1 Sam. 13 - Yus Papí: Shuarja̱i̱ Yus Yamaram Chicham Najanamu

Jiristíanmaya̱ aents Saur mesetnum mánaikma

¹ Saur akuptan naṉkamamia nuiṉkia 40 uwí takakuyayi tura Israernum 22 uwí akupkámiayi. 2 Sam. 2:10

² Saurka menaintiú mir Israer shuaran ni suntari̱ awajsarmiayi. Tura tus mir suntarka Míkmasnum naintiar naintiar nuṉka Pitirnum Saurja̱i̱ pujuarmiayi. Nuyá̱ chíkich mir armia nuka Piṉjiamín nuṉkanam Kawaanam Junatánja̱i̱ pujuarmiayi. Antsu chíkich nui̱ pujuarmia núnaka ni je̱e̱ní̱ awakearmiayi.

³ Tura Junatánka Jiristíu suntar matsamtai̱n Képanam jatekmiayi. Nuna Jiristíu aentssha antukarmiayi. Nuya̱ṉka Israer shuar antukarti tusa ashí Israernum kachu umpuartarum tusa Saur akupkámiayi.

⁴ Túrunamtai “Saur Jiristíu suntar matsamtai̱n jatekuiti tura Jiristíu aents íismaka Israer shuarka mui̱jmiai̱ ajasáruiti” táman ashí Israer shuar antukarmiayi. Nuya̱ṉka Sáuran nemarsarat tusa ashí Israer shuaran Jirkarnum iruntrarti tusa untsukarmiayi.

⁵ Núnisaṉ Jiristíu aentssha Israer shuarja̱i̱ mesetnum mániatai tusa iruntrarmiayi. Niṉkia traintia mir kárun tura sais mir aents kawainium ekemtan unuimiátkaru nuyá̱ aentska nayantsa kaanmatkari̱n naikim írunna timianú untsurí iruntrar Míkmasnum jeawar Pitiawínniumia̱ṉka etsa̱ tatainmaani̱ matsamkarmiayi.

⁶ Kame Israer shuarka ni nemasri̱ ti untsurí áinian wáinkiar sapijmianiak kayá wá̱a̱nam tura nuṉká wá̱a̱nam nuyá̱ wa̱a̱ táurmanumsha wankananmasha nuṉka tsentsaimiunmasha ú̱mkarmiayi.

Uunt Yus Sáuran nakitrámu

⁷ Tura chíkichkia Kaat tura Karaatnumaani̱ wénak Jurtan entsan katitrarmiayi. Saurka Jirkarnum tuke pujumiayi. Túrasha ashí Israer shuar nin nemarainiaksha sapijmiaki̱ wéarmiayi.

⁸ Túrasha Saurka ni timia ímiatrusan siati tsawant Samuiran nákasmiayi. Nuya̱ṉka Samuir Jirkarnum taachkui aentssha tsakiṉmatan naṉkamawarmiayi.

⁹ Nuya̱ṉka Saur chichaak “Takamtsuk áestuatin núnisaṉ Yus shiir awajkur áestuatniusha itiatárum” tímiayi. Nuya̱ṉka taṉkun maa takamtsuk Saur áestuamiayi.

¹⁰ Taṉkun áestasua umíamunam Samuirka winimiayi. Nuya̱ṉka Saurka iṉkiuṉᵏ amikmátaj tusa jintiukmiayi.

¹¹ Tura Samuir anintrak “¿Warí itiurkám?” tutai Saur aya̱k “Ame tátatjai timi wémamna nuja̱i̱ métek táachkumin núnisaṉ aentssha tsakiṉmainiakui nu arant Jiristíu aentssha Míkmasnum irunainian wainkian

¹² tura Jiristíu aentssha wiji̱a̱i̱ mániktaj tusa Jirkarnum kautrukartatui tu enentáimsan wikia Uunt Yus waitnentrurat tusan seachu asan nakitiayatnak Uunt Yusan takamtsuk áestuajai.”

¹³ Tura Samuir Sáuran chicharuk “Uunt Yus ame Yúsrum akupkámusha umikcha asam nékachu waurka núnisam túrame. ¡Tura yamaisha Israernumka tuke akupin atí Uunt Yuska turamayi!

¹⁴ Túmaitiat ame akupeamurmeka amuturmaktatui. Warí Ni akupkámuri̱ umirkachu asakmin Uunt Yuska aentsun Ni wakerana nuja̱i̱ métek túrinian e̱a̱k anaikiayi ni aentsri̱n akupin átinniaka” tímiayi Samuir.

¹⁵ Nuyá̱ Jirkarnumia̱ṉka wajaki̱ we Samuirka Piṉjiamín nuṉkanam Kawáa nainnium wakamiayi. Nuya̱ṉka Saur niji̱a̱i̱ pujuarmia nuna nekapmarmiayi túram saisiantu suntar ármiayi.

Israera shuari̱ mánitiaiji̱a̱i̱nchu pujuinia

¹⁶ Tura Saurka ni uchirí̱ Junatánja̱i̱ nuyá̱ aents niji̱a̱i̱ pujuarmia nuka Piṉjiamín nuṉkanam Képanam juákarmiayi. Antsu Jiristíu aentska Míkmasnum matsamkarmiayi.

¹⁷ Kame nu matsamkamunmaya̱ Jiristíu suntar menaintiú iruntramu jíintrarmiayi. Nuyá̱ chíkich iruntramuka Upra jintianmaani̱ Suar nuṉká nuní̱ wéarmiayi.

¹⁸ Tura chíkich iruntramuka Pitjurunnumaani̱ wéarmiayi nuyá̱ amúamu iruntramuka Sepuimia pakari̱ni̱ íimiak ana nuní̱ kampuntin atsú nuṉkanmaani̱ wéarmiayi.

¹⁹ Warí Jiristíu aentska chichainiak “Israer shuarka puya̱ncha tura naṉkincha najanacharti” tiniu ásarmatai ashí Israer nuṉkanmaṉka jiruja̱i̱ takakmaka chikichkiksha atsumiayi.

²⁰ Ashí Israer shuarka nuṉka pukutai tura nuṉka tautai núnisaṉ jachancha núja̱i̱nchuka trikiu tsupitiaincha atsakturat tusar Jiristíu aentsun werin ármiayi.

²¹ Kame nuṉka pukutai tura nuṉka tautai atsakamunmaṉka menaintiú kuítian akikmarmiayi antsu jacha atsakatniuka nuyá̱ jiru tsákap awajsamu iwiaratniunmaṉka chikichik kuítniak akikmarmiayi.

²² Tura mánaiktin tsawant jeamia nuiṉkia Saurja̱i̱ tura Junatánja̱i̱ pujuarmia nuka naṉkincha tura puya̱ncha chikichkisha takakcha ármiayi. Aya jímiarchik Saurja̱i̱ Junatánkak takaku ármiayi.

²³ Nuya̱ṉka Jiristíu suntarka ashinkiar Míkmasnum wetaiya̱ nui̱ matsamkarmiayi.