1 Sam. 15 - Yus Papí: Shuarja̱i̱ Yus Yamaram Chicham Najanamu

Saur péṉker umíachkui Uunt Yus iniaisámu

¹ Kame chíkich tsawantai̱ Samuir Sáuran chicharuk “Uunt Yus akuptúkmatai asuitin muukmin ukatkan Israer shuara úunt akupniuri̱ atí tusam anaikiamjame. Túramu asam yamaikia Uunt Yusa chichame̱ anturkata” tímiayi.

² Ashí Akupin Uunt Yus chichaak “Israer shuar Ejiptunmaya̱ wininian naṉkaamaktinian suritkiaru ásarmatai Amarík aentsun asutiáwartatjai.

³ Tura yamaikia Amarík aentska werim waitnentsuk takarainia núurtiuk ashí amukárta. Iwiaakuka ikiutsuk áishmaṉsha nuwa̱sha uchisha kuírchisha tura waakasha muriksha kamiyusha umpurusha waitnentsuk amú amusarta” tímiayi.

⁴ Tutai Saurka suntaran Taraimnum irur ashí íismiayi. Túram nuṉkak mánin armia nuka tusiantu mir suntar ármiayi nuyá̱ Jutanmaya̱ṉka tias mir suntar ármiayi.

⁵ Nuya̱ṉka Saur Amarík aentsna pepru amia nuna ashintiukar pakanam jintian akirtuawarmiayi.

⁶ Tura Saur Kiin aentsun chicharainiak “Átumka Amarík aentsnumia̱ṉka jíintratarum. Núchaja̱i̱ṉkia atumsha Amarík aentsja̱i̱ métek amuukattarme. Warí átumka Israer shuar Ejiptunmaya̱ jíintrar wininiasha péṉker wainkiamarme” tímiayi. Nuna antukar Kiin aentssha Amarík aentsnumia̱ jíintrarmiayi.

⁷ Nuya̱ṉka Saursha Amarík aentsja̱i̱ mánainiak Awiira nuṉkanmaya̱ juárkiar mánaiki̱ nupetmakiar Ejiptunmaya̱ etsa̱ jintiainmaani̱ Shur nuṉka ana tímianai ejeniarmiayi.

⁸ Nuna túrawar Amaríknumia̱ úunt akupin Akaaknaka máatsuk Saur achikmiayi antsu aentsnaka puya̱ja̱i̱ ashí amukármiayi.

⁹ Túrawar Saurka aentsri̱ji̱a̱i̱ Akaaknaka waitnentrar mácharmiayi. Núnisaraṉ murik péṉker tí armia nunasha waakancha tura taṉku núnisaṉ unuekma ántsaṉ wariṉsha tí peṉker armia núnaka emeskatniun nakitiak yajauch mui̱jmiai̱ imiancha armia nunak emeskarmiayi.

¹⁰ Nuya̱ṉka Uunt Yus Samuiran chicharuk

¹¹ “Sáuran úunt akupin anaikia asan kúntuts nekapeajai. Warí winia chichamprun umitsuk Wini̱ya̱ kanakní̱” tímiayi. Nuja̱i̱ Samuir itiurchat enentáimiar nu kashi kánutsuk Yusan áujsamiayi.

¹² Nuyá̱ kashin káshik Samuirka Sáuran wáinkiataj tusa werimiayi. Tura nui̱ Samuiran chicharainiak “Saurka mesetnum nupetmaku asa kayan nakumak awaja̱i̱ ikiuttsa Karmir nainnium wemai tura ikiuak nuya̱ṉka jiinkí̱ Jirkar péprunam weyi” tu ujakármiayi.

¹³ Túruna asamtai Samuirsha Sáuran werimiayi. Nui̱ jearim Saur Samuiran chicharuk “Yus yaintmakti. Uunt Yus túrata tusa akuptúkma núnaka mash umirkájai” tímiayi.

¹⁴ Takui̱ Samuir chicharuk “Enta mash amuku ámincha ¿itiurkamuna murikiun tura waaka chichame̱a núninniasha ántaja?” tímiayi.

¹⁵ Nuyá̱ Saur aya̱k “Amaríknumia̱ aents ikiankarmai. Warí muriknasha tura waakancha tí peṉker áinian waitnentrar ame Yúsrum áestuatin tusar kajetsuk ikiankarmai. Antsu chíkich wariṉsha írunuka mash amukármaji” tímiayi.

¹⁶ Nuna antuk Samuir Sáurun chicharuk “Máakete. Uunt Yus yamái ju̱ kashi túrutna nuna ujaktatjame” tutai Saur “Ántajai, wats ujatkata” tímiayi.

¹⁷ Takui̱ Samuir chicharuk “Áme iimiasam imiancha ¿enentáimtumamni̱ṉchak Israer wea úunt akupin awajsámuitiam? ¿Auka Úunt Yuskechuk áminkia Israer shuara úunt akupniuri̱ awajtámsait?

¹⁸ Nu asamtai Uunt Yus akuptamuk ju̱ túrata tusa chichartamuk ‘Amarík aents yajauchin túrin ainia nuka mesetja̱i̱ ashí amú amusarta’ turamchamka.

