̱k chíkich iwiarmamtai niniu armia nuja̱i̱ irur puya̱ncha tíshimkiuncha emenmamke̱ncha Tawitian susamiayi.

⁵ Tawitkia Saur akupmia nui̱ we wémiayi. Túrasha ashí túrimia nuka tí peṉker jiintiu wémiayi. Tuma asamtai Saurka suntara uuntri̱ anaikiamiayi. Núnaka ashí Israer shuarsha tura Saura takarniúri̱ armia nusha tí peṉker enentáimtiarmiayi.

Tawit náatkamtai Saur suir iisma

⁶ Tura Tawit Jiristíun mamtai mesetnumia̱ waketrar suntar wininiakui nuwa̱ ashí Israer péprunmaya̱ shakapan tura chíkich tuntuitiai̱ ainia nuna takarainia kantamáiniak ti warasar jantsemkiar úunt akupin Saur iṉkiuṉtai tusar jíintrarmiayi.

⁷ Nuyá̱ kantamki̱ jantsemáiniak nuwa̱sha ju̱na tiármiayi “Saurka míran maayi antsu Tawitkia tias míran maayi.” Tú kantampriarmiayi.

⁸ Túrasha Saurka ti kajekmiayi. Nuna antuk yajauch nekaper enentáimias “Tawitniaka tias míran tura wíniaka aya mírchiniak maayi tuíniatsuk. ¡Tura aya wi akupeamu súsatniukchak táattsara!” tu enentáimsamiayi.

⁹ Tura nu tsawantnumia̱ṉ juarki̱ Saurka Tawitian niisháa íimiayi.

¹⁰ Nuya̱ṉka chíkich tsawantai̱ yajauch wakan Yus akupkámu Sáuran eṉkemtuamiayi túram ni je̱e̱n init pujus wáurmiayi. Tawitkia chíkich tsawantcha tuntuí wemia núnisan árpan uwejé̱ja̱i̱ tuntuí pujumiayi tura Saurka uwejé̱e̱n naṉkin takakuyayi.

¹¹ Tura Saurka “Tawitian ijiun naṉkirtiuk tanishnum ajiataj” tu enentáimias naṉkin eketkamiayi. Túrasha Tawitkia jimiará uwemturmiayi.

¹² Jiuwá Tawitji̱a̱i̱ pujá asamtai Saurka Tawitian ashammiayi. Antsu Sáurai̱ya̱ṉka Yuska kanakmiayi.

¹³ Tuma asamtai Saurka Tawitniaka níya̱ṉka akankámiayi tura mir suntarnum uuntri̱ awajsamiayi. Túruna Tawitkia aents iimiainiamunam paant jí̱nkisha wai̱ wémiayi.

¹⁴ Tawitkia ashí túrimia nuiṉkia ashí péṉkerak turu wémiayi. Warí Jiuwaka Tawitji̱a̱i̱ pujumiayi.

¹⁵ Saurka Tawitian tí peṉker enentáimin asamtai ashammiayi.

¹⁶ Túrasha Israernumia̱ṉka tura Jutanmaya̱sha Tawitniaka ashí anearmiayi. Warí, mesetan ashiintiakush ní yarum wéarmiayi núnisan waketainiaksha niṉki ikianiarmiayi.

Tawit Saura awe̱ ajasma

¹⁷ Nuya̱ṉka Saur Tawitian chicharuk “Nekaata, winia nawantrun emka nuna ame nuwem atí tusan Mirapan amastatjai. Túrasha áishmaṉ kakarma ímiatrusam Jiuwá mesetri̱ji̱a̱i̱ mánitrukta” tímiayi. Túrasha Saurka jú̱nis enentáimmiai “Ímia wikia Tawitniaka máshtajai antsu Jiristíu aents mesetnum mánainiak máwarti” tu enentáimsamai.

