1 Sam. 16 - Yus Papí: Shuarja̱i̱ Yus Yamaram Chicham Najanamu

Tawit akupin atí tusa asuitiji̱a̱i̱ muuknum ukateamu

¹ Nuyá̱ Uunt Yus Samuiran chicharuk “Israernum akupin a̱i̱ṉ tusan Wi jí̱i̱kin ai̱sha Saur enentáimtusam úttasha ¿urutáik iniaisatam? Yamaikia kachunam asuiti yarata túrawakmin Piriṉ nuṉkanam Isái pujamunam akupkáttajme. Warí akupin atí tusan ni uchiríya̱n anaitiumkajai.”

² Tutai Samuir chichaak “¿Itiura wétataj? ¿Warí Saursha wi wéamun nekaanka mantuashtatuak?” tímiayi. Tutai Uunt Yus aya̱k “Jú̱nis túrata. Waaka nuwa̱ yamatskam jukitia. Tura ‘Uunt Yusan taṉkú maan áestakun shiir enentáimtustaj tusan winiajai’ titiá.

³ Tura jeam Yus shiir enentáimtakum Isái ipiaata. Kame ame túrattamna núnaka Wi jintintiáttajme. Tura Wi iniaktustatjamna nu muuknum asuiti ukatrutkata” tímiayi.

⁴ Nuyá̱ Uunt Yus timia núnaka tímiatrusan Samuirka túramiayi. Tura Piriṉnum jeamtai pepru uuntri̱ iṉkiuṉtajtsa jintiukiar ashamainiayat chicharainiak “¿Nekas enentái̱ji̱a̱i̱ṉ winiam?” tiármiayi.

⁵ Tuíniakui Samuir aya̱k “Ee shiir enentáiji̱a̱i̱ Uunt Yusan shiir awajsataj tusan winiajai. Imiatkímprachu ajastarum túrarum Uunt Yus shiir awajmanum wiji̱a̱i̱ winitiárum” tímiayi. Nuyá̱ Isain uchirtiuk Yusna ártí tusa imiatkincha awajsarma Yus shiir awajeamunam Samuir ipiaawarmiayi.

⁶ Tura nui̱ káunkarmatai Samuir Iriapan wainiak nekas akupin átinian Uunt Yus anaikiamu jú̱chashit tu enentáimtusmiayi.

⁷ Túrasha Uunt Yus chichaak “Náyaitkiuisha tura ni urukuit nusha iisaip. Wikia túmanka nakitiajai. Warí Uunt Yuska aents iyá núnaka iyatsui. Aentska aya pátatek ni urukuit nunak wainiui antsu Uunt Yuska enentáin iyawai” tú tímiayi.

⁸ Nuyá̱ Isaikia chíkich uchirí̱ Apiniatápan untsuk Samuiran iniaktusmiayi. Tura Samuir chichaak “Jú̱nasha Yuska anaikiachuiti” tímiayi.

⁹ Nuyá̱ Isái chíkich uchirí̱ Sáman iniaktusmiayi. Tura Samuir chichaak “Ju̱ uchincha Yuska anaikiachuiti” tímiayi.

¹⁰ Nuya̱ṉka Isái siati uchirí̱n untsuk Samuiran ashí iniaktusarmiayi. Túrasha Samuirka chichaak “Ju̱ya̱ncha chikichkiṉkisha Uunt Yuska anaikiachuiti” tímiayi.

¹¹ Tura Samuir Isain aníak “¿Jú̱chikik ainia ame uchirmeka?” tutai “Chikichik iniaṉnamu taasai. Nuka murikiun wáinniuiti” takui̱ Samuir chicharuk “Untsukam utitiá. Warí ni táachkuinkia yurumátniuka wárikkia juárkishtatji” tímiayi.

¹² Tutai Isái untsuká utitiarum tusa akupkámiayi. Nuyá̱ támatai intiashí̱sha kapantaku tsamapkar péṉker íiran wainkiamiayi. Tura Uunt Yus Samuiran chicharuk “Ju̱i̱ti. Tuma asamtai yamaikia wajakím asuiti muuknum ukatkata” tímiayi.

¹³ Takui̱ Samuir asuitin achik muuknum ukatak Tawitia yachi̱sha iimiainiamunmaṉ akupin anaikiamiayi. Tura nu tsawantin Yusa Wakaní̱ kakarmaja̱i̱ ni enentái̱n pimiuttan naṉkaamamiayi. Nuna tura Samuirka áujmamas Ramá nuṉkanam waketkimiayi.

Tawit Saura yaintri̱ ajasma

¹⁴ Kame Uunt Yusa kakarmari̱ Sáuran ikiukmiayi. Túrunamtai yajauch wakan Uunt Yus eṉketámu asa wáitkiamiayi.

¹⁵ Túmakui̱ ni takarniúri̱ chicharainiak “Pai, yamaikia Yus yajauch wakaní̱n eṉketrama wáitkiarmawai.

¹⁶ Nu asamtai íi uuntri̱ya takartámin ainia nu akupkarta. Árpan tuntuiyatniun nékan e̱a̱k uturtamiarat tura yajauch wakaní̱n Yus suramsa nu wáitkiarmakui shiir enentáimtikramit” tiármiayi.

¹⁷ Nuyá̱ Saur ni takarniúri̱n chicharainiak “Nuiṉkia ¿ya péṉker tuntuiyatniun neka? Waitneasrum nu e̱a̱krum itiartitiarum” tímiayi.

¹⁸ Nuna takui̱ Saura takarniúri̱ chichaak “Íimsakia. Piriṉnum Isái uchirí̱ chikichkiniak árpan tuntuiyatniun nékan wáinkiaitjiai. Nisha sapijia eṉkeachu kakarmaiti tura mesetan unuimiátraiti. Nu arant chichame̱sha esetar chichawiti tura péṉker íirkaiti nuya̱sha Uunt Yus niji̱a̱i̱ pujawai” tímiayi.

¹⁹ Tura Saur chichaman etserniun Isain akuptuiniak chichaak “Ame uchiram Tawit murikiun wáiniuk pujana nu akuptúrkata” tímiayi.

²⁰ Nuya̱ṉka Isaikia ni uchirí̱ Tawitian Saurai̱ akupeak niji̱a̱i̱ paṉ nuyá̱ uwáa jutai̱ nuap najanamunam winiu uwamun nuyá̱ chikichik chipiu yamatskaman umpurun aentsak.

²¹ Nuya̱ṉka Tawitkia Saurai̱ jeá ni yaintri̱ ajasmiayi. Tura tí peṉker enentáimta asa ni tantari̱n júu anaikiamiayi.

²² Tura Saur Isain chichaman akuptak “Waitneasam Tawit tsaṉkatrukta winia yainkiat warí nin péṉker enentáimtajai” tímiayi.

²³ Núnisaṉ Yus akupkámu yajauch wakan Sáuran tarú wémiayi nuya̱ṉka Tawit árpan uwejé̱ja̱i̱ túntuiyakui nuya̱ṉka Saur péṉker enentáim wémiayi. Tura túntuiyakui yajauch wakan Sáuran ikiú wémiayi.