¹⁹ Nuna túramu ai̱sha warí ¿urukamtai umirkachum? ¿Urukamtai mash amú amutskesha aya péṉkeri̱ṉsha juururam? Nu túrarmena nuka Uunt Yus íimmianumka yajauch túrarme” tímiayi.

²⁰ Tutai Saur Samuiran aya̱k “Wisha Uunt Yus akuptúkmania nunasha umirkájai. Tura ni turutmia nui̱ wena Amaríkia úuntri̱n Akaakan achikian itiamjai. Nuyá̱ Amarík aentsnasha mash amukmajai.

²¹ Nuyá̱ Yus ashí amuktárum timia nuna mash amutsuk aya péṉkernak júurar yaruakarmia nuna muriknasha waakancha Jirkar nuṉkanam ii Yusri̱ áestakur shiir awajsatai tusar aents júkiarmayi” tímiayi. Nuna Yus muí̱jiamun júkiaru ásar ti yajauchiniam yumiṉnararmiayi.

²² Nuya̱ṉka Samuir chicharuk “¿Umiriam warana tímiatruskek takamtsuk áestuatniuja̱i̱sha tura Yus susamuja̱i̱sha Uunt Yuska wará? Warí Yúsja̱i̱ṉkia taṉku maar takamtsuk áestuar shiir awajsatniuja̱i̱ṉkia naṉkaamas umirtuktin timiá péṉkeraiti tura anturkatniusha murikiu makikiari̱ji̱a̱i̱ naṉkaamas timiá péṉkeraiti.

²³ Tuma asa Yus nakitratniuka ukunam túrunatin nekaatniuja̱i̱ métek ti yajauchiti. Tura umishtai enentái takustinkia najankamu yus enentáimtakur mui̱jmiai̱ túratniuja̱i̱ métekete. Ni akupkámu ame ajapa iniaisa asakmin yamaikia amincha núnisaṉ úunt akupniuitmena nuya̱ṉka ajaprama iniaitiámsayi” tímiayi.

²⁴ Nuyá̱ Saur Samuiran chicharuk “Yajauchin túrajai. Warí Uunt Yus akupkámuncha tura ame chichammincha umitsuk aentsun ashamainiakun aentsu chichame̱n anturkarjai. Tuma asamtai waitneasam winia yajauch túrutair tsaṉkurturta.

²⁵ Túrar yamaikia wiji̱a̱i̱ waketkitiai wisha Uunt Yusan tikishmátrataj” tímiayi.

²⁶ Tutai Samuir Sáuran aya̱k “Ámiji̱a̱i̱ṉkia waketkishtatjai. Warí Uunt Yusa chichame̱ ajapa iniaisámame. Núnisaṉ amincha Israer shuara úunt akupniuri̱ ámiamna nuyá̱ Uunt Yussha ajapa iniaitiámsaiti” tímiayi.

²⁷ Nuyá̱ Samuir wáketkui Saurka úkumur awaṉkémpri̱ tsakari̱n achirak ja̱a̱rkamiayi.

²⁸ Túram Samuir Sáuran chicharuk “Israernum akupniuitmena nuya̱ṉka Uunt Yus amincha yamái tsurintramkayi. Tura amiya̱nak ámiji̱a̱i̱ṉkia naṉkaamas péṉker asamtai susayi.

²⁹ Tura Israera Winchari̱ṉkia waitruashtatui. Núnisaṉ awakesha enentáimprashtatui. Warí aentscha asa mai̱ áwakeka ajachuiti” tímiayi.

³⁰ Tutai Saur áimiuk “Yajauchin túrajai túrasha Israer shuara uuntri̱ tura ashí Israer shuar pujuiniamunam wiji̱a̱i̱ wáketeakum arantúrkata wisha Uunt Yusan ame Yúsrumin tikishmátrataj” tímiayi.

³¹ Nuya̱ṉka Samuir Sáuran nemarkamiayi tura Saurka Uunt Yusan tikishmátramiayi.

³² Nuya̱ṉka Samuir chichaak “Amaríkkia úunt akupniuri̱ Akaak itiartitiarum” tutai jákatin tsuumainkia naṉkaamasiapi tusa Akaak waras Samuiran tarimiayi.

³³ Túrasha Samuirka chicharuk “Ame puya̱rum untsurí nuwa̱n uchirtincha awajsarmai. Núnisan ame nukusha untsurí nuwa̱nam uchirtincha yamái juáktatui” tímiayi. Tura Uunt Yus íimmianum Samuir Akaakan Jirkarnum tsupir mámiayi.

³⁴ Nuyá̱ Samuirka Ramanam wémiayi antsu Saurka ní je̱e̱ní̱ Saurna Kawaanumaani̱ wakamiayi.

³⁵ Tura Samuir iwiaakuya̱ nui̱ṉkia atakka Sáurnaka peṉké wáinkiachmiayi. Túrasha Sáuran enentáimtus uut wémiayi. Ántsan Uunt Yussha urukamtaik Sáurnasha Israer shuara akupniúri̱ atí tusancha anaikiayaj tu enentáimsamiayi.