¹⁸ Takui̱ Tawit Sáuran aya̱k “Kame ¿wisha yáitiaj tura winia iwiaakmarsha warimpiait, winia aparu shuari̱ Israernum ainia nusha warí ainia? ¿Wi úunt akupniu awe̱ átincha?”

¹⁹ Tura Saur ni nawantri̱n Mirapan Tawit súsatin tsawant jeamiayi. Túrasha Saur Mijiuranmaya̱ áishmaṉkan Atriaran ni nuatkati tusa susamiayi.

²⁰ Antsu Saura chíkich nawantri̱ Mikiar Tawitian aneawai tusa Sáuran ujakármiayi. Tura Saur nuna antuk “Péṉkeraiti” tímiayi.

²¹ Tura Saurka enentáimias chichaak “Nuna anajmas Tawitkia Jiristíanmaya̱ aentsu uwejé̱e̱n iniarat tusan nin susattajai” tímiayi. Nuya̱ṉka ataksha Tawitian chicharuk “Antsu yamaikia nekas awe̱r átatme” tímiayi.

²² Nuya̱ṉka Saur ni takarin armia nuna akupénak “Ú̱srumek Tawit chicharkuram ‘Nekaata úunt akupin ámin anentmawai núnisaṉ ashí úunt akupniu takarniúri̱sha wakerutmainiawai. Úunt akupniu nekas awe̱ atá’” tiármiayi.

²³ Saura takarniúri̱ armia nu Tawitia kuíshi̱n nu chichaman ujakármiayi. Tutai Tawit chichaak “¿Atumji̱a̱i̱ṉkia úunt akupniu awe̱ átin? yúpichuchikiait. ¿Warí, wisha kuítrinchaitjiai núnisnak náakmachuitjiai peṉké ántraitjiai túmaitiatnasha wisha itiur nuatkattaj” tímiayi.

²⁴ Saura takarniúri̱sha waketkiar Tawitia chichame̱n ujaak chicharainiak “Tawitkia jú̱nis tawai” tusa Sáuran ujakármiayi.

²⁵ Tura Saur chichaak “Tawit chicharkuram jú̱nisrum titiarum ‘Úunt akupniuka nuatu kuítri̱nkia enentáimtatsui antsu áyatik Jiristíanmaya̱ aentsu shunirí̱ nuape̱n siánan wakerawai úunt akupniu nemasri̱ yapajniakat’ tímiayi.” Túrasha Saurka Jiristíanmaya̱ aents Tawitniaka máwarat tu enentáimias tímiayi.

²⁶ Tura Saura takarniúri̱ armia nu ujakam Tawitji̱a̱i̱sha nuka péṉkeraiti úunt akupniu awe̱ ajastintkia tu enentáimsaya. Túrasha nu tsawantka jeatsa̱i̱ṉ

²⁷ Tawitkia ni shuari̱ji̱a̱i̱ we Jiristíanmaya̱ aents áishmaṉkan 200 mámiayi. Tura Tawitkia nuna shunirí̱ nuapen ikiaanak ni awe̱ ajastaj tusa úunt akupniun ashí susamiayi. Nuya̱ṉka nuatkat tusa úunt akupniuka Saur ni nawantri̱ Mikiaran susamiayi.

²⁸ Túrasha Saurka Jiuwá Tawitji̱a̱i̱ pujá asamtai ni nawantri̱ Mikiar Tawitian aneemia nuna nekaamiayi.

²⁹ Tuma asa Saurka Tawitniaka ti ashammiayi. Tura iwiaaku pujumia nuiṉkia tuke Tawitia nemase̱ ajasmiayi.

³⁰ Jiristíanmaya̱ aentsu uuntri̱ mesetnum ashí náiniakuinkia Tawitcha jintiuki̱ iṉkiú wémiayi túrasha Saura takarniúri̱ chíkich armia núja̱i̱sha naṉkaamas Tawitkia paant ajamiayi. Túmak Tawitia náariṉkia páantin naat ajasmiayi.