1 Sam. 14 - Yus Papí: Shuarja̱i̱ Yus Yamaram Chicham Najanamu

Yus Junatánai̱ni̱ kakaram súamu

^1-12 Junatán Saura uchirí̱ tantar júkitniun yáintrin chicharuk “Winitiá Jiristíu suntari̱ matsamtai̱ amaini̱ ana atuni̱ naṉkaamaktiai. Iin uwemtiktramprattsa Uunt Yus wariṉkísh túrawainti. Warí, núkapja̱i̱ṉsha núja̱i̱ṉchuka ishichkiji̱a̱i̱ṉsha aents uwemtikratniuka Úunt Yusja̱i̱ṉkia itiurchatchaiti” tímiayi. Tura ni aparí̱ṉkia saisiantu áishmaṉja̱i̱ pujumia núnaka nékachmiayi. Tura Junatán chichaak “Nu aentska naṉkaikiarar iin waitmakarat tusar ikiukiartai. Warí Uunt Yus nuní̱ ii uwejé̱n íkturmaschakaitiajⁱ. Ju̱ka ni waitmakarjinia nuja̱i̱ nekanattaji” tímiayi. Jiristíu suntari̱ matsamin armia nuna íistinniaka iniaisarmai. Tura Jiristíu chichainiak “Israer shuar nui̱ wá̱a̱nam ú̱mak pujuinia jiiniainiawai” tiar Junatánan tura tantara yáintrin untsúak “Ímiaja̱i̱ wakatarum. Túrawakrumin atumín nékamtikiattaji” tiármiayi. Tutai Junatán tantara yáintrin chicharuk “Winia ukunmarui̱ wakata. Warí Uunt Yus Israer shuara uwejé̱n íkturmasuitji” tímiayi.

^13-15 Nuyá̱ Junatán eem waká tantara yáintrisha pataaki̱ winimiai. Tura Jiristíu aentska Junatán wajamunam wajarmai tura tantara yáintri̱ṉkia úkumur téekáa nekearar máwarmai. Junatán tura ni tantar júkitniun yáiniuya nuja̱i̱ emka jatekratak mámuka painti suntaran máwarmiayi. Nuya̱ṉka matsamkamunmaṉka ú̱u̱rkamtai ashí aents waurka núnis ajasármiayi.

^16-23 Saur jintia iistarum tusar awajsamu armia nu tí untsurí aents náṉkamas tsakiṉmak wénan wáinkiarmiayi. Nuiṉkia Junatánka tura tantar júkitniun yáiniuyania nuja̱i̱ tu̱á̱kar matsatun Saur wáinkiachmai. Saur ashí áishmaṉ niji̱a̱i̱ pujuarmia nu mesetnum wéarmiayi tura Jiristíu aents nuamtak máninian wáinkiarmiayi. Núnisaṉ Israer shuar yáunchuka Jiristíu aentsja̱i̱ matsamin armia nu tura Israer shuarka naintiar naintranam ú̱mkar pujuinia mesetnum pataatuktai tusar jiintiurarmiayi. Uunt Yus nu tsawant Israer shuaran nupetmaktinian súsarmiayi.

Nekas umiktatjai tusa Saur chícham najanamu

^24-27 Nekas ju̱na umiktatjai tusa Saur chichaak “Ju̱ tsawant kashi ajachmanumaṉ tura winia nemasruncha yapaji̱átsa̱i̱ṉ yaaksha yurumkan yúakka yajauchiji̱a̱i̱ yumiṉkramu mui̱jmiai̱ átatui” aentsun tiniu asamtai nú tsawantinkia aentska itiurchat pujusármiayi. Saur tiniu asamtai nu tsawantinkia chikichkiksha yurumácharmiayi. Túrasha Junatánka ni aparí̱ shuari̱n nekas umiktatji tumamtikmia núnaka nékachmiayi. Tura tsukamak numi tsakari̱n iwiaintiuk míshkin aya̱k mukunámiayi túrunamtai ji̱sha jíitsumir ajasmiayi.

^28-30 Nuyá̱ péprunmaya tarí Junatánan chicharuk “Ame apa yapaji̱áchmin chichaman aentsun ujainiak ‘Áishmaṉ warinkish yamái yúaka yajauchiji̱a̱i̱ yumiṉkramu atí’ tawai” tímiayi. Tuma asamtai ashí aents jakamnia nekapiarmai. Nuyá̱ Junatán áimiuk “Winia apar aentsun itiurchat awajkaiti. Warí, aents ni nemasri̱ atantrarma nuyá̱ yamái yurumáwaruitkiunka ¿urutmá peṉkera aa? Tura Israer shuar Jiristíun nú nukap amukárajanta” tímiayi.

^31-35 Nu tsawantka aents ti pimpikiarmiayi. Tuma ásar mesetnum ata̱a̱rmanumia̱n murikiun waakan tura waaka uchichin kajeṉkar namaṉken númpe̱ntuk yúawarmiayi. Nuyá̱ Israer shuarka namaṉken númpe̱ntuk yuíniak Úunt Yusai̱n yajauch túrawarai tusar Sáuran ujakármiayi. Tura Saurka nuna nekáa kaya uunt itiatárum tusa akupkámiayi. Tura Saur chichaak “Aṉkant aṉkant atumí waakari̱ṉ tura atumí murikrí̱ṉ ikiankarum kajeṉkrum namaṉ yuátarum túrasha namaṉ númpe̱ntuk yúakrum Uunt Yusai̱ yajauch túrawairap” tímiayi. Nuya̱ṉka Uunt Yus áestuatniun Saurka nui̱ najanamiayi.

Jákatniunmaya̱ Junatánan ní shuari̱ uwemtikrarma

^36-46 Nuyá̱ Saur Yusan anintrak “¿Ju̱ kashi Jiristíu akatúktiatjak. Tura Israera uwejé̱n íktustatmek?” tímiayi túrasha Yuska ái̱kchamiayi. Nuya̱ṉka Saurka ¿ya tunáa túramuja̱i̱ Yus winia ái̱rkacha? tusa nekanati tímiayi. Tura nakurútaiji̱a̱i̱ nekapsa iisam Junatánai̱n iniarmiayi. Nuyá̱ Saur uchirí̱n chicharuk “¿Warí itiurkaitiam?” tutai “Winia uwejruí̱ numí takakjana núna tsakari̱ji̱a̱i̱ míshkin ayakan nukaamjai. Tura ¿aya núja̱i̱ṉ jakamniakaitiaj?” ni aparí̱n tu ái̱kmiayi. Tura Saur aya̱k “Junatáná, ame yamái jáchkumni̱ṉkia Uunt Yus winia kakaram asutiuáti” tímiayi. Tura aents Sáuran chicharainiak “¿Junatánka Israer shuaran uwemtikra asa jákatniuit? ¡Núnischaiti! ¡Antsu Uunt Yus iwiaakui! Tura Junatán yamái Yusja̱i̱ Israer shuaran uwemtikra asa Junatána muuke̱ya̱ṉka chikichik intiashkesha nuṉkanka iniarchattui” tiármiayi. Túrawar Israer shuar Junatánan jákatniunmaya̱ uwemtikrarmiayi. Nuyá̱ Saurka Jiristíu aentsun pataatutan iniaisámiayi túram Jiristíu aentska ni nuṉke̱n waketrarmiayi.

^47-52 Saurka Israera shuari̱n akuptan naṉkama ni nemasri̱ téntak pujuriarmia nuna mesetan najatamiayi. Tuí̱ṉkish we wemia nui̱ṉkia nupetmamiayi. Kame Israera shuari̱ṉkia ni nemasri̱ya̱ aṉkant awajsarmiayi. Saura uchirí̱ṉkia ju̱ ármiayi, Junatán, Isuí, Markisúa tura nawantri̱ṉkia Mirap nuyá̱ Mikiar. Nuyá̱ Saura núwe̱nka Ajiniuámauyayi. Tura Nera uchirí̱ Ápnerka suntara úuntri̱yayi. Nuka Saura íichri̱yayi. Nuyá̱ Saura aparí̱ṉkia Kíshauyayi. Saur ashí uwí akupmia nuiṉkia Jiristíu aentsja̱i̱ meset tuke aa wémiayi.